ދަނޑުވެރިކަމުގެ އާމްދަނީ އިތުރުކުރުމަށް ޤައުމީ ލެބޯޓަރީ މުހިންމު ދައުރެއް އަދާކުރާނެ ކަމަށް ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. ޢާއިޝަތު ރަމީލާ ވިދާޅުވެއްޖެއެވެ.

އެކަމަނާ ވިދާޅުވީ، ދަނޑުވެރިކަމުގެ ލެބޯޓަރީއެއްގެ މުހިންމުކަން ފާހަގަކުރެވެނީ ދަނޑުތަކަށް ބަލިޖެހޭ ހާލަތްތަކުގައި ނުވަތަ ދަނޑުވެރިންގެ މަސައްކަތުން އެކަށީގެންވާ ނަތީޖާ ނުނެރެވޭ ދަނޑިވަޅުތަކުގައެވެ. އަދި މިފަދަ ލެބޯޓަރީއެއް ޤާއިމުވުމަކީ ދަނޑުވެރިކަމުގެ ދާއިރާގައި މަސައްކަތްކުރާ ފަރާތްތަކަށް އެކަށީގެންވާ ނަފާ ލިބުމަށް މަގުފަހިކޮށްދޭނެ ކަމެއްކަމަށް އެ ކަމަނާ ފާހަގަކުރެއްވިއެވެ.

 "މިފަދަ ލެބޯޓަރީއެއް ޤާއިމްވެގެން އައުމަކީ އަސްލު ދަނޑުވެރިކަން ކުރާ ފަރާތްތަކަށް އެ ފަރާތްތަކުން ކުރާ މަސައްކަތުގެ ފުރިހަމަ މަންފާ ލިބުމަށް އެހީތެރިވާނެކަމެއް. ރާއްޖެއިން ބޭރަށް ފޮނުވައިގެން މިގޮތަށް ޓެސްޓުތައް ހެދުމަށް ދިމާވުމަކީ ދަނޑުވެރިން ކުރާ މަސައްކަތަށް ވަރަށް ބޮޑު ގޮންޖެހުންތަކެއް ކުރިމަތި ވެގެން ދާކަމެއް،" ޑރ. ރަމީލާ ވިދާޅުވިއެވެ. ދަނޑުވެރިކަމުގެ ޤައުމީ ލެބޯޓަރީ ޢިމާރާތް އެޅުމަށް 11 މިލިޔަން ރުފިޔާ ސަރުކާރުން ޚަރަދު ކުރާއިރު، މި ލެބޯޓްރީއަށް ބޭނުންވާ އިކުއިޕްމަންޓްތައް މިހާރުވަނީ ގަނެ ފުވައްމުލަކަށް ސަޕްލައި ކޮށް ނިންމާފައެވެ. އަދި ލެބޯޓްރީއަށް ބޭނުންވާ މުވައްޒަފުން އައްޔަންކޮށް ތަމްރީން ކުރުމަށް ވާންޖެހޭ އެންމެހާ ތައްޔާރީތައްވެސް ވަނީ ވެވިފައެވެ. ދަނޑުވެރިކަމުގެ ޤައުމީ ލެބޯޓަރީއަށް ބޭނުންވާ އާލާތްތައް ހޯދާފައިވަނީ ޖަޕާން ސަރުކާރުގެ ހިލޭއެހީގައި ޔޫއެންޑީޕީން ކުރިއަށް ގެންދާ "ޕްރޮޖެކްޓް ފޮރ ޑިވެލޮޕިންގ ސަސްޓެއިނަބަލް އިކޮނޮމީ" އިންނެވެ.

މީގެ އިތުރުން، މި ފެސިލިޓީގައި ހިމެނޭ އެހެން ލެބޯޓްރީތަކަށް ބޭނުންވާ އާލާތްތައް ހޯދާފައިވަނީ އިންޓަނޭޝަނަލް ފަންޑް ފޮރ އެގްރިކަލްޗަރ ޑިވެލޮޕްމަންޓްގެ އެހީގައި ކުރިއަށް ގެންދާ "މޯލްޑިވްސް އެގްރި ބިޒްނަސް ޕްރޮގްރާމް" އިން ކަމަށް ދަނޑުވެރިކަމާބެހޭ ވުޒާރާއިން މަޢުލޫމާތު ދެއްވިއެވެ. މި ދެ ޕްރޮގްރާމްގެ އެހީގައި ދަނޑުވެރިކަމުގެ ޤައުމީ ލެބޯޓަރީއާއި އެހެނިހެން ލެބޯޓަރީތަކަށް ބޭނުންވާ އާލާތްތައް ހޯދުމަށް މަގުފަހިވެފައިވާކަން ފާހަގަކުރެވެއެވެ. މިއީ ރާއްޖޭގެ ދަނޑުވެރިކަމުގެ ދާއިރާ ތަރައްޤީކޮށް، އެ ދާއިރާއިން ލިބޭ އާމްދަނީ އިތުރުކުރުމަށް އެޅޭ މުހިންމު ފިޔަވަޅެކެވެ.