"މޯލްޑިވްސް 2.0" ގެ ދަށުން ރާއްޖެ ޑިޖިޓަލް ކުރުމަށް ކުރާ މަސައްކަތުގެ ތެރެއިން ވޯޓުލާ ގޮތަށް އެއްވެސް ބަދަލެއް ނުގެންނާނެ ކަމަށާއި، އިލެކްޓްރޯނިކް ވޯޓިން ނުވަތަ އީ-ވޯޓިން ތައާރަފްކުރުމުގެ އެއްވެސް ވިސްނުމެއް ސަރުކާރުން ނުގެންގުޅޭ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ސިލްސިލާ ޕޮޑްކާސްޓް "ނޭޝަން ޗެޓް" ގެ ދެވަނަ އެޕިސޯޑްގައި ވާހަކަފުޅު ދައްކަވަމުން ރައީސް ވިދާޅުވީ، ސަރުކާރުން މަޖިލީހަށް ހުށަހަޅާފައިވާ "މޯލްޑިވްސް 2.0 ޑިޖިޓަލް ޓްރާންސްފޮމޭޝަން" ބިލަކީ އީ-ވޯޓިން ތައާރަފްކޮށް ވޯޓުން ވައްކަންކުރަން ކުރާ ކަމެއް ކަމަށް އިދިކޮޅު އެމްޑީޕީން ކުރާ ތުހުމަތުތަކަކީ އެއްވެސް ހަގީގަތެއް ނެތް ދޮގު ވާހަކަތަކެއް ކަމަށެވެ.

"ވޯޓުލުން ޑިޖިޓަލް ކުރާކަަށް ނޫން މިއުޅެނީ އިނގޭތޯ. އިދިކޮޅު ފަރާތްތަކަށް ނެތް މިހާރު ރައްޔިތުންނަށް ވިއްކާނެ އެއްވެސް ސިޔާސަތެއް، އެހެންވީމަ މި އޮންނަނީ ދޮގު ހެދުން،"

ރައީސް ޑރ. މުހައްމަދު މުއިއްޒު

ކޮރަޕްޝަން ހުއްޓުވުމަށްޓަކައި އެންމެ މުހިންމު ކަމަކީ ހިދުމަތްތައް ދިނުމުގައި އިންސާނުންގެ ބައިވެރިވުން ކުޑަކުރުންކަން ފާހަގަކުރައްވަމުން، މި މަޝްރޫއުގެ ސަބަބުން ސަރުކާރު އިތުރަށް "ސްމާޓް" ވެ، ހިދުމަތްތައް ހަލުވިވެ، ދެފުށް ފެންނަ ނިޒާމެއް ގާއިމުވާނެ ކަމަށް ރައީސް ވިދާޅުވިއެވެ.

މި މަޝްރޫއުގެ އަމާޒުތަކުގެ ތެރޭގައި:

1. 2030 އާ ހަމައަށް ދާއިރު ގައުމީ އުފެއްދުންތެރިކަމުގެ 15 އިންސައްތައަކީ ޑިޖިޓަލް އިގްތިސާދަށް ބަރޯސާވާ މިންވަރަކަށް ހެދުން.
2. ފިޒިކަލް ކިއުތަކުގެ ބަދަލުގައި މަދު ކްލިކްތަކަކުން ހިދުމަތް ލިބޭނެ ގޮތް ހެދުން.
3. ވަކިވަކި ރަށްތަކެއްގެ ގޮތުގައި އޮތް އޮތުން ބަދަލުކޮށް، ގުޅިފައިވާ ވިއުގައަކުން ހިދުމަތް ދިނުން.
4. ހިދުމަތް ލިބުން ލަސްވާ ލަސްވުމަށް ހައްލެއް ހޯދައި، ނަތީޖާ ނެރުމަށް އިސްކަންދިނުން.

ރައީސް ވިދާޅުވި ގޮތުގައި މި ސަރުކާރުން ކޮރަޕްޝަނަށް އެއްވެސް ޖާގައެއް ނުދޭނެއެވެ. އަދި ކޮރަޕްޝަން ނައްތާލުމަކީ ހަމައެކަނި ސަރުކާރުން އަޅާ ފިޔަވަޅުތަކުން ކުރެވޭނެ ކަމެއް ނޫން ކަމަށާއި، އެކަމުގައި އަމިއްލަ ފަރާތްތަކުގެ އެއްބާރުލުންވެސް ބޭނުންވާނެ ކަމަށް އެމަނިކުފާނު ވިދާޅުވިއެވެ. "މޯލްޑިވްސް 2.0" އަކީ މުޅި ދައުލަތުގެ މުއައްސަސާތައް ގުޅިގެން ރާއްޖެއަށް އިންގީލާބީ ބަދަލެއް ގެނައުމަށް އިފްތިތާހުކުރި މުހިންމު ޕްރޮގްރާމެކެވެ.