ގައުމު ހަލަބޮލިކޮށްލައި، ގައުމުގެ އަމާންކަން ނަގައިލުމަށް ކުރެވެން ހުރި ހުރިހާ މަސައްކަތެއް ކުރުމަށް ތިމަންނާ އެދޭ ކަމަށް ދޭހަވާ ގޮތަކަށް އެމްޑީޕީގެ ޗެއާޕާސަން، ގ.ކެނެރީގޭ މުހައްމަދު ނަޝީދު އޭނާގެ ޕާޓީގެ މީހުންގެ ކިބައިން އެދިއްޖެއެވެ.

އެމްޑީޕީގެ ޗެއާޕާސަން މިހެން އެދުނީ އެޕާޓީގެ ގައުމީ މަޖިލީހުގެ މެންބަރުންނާއި މިރޭ ބައްދަލުކޮށް ގަރާރު ފާސްކޮށް ވާހަކަ ދައްކަމުންނެވެ. މިއީ އޭނާއަށް މިފަހަރު ޗެއާޕާސަންކަން ލިބިގެން ބޭއްވި އެ މަޖިލީހުގެ ފުރަތަމަ ބައްދަލުވުމެވެ.

އެ ޕާޓީގެ ގައުމީ މަޖިލީހުން ނެރުނު ގަރާރުގައި ހިތްވަރު ދިނީ ހިޔާލު ފާޅުކުރުމުގެ ނަމުގައި އެމްޑީޕީގެ މެންބަރުން ނުކުމެ މުޒާހަރާ ކުރުމަށެވެ.

މާލޭގެ ހަމަޖެހުން ނަގައިލުމަށްޓަކައި، ނަޝީދު އެދުނީ ބުރާސްފަތި ދުވަހަށް އެމީހަކަށް ވެވުނު މިންވަރަކުން ވީހާވެސް ގިނަ ބަޔަކު މުޒާހަރާއަށް މަގުތަކަށް ނުކުތުމަށެވެ.