ކުދި ޖަޒީރާ ގައުމުތަކަކީ ހަމައެކަނި މޫސުމީ ނާޒުކުކަން އޮތް ބައެއްގެ ގޮތުގައި ދެކުމުގެ ބަދަލުގައި، އެއީ އާ އީޖާދުތަކާއި ވިޔަފާރީގެ މައި މަރުކަޒުތަކެއްގެ ގޮތުގައި ބައިނަލްއަގްވާމީ މުޖުތަމައުން ބަލައިގަންނަންޖެހޭ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ، މި މަހުގެ 23 އިން 25 އަށް ދިވެހިރާއްޖޭގައި ކުރިއަށްދާ "ސިޑްސް ގްލޯބަލް ބިޒްނަސް ނެޓްވޯކް (ޖީ.ބީ.އެން) ފޯރަމް 2026" އަދި "އައިލެންޑް އިންވެސްޓްމަންޓް ފޯރަމް (އައި.އައި.އެފް)" ފެށުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ.
މި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، ނާޒުކު ހާލަތަކީ ޖަޒީރާ ގައުމުތަކުގެ ހަގީގަތުގެ އެއްބައި ކަމަށާއި، އަނެއް ބަޔަކީ އެ ގައުމުތަކުގެ ސާބިތުކަމާއި އަޒުމު ކަމަށެވެ. އަދި ޖަޒީރާ ގައުމުތަކުން ދަނީ ހުރި ހުރަސްތައް އާ އީޖާދުތަކަށް ބަދަލުކޮށް، ދުރުމިންތައް ގުޅުވައިދީ، ކުރިމަތިވާ ގޮންޖެހުންތައް ފުރުސަތުތަކަށް ބަދަލުކުރަމުން ކަމަށް އެމަނިކުފާނު ފާހަގަކުރެއްވިއެވެ.
Advertisement
ރައީސް އިތުރަށް ވިދާޅުވީ، މި ސާބިތުކަން އެންމެ ބޮޑަށް ފެންނަނީ އަމިއްލަ ވިޔަފާރިތަކުގެ ދާއިރާއިން ކަމަށެވެ. އެގޮތުން ކުދި އަދި މެދުފަންތީގެ ވިޔަފާރިތަކަކީ މިފަދަ ޤައުމުތަކުގެ އިގްތިސާދުގެ މައި އިންޖީނު ކަމަށާއި، ސަރުކާރުތަކަށް އެކަނި ހައްލުނުކުރެވޭ ކަންކަމުގައި މި ވިޔަފާރިތަކުން އަމަލީ ހައްލުތައް ހޯދައިދޭ ކަމަށް ވިދާޅުވިއެވެ. އަދި ގައުމުތަކުގެ ކުޑަކަމަކީ އާ ހިޔާލުތަކާއި ޓެކްނޮލޮޖީ އަދި ހައްލުތައް ތަރައްގީކުރާ އީޖާދީ "ލެބޯޓްރީ" ތަކަކަށް ވުމަށް ލިބޭ ފައިދާއެއް ކަމުގައިވެސް އެމަނިކުފާނު ސިފަކުރެއްވިއެވެ.
ޑިޖިޓަލް ގުޅުމަކީ ހަމައެކަނި މުއާސަލާތީ ކަމެއް ނޫން ކަމަށާއި، އެއީ ވިޔަފާރިއާއި، މާލީ ހިދުމަތްތަކާއި، ފަތުރުވެރިކަން އަދި އުފެއްދުންތެރި ސިނާއަތްތައް ކުރިއެރުވުމަށް ބޭނުންވާ އިގްތިސާދީ އުމްރާނީ ވަސީލަތެއް ކަމަށް ރައީސް ވިދާޅުވިއެވެ. އަދި ރާއްޖޭގެ "މޯލްޑިވްސް 2.0" އެޖެންޑާގެ ދަށުން ޖިއޮގްރަފީ ގޮތުންނާއި ސައިޒުގެ ގޮތުން ހުރި ހުރަސްތައް ގިރާކުރުމަށް ޑިޖިޓަލް ޓެކްނޮލޮޖީ ބޭނުންކުރަމުންދާކަން އެމަނިކުފާނު ފާހަގަކުރެއްވިއެވެ.
ރާއްޖޭގެ ތަރައްގީއަށް އަޅަމުންދާ ފިޔަވަޅުތަކަށް އަލިއަޅުއްވާލައްވަމުން، ޒުވާން ވިޔަފާރިވެރިންނަށާއި އަލަށް ފަށާ ވިޔަފާރިތަކަށް ހާއްސަ މާލީ އެހީތެރިކަން ދިނުމާއި، ވަކިން ހާއްސަކޮށް އަންހެނުން ހިންގާ ވިޔަފާރިތަކަށް އެހީތެރިކަން ފޯރުކޮށްދިނުން ހިމެނޭކަމަށް ރައީސް ވިދާޅުވިއެވެ. މީގެއިތުރުން ޒަމާނީ ބޭރުގެ އިންވެސްޓްމަންޓް ޤާނޫނާއި، 2027 ވަނަ އަހަރަށް އަމާޒުކޮށް ޤާއިމުކުރާ ޓްރޭޑް އެކްސެލެރޭޝަން ޒޯނާއި، ލޮޖިސްޓިކްސް އަދި ފްލޯޓިންގ ސޯލާ ހަކަތައިގެ ދާއިރާއިން ކުރެވޭ ސްޓްރެޓީޖިކް އިންވެސްޓްމަންޓްތަކުގެ މަޢުލޫމާތުވެސް ހިއްސާކުރެއްވިއެވެ.
ވާހަކަފުޅު ނިންމަވާލައްވަމުން ރައީސް ވަނީ، އދ. ގެ އޮފީސް އޮފް ދަ ހައި ރެޕްރެޒެންޓެޓިވް ފޮރ ދަ ލީސްޓް ޑިވެލޮޕްޑް ކަންޓްރީސް، ލޭންޑްލޮކްޑް ޑިވެލޮޕިންގ ކަންޓްރީސް އެންޑް ސްމޯލް އައިލެންޑް ޑިވެލޮޕިންގ ސްޓޭޓްސް (ޔޫ.އެން-އޯ.އެޗް.އާރް.އެލް.އެލް.އެސް) އިން، ޖީ.ބީ.އެން ފޯރަމަކީ ޖަޒީރާ ޤައުމުތަކުގެ އީޖާދީ ޚިޔާލުތަކާއި ވިޔަފާރިތައް، މާލީ އެހީތެރިކަމާއި ޓެކްނޮލޮޖީ އަދި ބައިނަލްއަގްވާމީ ބާޒާރުތަކާ ގުޅުވައިދޭ މައިގަނޑު ޕްލެޓްފޯމަކަށް ހައްދަވައިދެއްވުމަށް އެދިވަޑައިގެންފައެވެ.
