މީގެ ކުރީގެ ސަރުކާރުތަކާ ހިލާފަށް، މި ސަރުކާރުން ފަށާ ހައުސިން މަޝްރޫއުތައް މި ދައުރުގެ ތެރޭގައި ނިންމައި، އެ ތަންތަނަށް ހައްގުވެރިން ވައްދާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވައިފިއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް ވިދާޅުވީ، މީގެ ކުރިން ވެރިކަމުގެ ދައުރެއްގެ ތެރޭގައި ހައުސިން މަޝްރޫއެއް ނިންމައި މީހުން ވެއްދިފައި ނުވާ ކަމަށާއި، އެކަން ބަދަލުކުރުމަކީ މި ސަރުކާރުގެ އަމާޒެއް ކަމަށެވެ. އެމަނިކުފާނު ވިދާޅުވި ގޮތުގައި 2028 ވަނަ އަހަރުގެ މެދަކާ ހަމައަށް ދާއިރު، ހައުސިން މަޝްރޫއުތަކުގެ ވަރަށް ބޮޑު އިންސައްތައެއް ނިމޭނެއެވެ.
"އަޅުގަނޑުމެން މި މަސައްކަތް ކުރަނީ މި ސަރުކާރުން މީގެ ކުރިން ނުވެ އޮތް ކަމެއް ކުރަން. އެއީ މީގެ ކުރިން، އެއްވެސް ސަރުކާރަކަށް ސަރުކާރުގެ ދައުރުގެ ތެރޭގައި ހައުސިން ޕްރޮޖެކްޓްތައް ނިންމައި، އެ ފްލެޓްތަކަށް ނޫނީ އެ ހައުސިން ޔުނިޓްތަކަށް މީހުން ވެއްދިފައެއް ނެތް. މި ބަލަނީ އެކަން ބަދަލު ކުރެވޭތޯ،"
ރައީސް ޑރ. މުހައްމަދު މުއިއްޒު
މި މަސައްކަތްތަކުގެ ތަފްސީލު ދެއްވަމުން ރައީސް ވިދާޅުވީ ބޭންކް އޮފް މޯލްޑިވްސް (ބީއެމްއެލް) މެދުވެރިކޮށް ފައިނޭންސް ހަމަޖެހިފައިވާ ރާއްޖޭގެ 13 ރަށެއްގެ ހައުސިން މަޝްރޫއުތަކުގެ އެޑްވާންސް ޕޭމަންޓް މިހާރު ދައްކާފައިވާ ކަމަށެވެ. އަދި މާލެ ސަރަހައްދުގައި ކުރިއަށްދާ މަޝްރޫއުތަކުގެ ސީދާ އަމަލީ މަސައްކަތް ނުވަތަ ފައުންޑޭޝަން ކޮންކްރީޓް އެޅުމުގެ މަސައްކަތް އަންނަ ޖުލައި މަހު ފެށޭނެ ކަމަށްވެސް ރައީސް ވިދާޅުވިއެވެ.
Advertisement
މީގެ އިތުރުން ރައީސް ފާހަގަކުރެއްވި ކަންކަން:
- ހުއްޓިފައިވާ މަޝްރޫއުތައް: ކުރީ ސަރުކާރުން ފަށައި ހުއްޓިފައި ހުރި ގިނަ މަޝްރޫއުތައް މިހާރު ވަނީ އަލުން ފަށާފައެވެ.
- ބޭރުގެ އެހީތެރިކަން: ހައުސިން މަޝްރޫއުތައް ހިންގުމަށް އިންޑިއާ އާއި ޗައިނާއާ އެކު ދަނީ ވާހަކަދެކެވެމުންނެވެ.
- ރަސްމާލެ މަޝްރޫއު: ރަސްމާލެއިން ގޯތި ލިބޭ ފަރާތްތަކަށް މި ދައުރުގައި ގޯތިދީ، އެތަން އާބާދުކުރުމުގެ މަސައްކަތް ކުރިއަށްދާނެއެވެ.
- ފައިނޭންޝަލް މޮޑެލް: އާ ފައިނޭންޝަލް މޮޑެލްތަކާއި އެފޯޑަބަލް ހައުސިން ލޯން ސްކީމްތައް މެދުވެރިކޮށް ރައްޔިތުންނަށް ލުއި ގޮތްތަކެއް ހަމަޖައްސައިދެވޭނެއެވެ.
ރައީސް އިތުރަށް ވިދާޅުވީ ހައުސިން ޓްރަސްޓް ފަންޑު ބޮޑުކޮށް، އަންނަ އަހަރުގެ ބަޖެޓުގެ ތެރެއިން "އިކުއިޓީ ފައިނޭންސް" ދޭނެ ގޮތްތަކެއް ރާވަމުންދާ ކަމަށެވެ. މީގެ ސަބަބުން އަމިއްލަ ގޯތީގައި އިމާރާތް އެޅުމަށް ބޭންކުތަކުން ލޯނު ހޯދުމުގައި ރައްޔިތުންނަށް ބޮޑެތި ފަސޭހަތަކެއް ލިބިގެންދާނެ ކަމަށް އެމަނިކުފާނު ވިދާޅުވިއެވެ.
ހައުސިންގެ މައްސަލައަކީ މި ސަރުކާރުން އެންމެ ބޮޑު އިސްކަމެއްދޭ ސިޔާސަތު ކަމަށް ވިދާޅުވެ، ރައީސް ވަނީ ބައެއް ރަށްރަށުގެ ހައުސިން ޔުނިޓްތަކުގެ މަސައްކަތް އަންނަ އަހަރުގެ ފަހުކޮޅަށް ނިންމާލެވޭނެ ކަމުގެ އުންމީދުވެސް ދެއްވާފައެވެ.
