ދުނިޔޭގެ ކަނޑުތަކުގެ މަތީ ފަށަލައިގެ ހޫނުމިން ތާރީހުގައި ވެސް ނުއުފުލޭ މިންވަރަކަށް މައްޗަށް ގޮސްފައިވާ ކަމަށާއި، ބާރުގަދަވަމުން އަންނަ "އެލް ނީނިއޯ" މޫސުމީ ހާދިސާގެ ސަބަބުން ކަނޑުތަކުގެ ހޫނުމިން އިތުރަށް މަތިވަމުންދާ ކަމުގެ އިންޒާރު ސައިންސްވެރިން ދީފިއެވެ.
ކޯޕަރނިކަސް ކްލައިމެޓް ޗޭންޖް ސަރވިސް (ސީ3އެސް) އިން ހާމަކުރި ގޮތުގައި، ކަނޑުތަކުގެ އެވްރެޖް ހޫނުމިން ވަނީ 21.1 ޑިގްރީ ސެލްސިއަސް އަށް އުފުލިފައެވެ. މިއީ މީގެ ކުރިން 2024 ވަނަ އަހަރުގެ މާޗު މަހު ރެކޯޑު ކުރެވުނު 21.09 ޑިގްރީ ސެލްސިއަސް އަށްވުރެ މަތީ އަދަދެކެވެ. އާންމުގޮތެއްގައި ކަނޑުތަކުގެ ހޫނުމިން އެންމެ މައްޗަށް ދަނީ މާރިޗު ނުވަތަ އެޕްރީލް މަހު ކަމަށްވާއިރު، އޮގަސްޓު މަހު މިފަދަ ރެކޯޑެއް ހެދުމަކީ ސައިންސްވެރިން އިންތިހާއަށް ކަންބޮޑުވާ ކަމެކެވެ.
އެލް ނީނިއޯއަކީ ޕެސިފިކް ކަނޑުގެ މެދުތެރެއާއި އިރުމަތީ ސަރަހައްދުގެ ކަނޑުގެ ފިނިހޫނުމިން އާދަޔާޚިލާފަށް މައްޗަށް ދިއުމުގެ ސަބަބުން ދުނިޔޭގެ މޫސުމަށް ބޮޑެތި ބަދަލުތަކެއް އަންނަ ގުދުރަތީ ހާދިސާއެކެވެ. ކުރިއަށް އޮތް މަސްތަކުގައި އެލް ނީނިއޯ އިތުރަށް ބާރުގަދަވާނެ ކަމަށް ބެލެވޭއިރު، މިއީ ފާއިތުވި އެތައް އަހަރެއްގެ ތެރޭގައިވެސް ނުދެކޭފަދަ ބާރުގަދަ ހާދިސާއަކަށް ވެގެންދާނެ ކަމުގެ އިންޒާރު ޑަބްލިއުއެމްއޯ އާއި ކޯޕަރނިކަސްއިން ދެއެވެ.
Advertisement
ސައިންސްވެރިން ފާހަގަކުރާ ގޮތުގައި، އެލް ނީނިއޯއަކީ ގުދުރަތީ ކަމެއް ކަމުގައިވީ ނަމަވެސް، އިންސާނުންގެ އަމަލުތަކުން ދުނިޔެ ހޫނުވަމުންދާތީ، މި ހާދިސާގެ ނުރައްކާތެރިކަން މިހާރު ވަނީ އިންތިހާއަށް އިތުރުވެފައެވެ.
ކަނޑުތަކުގެ ފިނިހޫނުމިން މައްޗަށް ދިއުމަކީ ކަނޑުގެ ދިރުންތަކަށާއި، ފަރުތަކުގެ މުރަކަތައް އެކީ ހަލާކުވެ "ބްލީޗް" ވުމަށް މަގުފަހިވާ ކަމެކެވެ. މިއީ ކަނޑުގެ އީކޯސިސްޓަމްތަކަށާއި މަސްވެރިކަމަށް ބަރޯސާވެފައިވާ ދިވެހިރާއްޖެ ފަދަ ޖަޒީރާ ގައުމަކަށް އޮތް ބޮޑު ނުރައްކަލެކެވެ. ރާއްޖޭގެ ފަރުތަކަކީ ފަތުރުވެރިކަމާއި މަސްވެރިކަމުގެ މައިބަދަ ކަމަށްވުމުގެ އިތުރުން، ރަށްތައް ގިރުމުން ރައްކާތެރިކޮށްދޭ ގުދުރަތީ ފާރު ވެސް މެއެވެ.
މީގެ ކުރިން 1998 ވަނަ އަހަރު ދިމާވި ބާރުގަދަ އެލް ނީނިއޯ ހާދިސާގައި ވެސް ރާއްޖޭގެ ފަރުތަކުން ބޮޑު ބައެއް ވަނީ ހަލާކުވެފައެވެ.
ކަނޑުގެ ހޫނުމިން އިތުރަށް މަތިވަމުންދާނަމަ، ރާއްޖޭގެ އިގްތިސާދަށާއި، ކާބޯތަކެތީގެ ރައްކާތެރިކަމަށް އަދި ތިރި ރަށްތަކުގެ ސަލާމަތަށް ބޮޑެތި ގޮންޖެހުންތަކެއް ކުރިމަތިވާނެއެވެ.
