ދިވެހިރާއްޖޭގެ އިންޝުއަރެންސް ސިނާއަތް ހަރުދަނާކުރުމަށްޓަކައި އެކުލަވާލާފައިވާ އައު ގާނޫނުގެ ދަށުން ހަދަންޖެހޭ މުހިންމު ދެ ގަވާއިދަކަށް ހިޔާލު ހުށަހެޅުމުގެ ފުރުސަތު މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިއަދު ހުޅުވާލައިފިއެވެ.
މި ފުރުސަތު ހުޅުވާލާފައިވަނީ ދިވެހިރާއްޖޭގެ އިންޝުއަރެންސްއާބެހޭ ގާނޫނު (ގާނޫނު ނަންބަރު 13/2025) ތަންފީޒުކުރުމަށް ބޭނުންވާ 'އިންޝުއަރެންސް (ދިވެހިރާއްޖޭގައި ހުރި ރިސްކުތަކާބެހޭ) ގަވާއިދު' އަދި 'އިންޝުއަރެންސް (އާންމު މާއްދާތަކުގެ) ގަވާއިދު' ގެ ދެލިކޮޕީއަށެވެ.
އެމްއެމްއޭ އިން ހާމަކޮށްފައިވާ ގޮތުގައި، މި ދެ ގަވާއިދަކީ ވެސް ރާއްޖޭގައި ހަރަކާތްތެރިވާ އިންޝުއަރެންސް ކުންފުނިތަކާއި މި ދާއިރާގެ މަސްލަހަތު ހިމެނޭ އެހެން ފަރާތްތަކުގެ މަޝްވަރާއާއެކު އެކުލަވާލާފައިވާ ދެލިކޮޕީތަކެކެވެ. މި ގަވާއިދުތައް އިތުރަށް ފުރިހަމަކުރުމަށްޓަކައި އާންމުންގެ ޚިޔާލު ހޯދުމަކީ މުހިންމު ކަމެއް ކަމަށް އެ އޮތޯރިޓީން ދެކެއެވެ.
Advertisement
ހިޔާލު ހޯދުމަށް ހުޅުވާލާފައިވާ ގަވާއިދުތަކުގެ ލިންކުތައް ތިރީގައި އެވަނީއެވެ:
- އިންޝުއަރެންސް (ދިވެހިރާއްޖޭގައި ހުރި ރިސްކުތަކާބެހޭ) ގަވާއިދު: https://tinyurl.com/RisksinMaldives
- އިންޝުއަރެންސް (އާންމު މާއްދާތަކުގެ) ގަވާއިދު: https://tinyurl.com/Gen-Provisions
މި ގަވާއިދުތަކަށް އެއްވެސް ހިޔާލެއް ނުވަތަ އިސްލާހެއް ހުށަހަޅަން ބޭނުންވާ ފަރާތްތަކުން، 18 އޮގަސްޓު 2026 ވާ އަންގާރަ ދުވަހުގެ މެންދުރުފަހު 13:00 ގެ ކުރިން insurance@mma.gov.mv އަށް އީމެއިލް ކުރެއްވުމަށް އެމްއެމްއޭ އިން ވަނީ އެދިފައެވެ.
މި އައު ގަވާއިދުތަކުގެ ސަބަބުން ރާއްޖޭގެ އިންޝުއަރެންސް މާކެޓުގައި ހުރި ރިސްކުތައް ދެނެގަނެ، ކުންފުނިތަކުން އަމަލުކުރަންޖެހޭ އާންމު އުސޫލުތައް އިތުރަށް ހަރުދަނާވެގެންދާނެ ކަމަށް ބެލެވެއެވެ.
