"ވިލުންތެރި ކަނބަލުން": އަންހެނުން ބާރުވެރިކުރުވުމުގެ ހާއްސަ ޕްރޮގުރާމު ނިންމާލައިފި

އެޗްޑީސީ އާއި މޯލްޑިވްސް އިންސްޓިޓިއުޓް އޮފް ޓެކްނޮލޮޖީ (އެމްއައިޓީ) ގުޅިގެން ކުރިއަށްގެންދިޔަ "ވިލުންތެރި ކަނބަލުން" ޕްރޮގުރާމު ނިންމައި 200 ބައިވެރިންނަށް ސެޓްފިކެޓް ހަވާލުކޮށްފިއެވެ.

އިއްޔެ ހަވީރު ހުޅުމާލޭ ރެހެންދީ ސްކޫލުގައި ބޭއްވި ރަސްމިއްޔާތުގައި ސެޓްފިކެޓް ހަވާލުކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދެވެ.

ތިން މަސްދުވަހުގެ މުއްދަތަށް ކުރިއަށްދިޔަ މި ޕްރޮގުރާމުގެ މައިގަނޑު އަމާޒަކީ އަންހެނުން އަމިއްލަ ނަފްސަށް އޮންނަ އިތުބާރު ބޮޑުކޮށް، ފަންނީ ދާއިރާތަކުން ބާރުވެރިކުރުވުމެވެ. އެގޮތުން ގޭތެރޭގައި ބޭނުންކުރާ އެޕްލަޔަންސްތައް އަމިއްލައަށް މަރާމާތުކުރާނެ ގޮތުގެ ތަމްރީނު ބައިވެރިންނަށް ވަނީ ދީފައެވެ.

ރަސްމިއްޔާތުގައި އެޗްޑީސީގެ މެނޭޖިންގ ޑިރެކްޓަރ، ބްރިގޭޑިއަރ ޖެނެރަލް (ރޓޑ) އަލީ ޒުހައިރު ވިދާޅުވީ، މިއީ އާންމުކޮށް ފިރިހެނުން ކުރާ މަސައްކަތްތައް އަންހެނުންނަށް ދަސްކޮށްދީ، މުޖުތަމައުގައި އޮންނަ ޖިންސީ ތަފާތުކުރުންތައް ނައްތާލުމަށް އެޅުނު މުހިންމު ފިޔަވަޅެއް ކަމަށެވެ. އަދި ކުރިއަށްއޮތް ތަނުގައި ނުކުޅެދުންތެރިކަން ހުންނަ މީހުންނަށާއި ޒުވާނުންނަށް އަމާޒުކޮށްގެންވެސް މިފަދަ ހުނަރުވެރިކުރުމުގެ ޕްރޮގުރާމްތައް ކުރިއަށްގެންދިއުމަށް ވަނީ ރޭވިފައެވެ.