ފީފާ ވޯލްޑް ކަޕްގެ ފޯރިގަދަ ސެމީ ފައިނަލެއްގައި ޔޫރަޕްގެ ދެ ބާރު ކަމަށްވާ ފްރާންސާއި ސްޕެއިން ބައްދަލުކުރާ ގޮތަށް ހަމަޖެހިއްޖެއެވެ.

މި މެޗު ކުޅުމަށް ހަމަޖެހިފައިވަނީ ފްރާންސްގެ ގައުމީ ދުވަސް ނުވަތަ ބާސްޓީލް ޑޭއާ ދިމާކޮށް، ޖުލައި މަހުގެ 14 ވާ އަންގާރަ ދުވަހުއެވެ. އެމެރިކާގެ އާލިންގްޓަންގައި ހުންނަ އޭޓީ އެންޑް ޓީ ސްޓޭޑިއަމްގައި ކުޅޭ މި މެޗު ފެށުމަށް ހަމަޖެހިފައިވަނީ ސީއީޓީ ގަޑިން ރޭގަނޑު 9:00 ގައެވެ.

ސްޕެއިން މުބާރާތުގެ ސެމީއަށް ދަތުރުކުރީ މިރޭ ބެލްޖިއަމްއާ ވާދަކޮށް 1-2 ގެ ނަތީޖާއިން ކުރި ހޯދައިގެންނެވެ. މި މެޗުގެ ފުރަތަމަ ހާފު 1-1 އިން އެއްވަރުވެގެން ނިމުނުއިރު ސްޕެއިން އަށް ފުރަތަމަ ގޯލު ކާމިޔާބުކޮށްދިނީ ފަބިއަން ރުއިޒެވެ. ބެލްޖިއަމްގެ ގޯލު ކާމިޔާބުކުރީ ކެޓެލެއާއެވެ.

މި މެޗުގައި ދުނިޔޭގެ އެންމެ މޮޅު އެއް ގޯލު ކީޕަރު، ބެލްޖިއަމްގެ ކޯޓުއާ ވަނީ ލިބުނު އަނިޔާއަކާ ގުޅިގެން ބަދަލުކޮށްފައެވެ. ނަތީޖާއެއްގެ ގޮތުން މެޗު ނިމެން ދަނިކޮށް އޭގެ މާ ގިނައިރުތަކެއް ނުވަނީސް ކުބާސީ ފޮނުވާލި ނުރައްކާތެރި ހަމަލާއެއް ކީޕަރު މަތަ ކުރި ނަމަވެސް ކުޅުމުގެ ތެރެއަށް އައުމުން މެރީނޯ ވަނޯ ގޯލަށް ވައްދާލާ ސްޕެއިން ސެމީއަށް ގެންގޮސްދީފައެވެ. ގަދަ 16 ގައި ޕޯޗުގަލް މައްޗަށް ކުރި ހޯދައި ސްޕެއިން ކުއާޓާ އަށް ވެސް ގެންގޮސްދިނީ މެރީނޯ ފަހު ވަގުތު ޖެހި ގޯލުންނެވެ.

ފްރާންސް މުބާރާތުގެ ސެމީ ފައިނަލުން ޖާގަ ހޯދީ ކުއާޓާ ފައިނަލުގައި މޮރޮކޯގެ މައްޗަށް 2-0 ގެ ނަތީޖާއަކުން ކުރި ހޯދައިގެންނެވެ.

މިއީ ޖެހިޖެހިގެން ބޮޑު ތިން މުބާރާތެއްގެ ސެމީ ފައިނަލުގައި މި ދެ ގައުމު ބައްދަލުކުރާ ފަހަރެވެ. 2024 ވަނަ އަހަރުގެ ޔޫރޯ މުބާރާތުގެ ސެމީގައި ވެސް މި ދެ ޓީމު ބައްދަލުކުރިއިރު، އެ މެޗު ސްޕެއިން ކާމިޔާބުކުރީ 2-1 އިންނެވެ. އެ މެޗުގައި ފްރާންސްގެ ރަންޑަލް ކޯލޯ މުއާނީ ފުރަތަމަ ލަނޑު ޖަހާފައިވަނިކޮށް، ލަމީން ޔަމާލް އާއި ޑެނީ އޮލްމޯ ވަނީ ލަނޑު ޖަހައި ސްޕެއިން މޮޅުކޮށްދީފައެވެ. މީގެ އިތުރުން، އެންމެ ފަހުން މި ދެ ގައުމު ބައްދަލުކުރި ޔޫއެފާ ނޭޝަންސް ލީގުގެ މެޗު 5-4 ގެ ނަތީޖާއަކުން ކާމިޔާބުކުރީ ވެސް ސްޕެއިންއެވެ.