މަސްތުވާތަކެތީގެ ބޭނުންކުރުމާއި އޭގެ ޣައިރުޤާނޫނީ ވިޔަފާރިއާ ދެކޮޅަށް، މިހާރަށްވުރެ ވަރުގަދައަށް ފިޔަވަޅުއެޅުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ގޮވާލައްވައިފިއެވެ. ރައީސުލްޖުމްހޫރިއްޔާ މިފަދައިން ގޮވާލެއްވީ، މަސްތުވާތަކެތީގެ ބޭނުންކުރުމާއި އޭގެ އައިރުގާނޫނީ ވިޔަފާރިއާ ދެކޮޅަށް ބައިނަލްއަގުވާމީ ފެންވަރުގައި ފާހަގަކުރާ ދުވަހާ ގުޅިގެން ފޮނުއްވި މެސެޖެއްގައެވެ.

ރައީސުލްޖުމްހޫރިއްޔާގެ މެސެޖުގައި، މަސްތުވާތަކެއްޗަކީ މުޅި މުޖުތަމައުގެ ބަދަހިކަމަށް އަސަރުކުރުވާ، އިޖުތިމާއީ، އިގްތިސާދީ، އަހްލާގީ އަދި ގައުމީ ސަލާމަތަށް އޮތް ބޮޑު ގޮންޖެހުމެއްގެ ގޮތުގައި ސިފަކުރެއްވިއެވެ. އެމަނިކުފާނު ވިދާޅުވީ، މިއަހަރުގެ ބައިނަލްއަގުވާމީ ޝިއާރު ކަމުގައިވާ "ދުނިޔޭގެ މަސްތުވާތަކެތީގެ މައްސަލަ: ދެމިއޮތް ކަންބޮޑުވުންތައް، އާ ގޮންޖެހުންތައް، އާ އީޖާދީ ހައްލުތައް" މި ޝިއާރުގެ ދަށުން މަސައްކަތް ކުރުމުގައި ދިވެހިރާއްޖެ އޮތީ ބައިނަލްއަގުވާމީ މުޖުތަމައާއެކު ކަމަށެވެ. އަދި މި މައްސަލައަށް ދާއިމީ ހައްލެއް ހޯދުމަކީ ގައުމުގެ މުސްތަގްބަލާއި ޒުވާނުންގެ ހިމާޔަތަށްޓަކައި ކޮންމެހެން ކުރަންޖެހޭ ކަމެއްކަން އެމަނިކުފާނު ފާހަގަކުރެއްވިއެވެ.

މަސްތުވާތަކެތީގެ ވަބާގައި ޖެހިފައިވާ ފަރާތްތަކަށް ފަރުވާދިނުމުގެ ނިޒާމު ހަރުދަނާކުރުމަށް ސަރުކާރުން ކުރަމުންދާ މަސައްކަތްތަކަށް އަލިއަޅުއްވާލައްވަމުން، ރައީސް ހާމަކުރެއްވި ގޮތުގައި މިއަހަރުގެ ފަހުކޮޅު ރާއްޖޭގެ ތިން ސަރަހައްދެއްގައި މުޅިން އަލަށް ރިހެބިލިޓޭޝަން ސެންޓަރުތަކެއް ހުޅުވޭނެއެވެ. މިއީ ވަށާޖެހޭ ފުރިހަމަ ހިދުމަތްތަކާއެކު، މަސްތުވާތަކެތިން ސަލާމަތްވާ މީހުން އަލުން މުޖުތަމައަށް ނެރުމަށް މަގުފަހިކުރުމަށް ކުރެވޭ މުހިންމު މަސައްކަތެކެވެ.

މީގެއިތުރުން، މަސްތުވާތަކެތީގެ ވިޔަފާރިކުރާ ނެޓްވޯކްތައް ރޫޅާލުމަށްޓަކައި ޤާނޫނީ އޮނިގަނޑަށް ގެނެވުނު އިސްލާހުތަކުގެ ސަބަބުން، ކަމާގުޅުންހުރި މުއައްސަސާތަކުގެ މެދުގައި އޮންނަ ގުޅުން މިހާރު ވަނީ ކުރިއަށްވުރެ ވަރުގަދަވެފައެވެ. މި ބަދަލުތަކާއެކު، ކުށްވެރިން ޖަވާބުދާރީކުރުވުމާއި އިޖުރާއީ ހާމަކަން އިތުރުވެފައިވާކަން ރައީސް ފާހަގަކުރެއްވިއެވެ.

އަލަށް އުފެދެމުންދާ ނުރައްކާތަކާއި، އާ ސައިކޯއެކްޓިވް މާއްދާތަކުގެ އިތުރުން، މަސްތުވާތަކެތީގެ ވިޔަފާރީގައި ބޭނުންކުރާ އާ އުކުޅުތަކާ ދެކޮޅަށް މަސައްކަތް ކުރުމުގައި، ސަރަހައްދީ އަދި ބައިނަލްއަގްވާމީ ބައިވެރިންނާއެކު ރާއްޖެއިން އޮންނަ ގުޅުން ދަމަހައްޓާނެކަމުގެ ޔަގީންކަންވެސް އެމަނިކުފާނު ދެއްވިއެވެ.

ރައީސްގެ މެސެޖު ނިންމަވާލެއްވީ، މަސްތުވާތަކެތިން ސަލާމަތްވެފައިވާ މުޖުތަމައެއް ބިނާކުރުމަށްޓަކައި އާއިލާތަކާއި، މަދަނީ ޖަމްއިއްޔާތަކާއި، ޕްރައިވެޓް ސެކްޓަރ ގުޅިގެން މަސައްކަތް ކުރުމަށް އިލްތިމާސް ކުރައްވަމުންނެވެ. އަދި އެކަކު އަނެކަކަށް އަޅާލާ، އޯގާތެރި މުޖުތަމައެއްގެ ތެރެއިން ފަރުދުންނަށް އަމިއްލަ ނަފްސަށް ފައިދާހުރި ގޮތްތައް އިޚްތިޔާރުކުރުމުގެ ބާރުވެރިކަން ދީގެން، ވަރުގަދަ ގައުމެއް ބިނާކުރެވޭނެ ކަމަށް އެމަނިކުފާނު ވިދާޅުވިއެވެ.