މާލޭގެ އަމާންކަން ގާއިމުކުރުމަށާއި ކުށްކުރާ ގްރޫޕުތަކުން ބޭނުންކުރާ “ކެފޭ” ފަދަ ތަންތަން ނައްތާލުމަށް ފުލުހުން ފަށާފައިވާ ހާއްސަ މަސައްކަތްތަކުގެ ތެރެއިން، ފާއިތުވި ދެ މަސްދުވަހުގެ ތެރޭގައި މާލޭގެ 5 ތަނެއް ނުވަތަ މަސްތުވާތަކެތީގެ ވިޔަފާރިކުރުމަށް ކެފޭ އުސޫލުން ހުންގާ 5 އައްޑާ އެއް ކޯޓު އަމުރެއްގެ ދަށުން ބަންދުކޮށްފިއެވެ.
މޯލްޑިވްސް ޕޮލިސް ސަރވިސްއިން ހާމަކޮށްފައިވާ ގޮތުގައި، މިއަހަރުގެ މެއި މަހުން ފެށިގެން މިހާތަނަށް ބަންދުކުރި މި 5 ތަނަކީވެސް މަސްތުވާތަކެއްޗާއި ނޭދެވޭ އެކިއެކި ޖިނާއީ ހަރަކާތްތަކަށް މަގުފަހިވާ ގޮތަށް ހިންގަމުންދިޔަ ތަންތަނެވެ.
ކޯޓުން އަމުރުކޮށްފައިވަނީ މިތަންތަން 3 މަސްދުވަހުގެ މުއްދަތަކަށް ބަންދުކުރުމަށެވެ. ފުލުހުންގެ ބެލުމުގެ ދަށަށް ފުރަތަމަ ގެނެސްފައިވަނީ މެއި 6 އިން އޮގަސްޓު 3 ގެ ނިޔަލަށް ބަންދުކުރި ހ.ގުންޒަރެވެ. އޭގެ ފަހުން މެއި 22 އިން އޮގަސްޓު 22 އަށް މ. ތަރިވިލާގެ ބަންދުކޮށްފައިވާއިރު، ޖޫން މަހުގެ 1 ވަނަ ދުވަހުން ފެށިގެން ސެޕްޓެންބަރު 1 ގެ ނިޔަލަށް ބަންދުކޮށްފައިވަނީ މ. އަމީރާމަންޒިލްގެ ބައެކެވެ.
Advertisement
މީގެ އިތުރުން ޖޫން 11 އިން ސެޕްޓެންބަރު 9 އަށް މއ. ސެވަން އެންޑް ހައުސް ބަންދުކޮށްފައިވާއިރު، އެންމެ ފަހުން ބަންދުކުރި ތަނަކީ ޖޫން 25 އިން ސެޕްޓެންބަރު 24 އަށް ކޯޓު އަމުރު ނެރުނު ހ. ކަނޑުފިނިގެ އެވެ. މިގޭގެ ބަންދުކޮށްފައިވަނީ ފުރަތަމަ ފަންގިފިލާގައި ހުރި އެއް ކޮޓަރިއެވެ.
ފުލުހުން ވިދާޅުވި ގޮތުގައި މިފަދަ ތަންތަން ބަންދުކުރުމުގެ މައިގަނޑު ބޭނުމަކީ މާލެތެރޭގައި ހިންގާ ނޭދެވޭ އަމަލުތައް ހުއްޓުވައި، އާންމުންގެ ސަލާމަތާއި ރައްކާތެރިކަން ކަށަވަރުކުރުމެވެ.
މި ފަސް ތަނަކީވެސް ގާނޫނާ ހިލާފު ކަންކަން ކުރުމަށް ބޭނުންކުރަމުންދިޔަ ތަންތަން ކަމަށް ތަހުގީގަށް ފާހަގަކުރެވިގެން ބަންދުކުރި ތަންތަނެވެ.
ކުށްކުރާ އައްޑާތައް ދެނެގަނެ، އެތަންތަނާ މެދު ގާނޫނީ ފިޔަވަޅު އެޅުމުގެ މަސައްކަތް ކުރިއަށް އޮތް ތަނުގައިވެސް ހުއްޓުމެއްނެތި ކުރިއަށްދާނެ ކަމަށް ފުލުހުންގެ އިދާރާއިން މައުލޫމާތުދެއެވެ.
