ސިނަމާލެ ބްރިޖަކީ ރާއްޖެއާއި ޗައިނާއާ ދެމެދު އޮތް ގާތް ގުޅުން ދައްކުވައިދޭ ރަމްޒެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ސިނަމާލެ ބްރިޖު ނުވަތަ ޗައިނާ-މޯލްޑިވްސް ފްރެންޑްޝިޕް ބްރިޖަށް 6 އަހަރު ފުރުމުގެ މުނާސަބަތުގައި ސޯޝަލް މީޑިއާގައި އެމަނިކުފާނު ކުރެއްވި ޕޯސްޓެއްގައި ވިދާޅުވީ އެ ބްރިޖަކީ ދެ ޤައުމުގެ ވިސްނުން އެއްގޮތްކަން ދައްކުވައިދޭ ބިނާއެއް ކަމަށެވެ.
ރައީސް މުޢިއްޒު ވަނީ ސިނަމާލެ ބްރިޖު ތަރައްޤީކުރުމުގެ މަޝްރޫޢުގައި އިސް ދައުރެއް އަދާކުރައްވާފައެވެ. އޭރު އެމަނިކުފާނު މަސައްކަތްޕުޅު ކުރައްވާފައިވަނީ އޭރުގެ ހައުސިންގ މިނިސްޓަރުގެ މަޤާމުގައެވެ.
ރައީސް މިއަދު ކުރެއްވި ޕޯސްޓުގައި ވިދާޅުވީ ސިނަމާލެ ބްރިޖަކީ އިންޖިނިއަރިންގ ދާއިރާއިންވެސް ފާހަގަކޮށްލެވޭ މަސައްކަތެއް ކަމަށާއި، ރަށްތައް ގުޅާލުމުގެ އިތުރުން މިއީ ދެޤައުމުގެ ގާތް ގުޅުމާއި ރަޙުމަތްތެރިކަމުގެ ރަމްޒެއް ކަމަށެވެ. އަދި މި ބިނާއަކީ އެއްބައިވަންތަކަމާއި ތަރައްޤީގައިވެސް ދެ ޤައުމުގެ ވިސްނުން އެއްގޮތްކަން ދައްކުވައިދޭ ބިނާއެއް ކަމަށް އެމަނިކުފާނު ސިފަކުރެއްވިއެވެ.
ސިނަމާލެ ބްރިޖަށް 6 އަހަރު ފުރުމާ ގުޅިގެން ކޮންސްޓްރަކްޝަން މިނިސްޓަރ ޑރ. އަބްދުﷲ މުއްޠަލިބުވެސް ވަނީ ސޯޝަލް މީޑިއާގައި ޕޯސްޓެއް ކުރައްވާފައެވެ. އެގޮތުން މުއްޠަލިބް ކުރެއްވި ޕޯސްޓުގައި ވިދާޅުވީ މި ބްރިޖާއެކު ދިވެހިންގެ ދިރިއުޅުމަށްވެސް އިންޤިލާބީ ބަދަލުތަކެއް އައިސްފައިވާ ކަމަށެވެ. އަދި މިއީ ރާއްޖޭގައި މިފަދަ ބްރިޖެއް އެޅިދާނެ ކަމުގެ ހެއްކެއް ކަމަށާއި މިއީ ޤައުމަށް އިތުރު ކުރިއެރުންތައް ގެނައުމަށް ކޮށިގެންދިޔަ މަގެއް ކަމަށް މުއްޠަލިބް ވިދާޅުވިއެވެ.
މީގެ އިތުރުން ސިނަމާލެ ބްރިޖުގެ މަސައްކަތް ކަނޑައެޅި ތާރީޚަށްވުރެ އަވަހަށް ނިމިގެން ދިއުމަކީ އޭރުގެ ހައުސިންގ މިނިސްޓަރ އަދި މިހާރުގެ ރައީސް މުޢިއްޒުގެ ހަރުދަނާ ލީޑަރޝިޕް ދައްކުވައިދޭ ކަމެއް ކަމަށްވެސް މުއްޠަލިބް ވިދާޅުވިއެވެ.
ޗައިނާގެ ސީސީސީސީ ކުންފުންޏާއި ޙަވާލުކޮށްގެން، ދިގުމިނުގައި 1.3 ކިލޯމީޓަރު އަދި ފުޅާމިނުގައި 20.3 މީޓަރު ހުންނަ މި ބްރިޖުގެ މަސައްކަތް އެއްކޮށް ނިންމާ، ބްރިޖު ރަސްމީކޮށް ހުޅުވީ 2018 އޯގަސްޓް މަހުގެ 30 ވަނަ ދުވަހުގައެވެ.
