ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުހައްމަދު މުޢިއްޒަކީ ކުދި އަދި މެދު ފަންތީގެ ވިޔަފާރިތައް ކުރިއެރުވުމަށް އަމަލީގޮތުން މަސައްކަތްކޮށް، ނަތީޖާ ނެރެދެއްވާ ލީޑަރެއްކަން އދ.ގެ ރަބާބް ފާތިމާ ފާހަގަކުރައްވައިފިއެވެ.
"ސިޑްސް ގްލޯބަލް ބިޒްނަސް ނެޓްވޯކް ފޯރަމް 2026" ހުޅުވުމުގެ ރަސްމިއްޔާތުގައި ރަބާބް ފާތިމާ ވިދާޅުވީ، ރާއްޖޭގެ ސަރުކާރުން ކުދި ވިޔަފާރިތަކަށާއި ޒުވާން ވިޔަފާރިވެރިންނަށް އިންވެސްޓްކޮށް، އޭގެ ހަގީގީ ނަތީޖާ އަމަލީގޮތުން ފެންނަމުންދާ ކަމަށެވެ.
"މި ރަސްމިއްޔާތުގައި ވީޑިއޯ މެސެޖެއް މެދުވެރިކޮށް ވާހަކަދެއްކެވި ރަބާބް ފާތިމާ އަކީ އދ. ގެ އަންޑަރސެކްރެޓަރީ-ޖެނެރަލްގެ މަޤާމު ފުރުއްވަމުންދާ، ބަންގްލަދޭޝްއަށް އުފަން ތަޖުރިބާކާރު ޑިޕްލޮމެޓެކެވެ. އޭނާއަކީ ދުނިޔޭގެ އެންމެ ކުޑަކޮށް ތަރައްޤީވެފައިވާ ޤައުމުތަކާއި، ބިމުގެ ގޮތުން ބަންދުވެފައިވާ ޤައުމުތަކުގެ އިތުރުން، ދިވެހިރާއްޖެ ފަދަ ތަރައްޤީވަމުން އަންނަ ކުދި ޖަޒީރާ ޤައުމުތަކުގެ (ސިޑްސް) ޙައްޤުތަކާއި ބެހޭގޮތުން އދ. އިން ކަނޑައަޅުއްވާފައި ހުންނަވާ އެންމެ މަތީ ޚާއްޞަ މަންދޫބެވެ.
Advertisement
"ސިޑްސް ގްލޯބަލް ބިޒްނަސް ނެޓްވޯކް ފޯރަމް 2026" ގައި ވީޑިއޯ މެސެޖެއް މެދުވެރިކޮށް ރަބާބް ފާތިމާ ވާހަކަ ދައްކަވަނީ / ފޮޓޯ: ޕީއެސްއެމް
މިފޯރަމުގައި ރައީސް މުޢިއްޒު ވަނީ ކުދި ވިޔަފާރިތައް މާލީގޮތުން ބާރުވެރިކުރުވުމަށާއި، ޒުވާން އަދި އަންހެން ވިޔަފާރިވެރިން ކުރިއެރުވުމަށް ސަރުކާރުން ގެންގުޅުއްވާ ދުރުރާސްތާ ތަޞައްވުރު ހާމަކުރައްވާފައެވެ. މި ތަޞައްވުރަށް ތަޢުރީފު ކުރައްވަމުން، އެންޓީގުއާ އާއި ބާބިއުޑާއިން އދ.އަށް ކަނޑައަޅުއްވާފައި ހުންނަވާ ދާއިމީ މަންދޫބު ވޯލްޓަން ވެބްސަން ވިދާޅުވީ، ރާއްޖެއިން މި ގެންގުޅޭ ސިޔާސަތުތަކަކީ ބައިނަލްއަޤުވާމީ މައިދާނުގައި ކުދި ޖަޒީރާ ޤައުމުތަކުން ވަކާލާތު ކުރަމުންދާ ކަންކަން ކަމަށާއި، މިއީ އެހެން ކުދި އިޤުތިޞާދުތަކަށް ލިބުނު ފުރިހަމަ މިސާލެއް ކަމަށެވެ.
މިހާރު މާލޭގައި ކުރިއަށްދާ މި ބައްދަލުވުމަކީ، 2024 ވަނަ އަހަރު ބާބިއުޑާގައި ބޭއްވުނު ސިޑްސް ފޯރަމުގައި ރައީސް މުޢިއްޒު އިސްވެ ވަކާލާތު ކުރެއްވި ކަންތައްތަކުގެ މައްޗަށް ބިނާކޮށް ކުރިއަށްދާ ބައްދަލުވުމެކެވެ. މޫސުމީ ބަދަލުތަކާއި އިޤުތިޞާދީ ގޮންޖެހުންތަކުން އަރައިގަތުމަށްޓަކައި ޓުވާލޫ އަދި ޕަލާއޫ ފަދަ ޖަޒީރާ ޤައުމުތަކުގެ މަތީ ފަންތީގެ ވަފުދުތަކާއި އެކު ބާއްވަވަމުންދާ މި ބައްދަލުވުންތަކުގެ ސަބަބުން، ބައިނަލްއަޤުވާމީ މާލީ ނިޒާމުތައް ރާއްޖެ ފަދަ ކުދި ޤައުމުތަކުގެ ހަގީގީ ހާލަތަށް ބަދަލުކުރުމަށް ކުރާ މަސައްކަތްތަކަށް އިތުރު ބާރެއް ލިބިގެންދާނެ ކަމަށް ގައުމުތަކުން އުއްމީދު ކުރެއެވެ.
