މާލެއާއި ވިލިމާލެ މިހާރު ގުޅާލެވިފައިވާއިރު، ކުރިއަށްއޮތް އަހަރެއްހާ ދުވަހުގެ ތެރޭގައި ތިލަމާލެ ބްރިޖުގެ މުޅި މަޝްރޫޢު އެއްކޮށް ނިންމައި އާންމުންނަށް ހުޅުވާލެވޭނެ ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
ޕަބްލިކް ސަރވިސް މީޑިއާ (ޕީ.އެސް.އެމް) ގެ ސިލްސިލާ ޕޮޑްކާސްޓް "ނޭޝަންޗެޓް" ގައި ވާހަކަފުޅުދައްކަވަމުން އެމަނިކުފާނު ފާހަގަކުރެއްވި ގޮތުގައި މި މަޝްރޫޢަކީ ޤައުމުގެ ޢުމްރާނީ އަދި އިޤްތިޞާދީ ތަރައްޤީއާ ސީދާ ގުޅިފައިވާ، ސަރުކާރުން ނުހަނު ބޮޑު އިސްކަމެއްދޭ މުހިންމު މަސައްކަތެކެވެ.
މި މަޝްރޫޢުގެ ފެންވަރާއި ކޮލިޓީއާ މެދު ދެކެވޭ ވާހަކަތަކަށް އަލިއަޅުއްވާލައްވަމުން ރައީސުލްޖުމްހޫރިއްޔާ ވިދާޅުވީ، ތިލަމާލެ ބްރިޖުގެ ކޮލިޓީ ކަށަވަރު ކުރުމުގެ މަސައްކަތް ބަލަހައްޓަމުން ދަނީ ދުނިޔޭގެ މަޝްހޫރު 'އާރޮޕް' ކުންފުނިން ކަމަށެވެ. މިއީ މީގެ ކުރިން ސިނަމާލެ ބްރިޖުގެ މަސައްކަތްވެސް އެންމެ މަތީ ފެންވަރުގައި ބެލެހެއްޓި ކުންފުނި ކަން ފާހަގަ ކުރައްވަމުން، ރައީސް ވަނީ ބްރިޖުގެ ހުރިހާ މަސައްކަތް ތަކެއް ވެސް ކުރިއަށް ދަނީ ބައިނަލްއަޤުވާމީ މިންގަނޑު ތަކާއި އެއްގޮތަށް، ފަންނީ ދިރާސާ ތަކުގެ މައްޗަށް ބިނާ ވެގެން ކަމުގެ ޔަޤީންކަން ރައްޔިތުންނަށް ދެއްވާފައެވެ.
Advertisement
އަހަރެއްހާ ދުވަހުގެ ތެރޭގައި ބްރިޖުގެ މަސައްކަތް މުޅިން ނިމި، ތިލަފުއްޓާއި ހަމައަށް ގުޅާލެވުމުން، މާލެ ސަރަޙައްދުގެ ދަތުރުފަތުރަށާއި ވިޔަފާރި ތަކަށް ބޮޑު ބަދަލެއް އަންނާނެއެވެ. ރައީސް މުޢިއްޒު ވިދާޅުވި ގޮތުގައި، ސަރުކާރުގެ އަމާޒަކީ އިޤްތިޞާދު ފުޅާކުރުން ކަމަށް ވާއިރު، މިފަދަ ބޮޑެތި އުމްރާނީ މަޝްރޫޢު ތަކުގެ ސަބަބުން ޤައުމުގެ މުސްތަޤްބަލު ބިނާވެގެން ދާނީ ދުރުވިސްނޭ، ހަރުދަނާ ބިންގަލެއްގެ މައްޗަށެވެ.
