އިދިކޮޅު އެމްޑީޕީގެ ވޭތުވެދިޔަ ދެ ސަރުކާރުގެ ސިޔާސަތުތަކަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަރަށް ބޮޑަށް ފާޑުވިދާޅުވެއްޖެއެވެ. ކައުންސިލް އިންތިހާބުގައި ދ. މީދޫ އިން ޕީއެންސީ ހޯދި ކާމިޔާބީ ފާހަގަކުރުމަށް ބޭއްވި ޖަލްސާގައި ރައީސް ވިދާޅުވީ، އެމްޑީޕީގެ ދެ ސަރުކާރުން ވެސް ފެނިގެންދިޔައީ އިސްލާމްދީނާ ދުރު ސިޔާސަތުތަކެއް ކަމަށެވެ.
ރައީސް ވިދާޅުވި ގޮތުގައި، އެމްޑީޕީގެ ފުރަތަމަ ސަރުކާރުގައި ގެންގުޅުނީ ދީނީ އިލްމުވެރިން ދައްކަވާ ވާހަކަފުޅުތަކުގެ ބަދަލުގައި "އަލްޓަނޭޓިވް ނެރޭޓިވް" ނުވަތަ އިތުރު ގޮތްތަކެއް ހޯދުމުގެ ސިޔާސަތެކެވެ. އެއީ ކީރިތި ގުރުއާނާއި ސުންނަތުގައި އޮތް ސާފު މަގު ދޫކޮށް، އެއަށްވުރެ "މޮޅު ގޮތްތަކެއް" ހޯދަން އުޅުމުގެ ސިޔާސަތެއް ކަމަށް ރައީސް ތުހުމަތު ކުރެއްވިއެވެ.
މީގެ އިތުރުން، އެމްޑީޕީގެ ދެވަނަ ސަރުކާރަށް ފާޑުވިދާޅުވަމުން ރައީސް ވިދާޅުވީ، އެ ފަސް އަހަރު ފެނިގެންދިޔައީ "އެމްޑީއެން" ރިޕޯޓުގެ ސިޔާސަތު ކަމަށެވެ. އަދި އެއީ ދިވެހިންގެ މުގައްދަސް އަގީދާއަށް ފުރައްސާރަކޮށް، އެ ފުރައްސާރަކުރި މީހުންނަށް ރައްޔިތުންގެ ފައިސާއިން މުސާރަދީގެން ބޭތިއްބި ސަރުކާރެއް ކަމަށާއި، އެއީ ބަދަލުނުކުރެވޭނެ ހަގީގަތެއް ކަމަށް އެމަނިކުފާނު ވިދާޅުވިއެވެ.
Advertisement
މި ސަރުކާރުގެ ސިޔާސަތުތަކާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ، މި ސަރުކާރުގެ އެންމެ އިސް އަމާޒަކީ އިސްލާމްދީނަށް ނަސްރުދިނުން ކަމަށެވެ. އަދި ގައުމުގެ ކަންކަން ތަރުތީބު ކުރަމުންދަނީ އެންމެ ތުއްތު ކުއްޖާއިން ފެށިގެން ހުރިހާ ރައްޔިތުންގެ ހިތްތަކުގައި ދީނީ ލޯބި އިތުރުކުރެވޭނެ ގޮތަށް ކަމަށް ވިދާޅުވިއެވެ.
މީގެ ކުރިން މަސްތުވާތަކެއްޗާއި ވޭޕް ފަދަ ނުރައްކާތެރި ވަބާތައް އާންމުކުރުމުގެ ސިޔާސަތުތަކެއް ފެނިގެންދިޔަ ނަމަވެސް، މި ސަރުކާރުން އެކަންކަމާ ދެކޮޅަށް ހަރުދަނާ ފިޔަވަޅުތަކެއް އަޅަމުންދާ ކަމަށް ރައީސް ވިދާޅުވިއެވެ. މިގޮތުން ޒުވާނުން މަގުމަތީގައި އުންމީދު ގެއްލިފައި ތިބި ތިބުން ނިމުމަކަށް ގެނައުމަށް "ނެޝަނަލް ސާވިސް ޕްރޮގްރާމް" ފަށާފައިވާ ކަމަށާއި، މިހާރު ބެޗަކަށް ފަހު ބެޗެއް ތަމްރީނުވެގެން ގައުމީ ހިދުމަތަށް ނިކުންނަމުންދާކަން އެމަނިކުފާނު ފާހަގަކުރެއްވިއެވެ.
ރައީސް ވިދާޅުވީ، ރައްޔިތުން އިހްތިޔާރު ކުރަންވީ ކާމިޔާބީގެ ރާސްތާތޯ ނޫނީ ގެއްލުމާއި ހަލާކުގެ ރާސްތާތޯ ނިންމަން ޖެހޭ ކަމަށެވެ. އަދި ޕީއެންސީއަކީ ގައުމު ބިނާކުރުމުގެ ފިކުރުކަން ތަކުރާރު ކުރައްވައި، އިދިކޮޅު ފަރާތްތަކުގެ ދީނާ ދުރު ސިޔާސަތުތަކަށް ރައްޔިތުން ސަމާލުވުމަށް އެމަނިކުފާނު ގޮވާލެއްވިއެވެ.
