ފީފާ ވޯލްޑް ކަޕްގެ ގަދަ 16 ގެ މެޗުތައް ކުރިއަށްދާއިރު، މިސްރާއި އާޖެންޓީނާ ބައްދަލުކުރި މެޗު އާޖެންޓީނާއިން ކާމިޔާބުކޮށް ކުއާޓާ ފައިނަލަށް ދަތުރުކޮށްފިއެވެ. ނަމަވެސް، މި މެޗު ނިމިގެންދިޔައީ ރެފްރީގެ އިންސާފެއްނެތް ނިންމުންތަކާއި ފީފާގެ މެނިޕިއުލޭޝަންގެ ތުހުމަތުތަކާ އެކުގައެވެ.

އެމެރިކާގެ އެޓްލާންޓާގައި ކުޅުނު މި ފޯރިގަދަ މެޗުގައި، މިސްރުގެ ޓީމުން މޮޅު ކުޅުމެއް ދައްކާފައިވަނިކޮށް، ރެފްރީގެ ފަރާތުން ފެނިގެންދިޔައީ އާޖެންޓީނާއަށް ބުރަވެފައިވާ ނިންމުންތަކެކެވެ. މެޗުގެ ތެރޭގައި މިސްރަށް ލިބެންޖެހޭ ދެ ޕެނަލްޓީއެއް ރެފްރީ ދީފައިނުވާއިރު، ވީއޭއާރު އިންވެސް އެކަމަށް އެދެވޭ އިޝާރާތެއް ކޮށްފައެއް ނުވެއެވެ. މީގެ އިތުރުން، މިސްރުން ޖެހި މުހިންމު ލަނޑެއްވެސް ރެފްރީ ވަނީ ބާތިލްކޮށްފައެވެ.

މި މައްސަލައިގެ އެންމެ ހޫނު ބަހުސަކަށް ވެފައިވަނީ، މިސްރުގެ ކުޅުންތެރިން ފަލަސްތީނުގެ ރައްޔިތުންނަށް ހަމްދަރުދީ ފާޅުކޮށް، އެކަމަށް ސަޕޯޓްކުރާތީ ފީފާއިން އެ ގައުމަށް ދަތިކުރުމުގެ ގޮތުން ނިންމި ނިންމުންތަކެއް ކަމަށް ބުނެ ކުރެވޭ ތުހުމަތެވެ. މިސްރުގެ ސަޕޯޓަރުންނާއި މީޑިއާތަކުން ބުނާ ގޮތުގައި، ދަނޑުމަތީގައި މިސްރުގެ ކުޅުންތެރިން ދެއްކި ހިތްވަރަށްވުރެ ބޮޑަށް، ފީފާގެ ނުފޫޒާއި ރެފްރީ ފްރާންސްގެ ފްރާންސުއާ ލެޓެކްސިއޭގެ ނިންމުންތައް އާޖެންޓީނާ މޮޅުކޮށްދިނުމުގައި މުހިންމު ދައުރެއް އަދާކުރިއެވެ.

މެޗަށްފަހު މިސްރުގެ ކޯޗާއި ކުޅުންތެރިން ވަނީ ނޫސްވެރިންގެ ކުރިމަތީގައި ނުރުހުން ފާޅުކޮށްފައެވެ. އެފަރާތްތަކުން ތުހުމަތުކުރާ ގޮތުގައި މިއީ ލިއޮނަލް މެސީއާއި އާޖެންޓީނާގެ ޓީމު މުބާރާތުގައި ކުރިއަށް ގެންދިއުމަށްޓަކައި ރޭވިގެން ހިންގި ކަމެކެވެ. ސޯޝަލް މީޑިއާގައި ގިނަ ބަޔަކު ދަނީ މިއީ "ވޯލްޑް ކަޕްގެ ތާރީހުގައި ފެނުނު އެންމެ ބޮޑު ބޭއިންސާފު" ކަމަށް ބުނަމުންނެވެ.

މި މެޗުން މޮޅުވުމާއެކު އާޖެންޓީނާ ކުއާޓާ ފައިނަލަށް ދަތުރުކުރި ނަމަވެސް، މިސްރުގެ ޓީމު މުބާރާތުން ވަކިވާން ޖެހުނީ ބޮޑު ބޭއިންސާފެއްގެ އިހުސާސާ އެކުގައެވެ.

މިސްރުން މެޗުގެ ކުރީކޮޅު ލީޑު ނަގައި، އާޖެންޓީނާ ސިއްސުވާލި ނަމަވެސް، ދުނިޔޭގެ ޗެމްޕިއަނުން ވަނީ ފަހަތުން އަރައި ތިން ލަނޑު ޖަހައިގެން މެޗު ކާމިޔާބުކޮށްފައެވެ. މި މޮޅާއެކު އާޖެންޓީނާ ވަނީ ވޯލްޑްކަޕްގެ ތާރީހުގައި އާ ރެކޯޑެއްވެސް ގާއިމުކޮށްފައެވެ.

މި މެޗުގައި އާޖެންޓީނާގެ ކެޕްޓަން ލިއޮނަލް މެސީ ވަނީ ފުޓްބޯޅަ ތާރީހުގައި އޭނާ ބޭނުންނުވާނެ ފަދަ ތަފާތު ރެކޯޑެއް ހަދާފައެވެ. މެޗުގެ ފުރަތަމަ ހާފުގައި އާޖެންޓީނާއަށް ލިބުނު ޕެނަލްޓީއެއް މެސީ ފޮނުވާލުމުން، މިސްރުގެ ގޯލްކީޕަރު މުސްތަފާ ޝުބޭރު ވަނީ އެ ބޯޅަ ހުޝިޔާރުކަމާއެކު ދިފާއުކޮށްފައެވެ. މިއީ މި ފަހަރުގެ ވޯލްޑްކަޕްގައި މެސީ އަތުން މިސްވި ދެވަނަ ޕެނަލްޓީއެވެ. މިއާއެކު އޭނާ ވެގެން ގޮސްފައިވަނީ ވޯލްޑްކަޕެއްގެ އެއް އެޑިޝަނެއްގައި ދެ ޕެނަލްޓީ މިސްކުރި ފުރަތަމަ ކުޅުންތެރިޔާއަށެވެ.

މެޗުގެ ފުރަތަމަ ލަނޑު ޖަހައި ކުރިހޯދީ މުޅި މެޗުގައިވެސް މޮޅު ކުޅުމެއް ދެއްކި މިސްރުންނެވެ. މެޗުގެ 15 ވަނަ މިނެޓުގައި ޔާސިރު އިބްރާހީމް ބޮލުން ޖެހި ލަނޑާއެކު މިސްރުން ލީޑު ނެގިއިރު، މިއީ މި ފަހަރުގެ މުބާރާތުގައި އާޖެންޓީނާ ކޮޅަށް ލަނޑެއް ވަދެ، އެޓީމު ފަހަތަށް ޖެހެންޖެހުނު ފުރަތަމަ ފަހަރެވެ. އޭގެ ފަހުން ދެވަނަ ހާފުގައި މިސްރުގެ ޒީކޯ ލަނޑެއް ޖަހައި ލީޑު ފުޅާކޮށްދިނުމުން، އާޖެންޓީނާ މުބާރާތުން ކެޓުމުގެ ބިރު ބޮޑުވިއެވެ.

ނަމަވެސް، މެޗުގެ ފަހު 20 މިނެޓުގެ ތެރޭގައި އާޖެންޓީނާއިން ވަނީ ހައިރާންކުރުވަނިވި ކަމްބެކެއް ހަދާފައެވެ. އެގޮތުން ކްރިސްޓިއަން ރޮމޭރޯ އެޓީމުގެ ފުރަތަމަ ލަނޑު ޖަހައި އުންމީދު އާކޮށްދިންއިރު، އޭގެ ކުޑަވަގުތުކޮޅެއް ފަހުން މެސީ ވަނީ ހިތްގައިމު ލަނޑެއް ޖަހައި ނަތީޖާ 2-2 އަށް ބަދަލުކޮށްފައެވެ. އަދި މެޗުގެ އިތުރު ވަގުތުގެ ތެރޭގައި އެންޒޯ ފެނާންޑޭޒް ޖަހައިދިން ތާރީހީ ލަނޑާއެކު އާޖެންޓީނާއިން މެޗުގެ ފުރިހަމަ ކާމިޔާބީ ކަށަވަރުކުރިއެވެ.

މި މޮޅާއެކު އާޖެންޓީނާ ވަނީ ވޯލްޑްކަޕް ތާރީހުގައި އެއް މުބާރާތެއްގެ ތެރޭގައި އެފްރިކާގެ ތިން ގައުމެއް (އަލްޖީރިއާ، ކޭޕް ވާޑޭ އަދި މިސްރު) ބަލިކުރި ފުރަތަމަ ޓީމުގެ ރެކޯޑު ހަދާފައެވެ. ޕެނަލްޓީ ނާކާމިޔާބުވި ނަމަވެސް މެސީ ވަނީ ވޯލްޑްކަޕްގެ ޖެހިޖެހިގެން 9 މެޗުގައި ލަނޑު ޖެހުމުގެ ރެކޯޑު ދަމަހައްޓައި، މުބާރާތުގެ ރަން ބޫޓުގެ ރޭހުގެ ކުރީގައި މަގާމު ވަރުގަދަ ކޮށްފައެވެ. ރެފްރީގެ އެހީތެރިކަމާއެކު މިއަދުގެ މެޗުން ބަލިވި ނަމަވެސް، މިސްރުން ދެއްކި ހިތްވަރުގަދަ ކުޅުމަށް ގިނަ ބައެއްގެ ތައުރީފުވަނީ ލިބިފައެވެ.