ދައުލަތުގެ މާލީ ހާލަތު ރަނގަޅުކުރުމަށާއި ތިމާވެށީގެ މަޝްރޫއުތަކަށް ފައިސާ ހޯދުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ގެންގުޅުއްވާ އިގްތިސާދީ ސިޔާސަތުގެ ދަށުން، ގްރީން ޓެކްސް (ތިމާވެށީގެ ޓެކްސް) ގެ ގޮތުގައި ދައުލަތަށް ލިބުނު އާމްދަނީ ރެކޯޑު މިންވަރަކަށް އިތުރުވެއްޖެއެވެ. ސަރުކާރުން ގެނައި އިސްލާހާއެކު، 1 ޖެނުއަރީ 2025 އިން ފެށިގެން ރިސޯޓުތަކާއި ސަފާރީތަކުން މީހަކަށް ދުވާލަކަށް ނަގާ ގްރީން ޓެކްސް 6 ޑޮލަރުން 12 ޑޮލަރަށް ވަނީ ބޮޑުކޮށްފައެވެ. އަދި މީހުން ދިރިއުޅޭ ރަށްރަށުގެ ގެސްޓްހައުސްތަކުން ނަގާ ބޭރު ފައިސާގެ ރޭޓު 3 ޑޮލަރުން 6 ޑޮލަރަށް ދެގުނަ ކުރުމަކީ މި ރެކޯޑު އާމްދަނީ ހާސިލުވުމުގެ މައިގަނޑު އަސާސެވެ.
މި ސިޔާސަތުގެ ކާމިޔާބީ ހެކިކޮށްދޭ ރަސްމީ ތަފާސްހިސާބުތަކަށް ބަލާއިރު، މި ބަދަލާއެކު ފުރަތަމަ ހަ މަސްދުވަހުގެ ތެރޭގައި އެކަނިވެސް ދައުލަތަށް ވަނީ ބޮޑު ފައިދާއެއް ލިބިފައެވެ. ފިނޭންސް މިނިސްޓްރީގެ ރަސްމީ ރިޕޯޓުތަކުން ދައްކާގޮތުގައި، މޯލްޑިވްސް އިންލޭންޑު ރެވެނިއު އޮތޯރިޓީ، މީރާއިން ނެރެފައިވާ ޖޫން މަހުގެ އާމްދަނީ ރިޕޯޓުގައިވާ ގޮތުން މިއަހަރުގެ ފުރަތަމަ 6 މަސް ދުވަހުގެ ތެރޭގައި ދައުލަތަށް ގްރީން ޓެކްސް އާމްދަނީގެ ގޮތުގައި 1.2 ބިލިޔަން ރުފިޔާ ވަނީ ލިބިފައެވެ. މިދިޔަ އަހަރުގެ މި މުއްދަތުގައި ލިބިފައިވަނީ، 1.1 ބިލިޔަން ރުފިޔާއެވެ. އެހެންކަމުން މިއީ %8.2 އިތުރުވުމެކެވެ.
2024 ވަނަ އަހަރުގެ މޭ މަހުގެ މެދާ ހަމައަށް ގްރީން ޓެކްސްގެ ގޮތުގައި ލިބިފައިވަނީ 435.8 މިލިއަން ރުފިޔާއެވެ. މިއީ ރާއްޖޭގެ ތާރީޚުގައިވެސް މިހާ ކުރު މުއްދަތެއްގެ ތެރޭގައި ގްރީން ޓެކްސް އިން މިހާ ފުޅާދާއިރާއެއްގައި އާމްދަނީ އިތުރުވި ފުރަތަމަ ފަހަރެވެ.
Advertisement
މި ރެކޯޑު އަދަދަށް ފައިސާ އިތުރުވުމުގެ ފަހަތުގައި ވަނީ ހަމައެކަނި ޓެކްސް ރޭޓު ބޮޑުކުރުމެއް ނޫނެވެ. އޭގެ އިތުރުން، ރާއްޖޭގެ ފަތުރުވެރިކަން ކުރިއެރުވުމަށް ސަރުކާރުން ކުރި މަސައްކަތުން ފަތުރުވެރިން އައި އަދަދާއި އެމީހުން ރާއްޖޭގައި ހޭދަކުރި ރޭތަކުގެ އަދަދު (ބެޑް-ނައިޓްސް) މަތިވުމެވެ.
ރައީސް ޑރ. މުއިއްޒުގެ އިގްތިސާދީ އިސްލާހީ ފިޔަވަޅުތަކުގެ ސަބަބުން ދައުލަތުގެ މާލިއްޔާއަށް މިވަނީ ބޭރު ފައިސާގެ ބޮޑު ދިރުމެއް ލިބިފައެވެ. ގްރީން ޓެކުހުން ލިބޭ މި ރެކޯޑު ފައިސާ ސަރުކާރުން ހޭދަކުރަމުންދަނީ ރަށްރަށުގެ ފެނާއި ނަރުދަމާގެ ނިޒާމުތައް ގާއިމުކުރުމަށާއި، ގޮނޑުދޮށް ހިމާޔަތްކުރުމުގެ މަޝްރޫއުތަކަށެވެ. މީގެ އިތުރުން، އިއާދަކުރަނިވި ހަކަތައާއި ކުނި މެނޭޖުކުރުމުގެ ދެމެހެއްޓެނިވި ހަރަކާތްތަކަށް މި ފައިސާ ސީދާ ހޭދަކުރަމުންދާތީ، މިއީ ރާއްޖޭގެ ތިމާވެށި ރައްކާތެރިކުރުމަށް ލިބުނު ބޮޑު ކުރިއެރުމެކެވެ.
