ބޭންކް އޮފް މޯލްޑިވްސް (ބީއެމްއެލް) އާ ގުޅޭގޮތުން ހަގީގަތާ ހިލާފު ދޮގު މައުލޫމާތު ފެތުރުމަކީ މުޅި ގައުމުގެ އިގުތިސާދަށް އޭގެ ނޭދެވޭ އަސަރުކޮށް، ބޮޑެތި ގެއްލުންތަކެއް ލިބޭނެ ކަމެއް ކަމަށް އެ ބޭންކުގެ ސީއީއޯ މުހައްމަދު ޝަރީފް ވިދާޅުވެއްޖެ އެވެ.

މިއަދު ބޭއްވި "ޔޫތު އޮންޓްރަޕްރިނަރސް އެކްސްޕޯ" ހުޅުވުމުގެ ރަސްމިއްޔާތުގައި ވާހަކަދައްކަވަމުން ސީއީއޯ ޝަރީފު ވިދާޅުވީ، ހަބަރު ފަތުރާ ވަސީލަތްތަކާއި ސޯޝަލް މީޑިއާ މެދުވެރިކޮށް ބައެއް ފަރާތްތަކުން ބޭންކާ މެދު ސައްހަ ނޫން މައުލޫމާތު ފަތުރަމުންދާ ކަމަށެވެ. އެގޮތުން ބީއެމްއެލްގައި ޑޮލަރު ނެތް ކަމަށާއި، ބޭންކު ޕްރޮފެޝަނަލްކޮށް ނުހިންގާ ކަމަށާއި، އަދި ކޮންޓްރެކްޓަރުންނަށް ލޯނު ދޫކޮށްގެން ނުވާނެ ކަމަށް ބުނެ ފެތުރި ވާހަކަތަކަށް ޝަރީފް ރައްދު ދެއްވި އެވެ.

ޝަރީފް ވިދާޅުވީ މިފަދަ ދޮގު ވާހަކަތައް ދައްކައިގެން ބޭންކުގައި ޑޮލަރު ނެތް ކަމުގެ ތަސައްވުރެއް އުފެއްދުމުގެ އަސްލު ބޭނުމަކީ ކަޅުބާޒާރުގައި ޑޮލަރުގެ އަގު މަތިކުރުން ކަމަށެވެ. ބީއެމްއެލް އަކީ ދިވެހިރާއްޖޭގެ އިގުތިސާދާ ނުހަނު ބޮޑަށް ލާމެހިފައިވާ ބޭންކެއް ކަމުން، ބޭންކާ މެދު ނުރަނގަޅު ތަސައްވުރެއް އުފެއްދުމުން ދިވެހި އިގުތިސާދަށް ފޫނުބެދޭ ފަދަ ބޮޑެތި ގެއްލުންތަކެއް ލިބިދާނެ ކަމަށް ވެސް ޝަރީފް ފާހަގަކުރެއްވި އެވެ.

"ކޮންމެ މަގުސަދެއްގައި ކަމުގައި ވީ ނަމަވެސް މި ބޭންކާ މެދު ހަގީގަތާ ހިލާފު މައުލޫމާތު ނުފެތުރުމަށް އަޅުގަނޑު އެދެން،" ޝަރީފް ވިދާޅުވި އެވެ.

މިއަދުގެ މި ރަސްމިއްޔާތުގައި ބީއެމްއެލްއިން ވަނީ ރާއްޖޭގެ ހަތް ރަށެއްގައި އެ ބޭންކުގެ އާ ބްރާންޗުތައް ހުޅުވައިފަ އެވެ. މީގެ އިތުރުން ޒުވާން ވިޔަފާރިވެރިން ބިނާކުރުމަށްޓަކައި އާ ފައިނޭންސިން ފެސިލިޓީއެއް ތައާރަފްކޮށް، ޒުވާނުންނަށް އިތުރު ފުރުސަތުތައް ހޯދައިދިނުމުގެ ގޮތުން ޑިޖިޓަލް ވޮލެޓް 'ސުވައިޕް' މެދުވެރިކޮށް ބޭރުން ފައިސާ ގެނެވޭނެ ހިދުމަތް ވެސް ވަނީ ރަސްމީކޮށް އިފްތިތާހުކޮށްފަ އެވެ.