މިހާރު ކުރިއަށްދާ ފީފާ ވޯލްޑް ކަޕް 2026ގެ ފޯރިގަދަވެފައި ވަނިކޮށް، އާޖެންޓީނާގެ ފުޓުބޯޅައިގެ މައި އިދާރާ (އޭއެފްއޭ) އިން އެމެރިކާގައި ހިންގާފައިވާ މާލީ މުއާމަލާތްތަކަކާ ގުޅޭ ސީރިއަސް މައްސަލައެއް އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަން (އެފްބީއައި) އިން ތަހުގީގު ކުރަން ފަށައިފި އެވެ.
ބޭރުގެ ބޮޑެތި މީޑިއާތަކުން ރިޕޯޓުކޮށްފައިވާ ގޮތުގައި، އެފްބީއައި އިން ބަލަމުންދަނީ ފާއިތުވީ ދުވަސްތަކުގެ ތެރޭގައި އާޖެންޓީނާގެ އެފްއޭ އިން އެމެރިކާގެ ބޭންކިން ނިޒާމުގެ ތެރޭގައި 300 މިލިއަން ޑޮލަރު ދައުރުކޮށްފައިވާ ގޮތެވެ. މި ފައިސާ ދައުރުކުރުމަށްޓަކައި އެ ގައުމުގެ ފަސް މާލީ އިދާރާއެއްގައި އޭއެފްއޭ އިން އެކައުންޓުތައް ހުޅުވާފައިވާ ކަމަށް މީޑިއާ ރިޕޯޓުތަކުން ހާމަވެ އެވެ.
މި ތަހުގީގުގެ މައިގަނޑު ބޭނުމަކީ، އޭއެފްއޭ އިން މި ފައިސާ ދައުރުކުރުމުގައި އެމެރިކާގެ މާލީ ގާނޫނުތަކާ ހިލާފު އެއްވެސް އަމަލެއް ހިންގާފައިވޭތޯ ބެލުމެވެ. މީގެ ތެރޭގައި މަކަރާއި ހީލަތް ހެދުމުގެ ކުށާއި، މަނީ ލޯންޑަރިންގެ އެއްވެސް ހަރަކާތެއް ހިންގާފައިވޭތޯ އެފްބީއައި އިން ދަނީ ވަރަށް ގާތުން ބަލަމުންނެވެ.
Advertisement
ރިޕޯޓުތައް ބުނާގޮތުގައި، އޭއެފްއޭގެ ބައިނަލްއަގުވާމީ ކޮމާޝަލް ކޮންޓްރެކްޓުތައް ބަލަހައްޓާ ކުންފުނިން ވަނީ ސިޓިބެންކް، ސިނޯވަސް، ބެންކް އޮފް އެމެރިކާ، ޖޭޕީ މޯގަން އަދި ޕީއެންސީ ބޭންކް މެދުވެރިކޮށް 250 މިލިއަން ޑޮލަރު ދައުރުކޮށްފަ އެވެ. ނަމަވެސް މީގެ ތެރެއިން ސައްހަކަން ކަށަވަރު ކުރެވިފައިވަނީ ގާތްގަނޑަކަށް ދެބައިކުޅަ އެއްބައި މުއާމަލާތުގެ އެވެ. މީގެ އިތުރުން ދައުރުކުރި 57 މިލިއަން ޑޮލަރުގެ އަސްލާއި އެ ފައިސާ ދައުރުކުރި ކުންފުނިތަކުގެ ސައްހަކަން މިހާތަނަށް ކަށަވަރު ކުރެވިފައި ނުވާ ކަމަށް ރިޕޯޓުތައް ބުންޏެވެ.
މި މައްސަލައިގެ ވާހަކަ މިހާރު ގަދައަށް ދެކެވެމުން މިދަނީ ވޯލްޑް ކަޕުގައި މިސްރާ ދެކޮޅަށް އާޖެންޓީނާ ކުޅުނު މެޗަށް ފަހު ކަމުގައިވީ ނަމަވެސް، މި މައްސަލައިގެ ތަހުގީގު އެންމެ ފުރަތަމަ ފަށާފައިވަނީ 2025 ވަނަ އަހަރުގެ ތެރޭގަ އެވެ. އެމެރިކާގެ ތިން ފެޑެރަލް ޕްރޮސެކިއުޓަރުން މިހާރު ގެންދަވަނީ މިއީ މާލީ ބޮޑު ކުށެއްގެ ގޮތުގައި ބަލައި ތަހުގީގު ކުރަމުންނެވެ.
އާޖެންޓީނާގެ ފުޓުބޯޅަ ފެޑެރޭޝަނާ ގުޅޭގޮތުން މިފަދަ ތަހުގީގެއް ހިނގަމުންދާއިރު، މީގެ ކުރިން 2022 ވަނަ އަހަރުގެ ވޯލްޑް ކަޕުގައާއި މިފަހަރުގެ މުބާރާތުގައި ވެސް ފީފާއިން އާޖެންޓީނާއަށް ނުހައްގު ފުރުސަތުތަކެއް ދޭ ކަމުގެ ތުހުމަތުތަކެއް ކުރެވުނެވެ. ނަމަވެސް އެފަދަ އެއްވެސް ކަމެއް މިހާތަނަށް ސާބިތުވެފައެއް ނުވެ އެވެ.
