ހަގީގީ ތައުލީމީ މީހަކު ތަފާތު ވަނީ ވަރުގަދަ އަޚްލާޤީ އަގުތަކުން ކަމަށް ވިދާޅުވެ، މުސްލިމުން ތަޢުލީމު ޙާޞިލު ކުރަނީ ހަމައެކަނި އަމިއްލަ ކާމިޔާބީ އަށް ނޫން ކަމަށާއި ދީނާއި އާއިލާ އާއި ޤައުމަށް ޚިދުމަތް ކުރުމަށް ކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވެއްޖެއެވެ.

އެކަމަނާ މިހެން ވިދާޅުވީ މިއާންޒް ކޮލެޖަށް 20 އަހަރު ފުރުން ފާހަގަ ކުރުމަށް ބޭއްވި ހަފްލާ ޝަރަފްވެރި ކޮށްދެއްވައި ވާހަކަފުޅު ދައްކަވަމުންނެވެ.

އެކަމަނާ ވިދާޅުވީ މުސްލިމުން ޢިލްމު ހޯދަނީ އެމީހުންގެ ދީނާއި ވަޒަނާއި އާއިލާ އަދި އަމިއްލަ ނަފްސަށް ފައިދާ އާއި އުފާވެރިކަން ގެނައުމަށް ކަމަށެވެ. ނަތީޖާއެއްގެ ގޮތުން ތައުލީމާއި އެކު ރަނގަޅު އަޚްލާޤާއި، އިޙްތިރާމާއި، ޒިންމާދާރު ކަން އެކުލެވިގެންވާން ޖެހޭ ކަމަށް ފާހަގަ ކުރެއްވިއެވެ.

ދީނީ ވާޖިބު ތަކަށް ސަމާލުކަން ދިނުމާއި، އެހެން މީހުންނާއި މެދު އިޙްތިރާމާއި އެކު ކަންތައް ކުރުމާއި، ވަގުތަށް ކަމޭހިތުމާއި، ގަދައަޅައި މަސައްކަތް ކުރުމާއި، މެދުނުކެނޑި އާ ޢިލްމު ހޯދުމުގެ މުހިންމުކަން ފާހަގަ ކުރެއްވިއެވެ. އަދި އަބަދުވެސް މުޖުތަމައުގެ މަސްލަހަތަށް އިސްކަންދީގެން އާއިލާ އާއި ގައުމާއި ދުނިޔެ އާއި މެދު ފުންކޮށް ވިސްނުމަށް ހިތްވަރު ދެއްވި އެވެ.