ކ. ގުރައިދޫގައި ހުންނަ ޚާއްސަ އެހީއަށް ބޭނުންވާ މީހުންގެ މަރުކަޒު ހެލްތު މިނިސްޓްރީގެ ދަށަށް ބަދަލުކޮށްފިއެވެ.
މީގެ ކުރިން އެ މަރުކަޒު ހިންގަމުން އައިސްފައިވަނީ ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީގެ ދަށުންނެވެ. އެ މިނިސްޓްރީން ވަނީ ވޭތުވެދިޔަ 9 މަސް ދުވަހުގެ ތެރޭގައި އެތަނުގެ ޚިދުމަތްތަތަކަށް ހެޔޮ ބަދަލުތަކެއް ގެނެސްފައެވެ.
މި މަރުކަޒު ހެލްތު މިނިސްޓްރީގެ ދަށަށް ބަދަލުކުރުމުގެ އެންމެ ބޮޑު ބޭނުމަކީ އެ މަރުކަޒަކީ މީހުން ބައިތިއްބާ ތަނެއްގެ ބަދަލުގައި މީހުންނަށް ބޭނުންވާ ފަރުވާ ދިނުމާއި، ޢާއިލާއާ ގުޅުވައިދީ އާއްމު ދިރިއުޅުމެއް އުޅެވޭނެ ފުރުޞަތު ފަހިކޮށްދޭ ތަނަކަށް ހެދުން ކަމަށް ސަރުކާރުން ބުންޏެވެ.
Advertisement
ވޭތުވެދިޔަ 9 މަސް ދުވަހުގެ ތެރޭގައި އެތަނަށް ގެނެސްފައިވާ އެންމެ ބޮޑު ހެޔޮ ބަދަލެއްގެ ގޮތުގައި ފާހަގަކުރެވެނީ އެތަނަކީ ދާއިމީކޮށް މީހުން ބައިތިއްބާ ތަނެއްގެ ބަދަލުގައި ވަގުތީ ހިޔާވައްސެއްގެ ގޮތުގައި ހަމަޖައްސާ، އެތަނުގައި ފަރުވާދީ އަނބުރާ މުޖުތަމަޢަށް މީހުން ނެރުމުގެ އަމާޒަށް ޕްރޮގްރާމްތައް ފެށުމެވެ. ފަރުވާގެ ނިޒާމަށް ގެނައި ބަދަލުތަކާއެކު އެ މަރުކަޒުން ފަރުވާ ފުރިހަމަކުރި 19 މީހުން މިހާރު ވަނީ އަނބުރާ ޢާއިލާއާ ގުޅުވައިދީފައެވެ.
މި މަރުކަޒުގެ މަސައްކަތް ހެލްތު މިނިސްޓްރީގެ ދަށަށް ބަދަލުކުރުމާއެކު، މަރުކަޒު ހިންގުމަށް ކަނޑައަޅާފައިވާ ބަޖެޓާއި މަރުކަޒުގެ މަސައްކަތްތަކާ ޙަވާލުވެ ތިބި މުވައްޒަފުން އެ މިނިސްޓްރީގެ ދަށަށް ބަދަލުކުރުމަށް ވަނީ ނިންމާފައެވެ.
ގުރައިދޫގައި ޤާއިމްކޮށްފައިވާ ޚާއްސަ އެހީއަށް ބޭނުންވާ މީހުންގެ މަރުކަޒުގައި މިވަގުތު 219 މީހުން އެބަތިބިއެވެ. އޭގެ ތެރެއިން 31 މީހުންނަކީ 65 އަހަރުން މަތީގެ މީހުންނެވެ.
