ފަލަސްތީނުގެ ރައްޔިތުންނަށް ކުރިމަތިވެފައިވާ އިންސާނީ ކާރިސީ ހާލަތުން އަރައިގަތުމަށް އެހީވުމުގެ ގޮތުން، މިއަހަރުވެސް 50,000 ޑޮލަރު (ގާތްގަނޑަކަށް 7.7 ލައްކަ ރުފިޔާ) އެހީގެ ގޮތުގައި ދިނުމަށް ދިވެހި ސަރުކާރުން ނިންމައިފި އެވެ.

މި މަހުގެ 1 ވަނަ ދުވަހު އދ. ގެ މައިމަރުކަޒުގައި ބޭއްވި 'އަންރުވާ ޕްލެޖިންގް ކޮންފަރެންސް' ގައި ރާއްޖޭގެ ފަރާތުން މި އެހީ އިއުލާން ކުރެއްވީ، ދިވެހިރާއްޖެއިން އދ. އަށް ކަނޑައަޅުއްވާފައި ހުންނަވާ ދާއިމީ މަންދޫބު ޑރ. އަލީ ނަސީރު މުހައްމަދެވެ.

ފަލަސްތީނުގެ ރެފިއުޖީންނަށް އެހީވުމަށް އުފައްދާފައިވާ 'އަންރުވާ' މެދުވެރިކޮށް ރާއްޖެއިން މީގެ ކުރިން ކޮންމެ އަހަރަކު ދެމުން އައީ 5,000 ޑޮލަރެވެ. ނަމަވެސް، މި ސަރުކާރުން ވަނީ 2024 ވަނަ އަހަރުން ފެށިގެން މި އަދަދު ދިހަ ގުނަ އިތުރުކޮށް، 50,000 ޑޮލަރަށް ބަދަލުކުރައްވާފަ އެވެ.

މި ކޮންފަރެންސްގައި ވާހަކަފުޅު ދައްކަވަމުން ޑރ. އަލީ ނަސީރު ވިދާޅުވީ، އަންރުވާއަށް އެހީ ފޯރުކޮށްދިނުމަކީ ހަމައެކަނި މާލީ ނިންމުމެއް ނޫން ކަމަށާއި، އެއީ އިންސާނީ ކަރާމާތާއި ބައިނަލްއަގުވާމީ ގަވާއިދުތަކުގެ މައްޗަށް ބިނާވެފައިވާ ނިޒާމެއް ހިމާޔަތްކުރުމާ ގުޅުންހުރި ކަމެއް ކަމަށެވެ. މީގެ އިތުރުން، އަންރުވާގެ މަސައްކަތްތަކަށް ހުރަސްއެޅުމަށް ކުރަމުންދާ ދޮގު ތުހުމަތުތައް ފާހަގަކުރައްވައި، އެ އެޖެންސީގެ މަސްއޫލިއްޔަތުތައް އަދާކުރުމަށް ބޭނުންވާ މާލީ އެހީތެރިކަން ފޯރުކޮށްދިނުމަށް ބައިނަލްއަގްވާމީ މުޖުތަމައަށް ރާއްޖެއިން ވަނީ ގޮވާލައްވާފަ އެވެ.

އަންރުވާ އަކީ 1948 ވަނަ އަހަރު އދ. އިން ފާސްކުރި ގަރާރަކުން، ފަލަސްޠީނުގެ ރެފިއުޖީންނަށް އެހީތެރިވުމަށް އުފައްދާފައިވާ ހާއްސަ ގޮފިކެވެ. ރާއްޖެއަކީ އާބާދީގެ ގޮތުން ކުޑަ ގައުމެއް ނަމަވެސް، އިސްރާއީލުން ފަލަސްތީނުގައި ހިންގަމުންދާ ލާއިންސާނީ އަމަލުތައް ކުށްވެރިކޮށް، ފަލަސްތީނުގެ ރައްޔިތުންގެ ހައްގުތައް ކަށަވަރުކުރުމަށް ބައިނަލްއަގުވާމީ އެކި މައިދާންތަކުގައި އެންމެ ބާރަށް އަޑުއުފުލަމުންދާ އެއް ގައުމެވެ.