ފުރަތަމަ މެޗުގައި ފަސް ތަރީގެ ބްރެޒިލަށް ޖެހުނީ ޕޮއިންޓަކުން ފުއްދާލަން

ފީފާ ވޯލްޑް ކަޕް 2026 ގެ ގްރޫޕް ސީ ގައި ދުނިޔޭގެ ފަސް ފަހަރުގެ ޗެމްޕިއަން ބްރެޒިލާއި، އެފްރިކާގެ ވަރުގަދަ ބާރެއް ކަމަށްވާ މޮރޮކޯ ބައްދަލުކުރި ފޯރިގަދަ މެޗު 1-1 އިން އެއްވަރުވެގެން ނިމިއްޖެއެވެ.

މެޗު ފެށިގެން މޮރޮކޯއިން ވަނީ އެޓޭކިން އަދި ނުރައްކާތެރި ކުޅުމެއް ކުޅެފައެވެ. ނަތީޖާއެއްގެ ގޮތުން މެޗުގެ 21 ވަނަ މިނެޓުގައި ބްރަހީމް ޑިއާޒް ތަނަވަސްކޮށްދިން ފުރުސަތަކުން އިސްމާއީލް ސައިބާރީ ވަނީ ހިތްގައިމު ގޯލެއް ކާމިޔާބުކޮށް، މޮރޮކޯއަށް ކުރިހޯދައިދީފައެވެ. މި ގޯލާއެކު ބްރެޒިލްގެ ޑިފެންސްލައިނުގެ ބަލިކަށިކަން ހާމަވެގެންދިޔައެވެ.

ނަމަވެސް، ބްރެޒިލުން ވަނީ މާގިނަ އިރުތަކެއް ނުވަނީސް މެޗުގެ ނަތީޖާ ހަމަހަމަކޮށްފައެވެ. މެޗުގެ 32 ވަނަ މިނެޓުގައި ބްރޫނޯ ގިމަރޭޒް ދިން ރީތި ޕާހަކުން، ބްރެޒިލްގެ ތަރި ވިނީޝިއަސް ޖޫނިއަރ ވަނީ މޮރޮކޯގެ ޑިފެންޑަރުން ކައިރިން ނައްޓާލުމަށްފަހު، ގޯލުގެ މަތީ ކަނަށް ބޯޅަ ފޮނުވާލައިގެން މޮޅު ގޯލެއް ކާމިޔާބުކޮށްފައެވެ. މިއީ ބްރެޒިލްގެ ގައުމީ ޓީމަށް އޭނާ ކުޅެދިން 50 ވަނަ މެޗުގައި ކާމިޔާބުކުރި 10 ވަނަ ގޯލެވެ.

މެޗުގެ ދެވަނަ ހާފުގައި ކާލޯ އަންޗެލޮޓީގެ ބްރެޒިލުން ބޯޅަ ހިފަހައްޓައިގެން ގިނަ ހަމަލާތަކެއް އުފެއްދުމަށް މަސައްކަތް ކުރިއެވެ.މޮރޮކޯގެ އަޝްރަފް ހަކީމީ އާއި މެދުތެރޭގެ ކުޅުންތެރިން ދެއްކި ހިތްވަރުގަދަ ކުޅުން މި މެޗުގައި ފާހަގަކޮށްލެވުނެވެ.

މި ނަތީޖާއާއެކު ގްރޫޕް ސީ ގައި ހިމެނޭ ބްރެޒިލަށް ވަނީ ބޮޑު ގޮންޖެހުމަކާ ކުރިމަތިލާން ޖެހިފައެވެ. މި ގްރޫޕުގައި ދެން ހިމެނެނީ ހެއިޓީ އާއި ސްކޮޓްލޭންޑެވެ. މޮރޮކޯއިން ދެއްކި މޮޅު ކުޅުމާއެކު، އެޓީމަކީ މި މުބާރާތުގައި ދުރަށް ދާނެ ޓީމެއްކަން އަނެއްކާވެސް ވަނީ ސާބިތުކޮށްދީފައެވެ. ބްރެޒިލުން ދެން އޮތް މެޗުތަކަށް ނުކުންނައިރު، އެޓީމުގެ ނިންމާލުންތަކާއި ޑިފެންސް ރަނގަޅު ކުރަން ޖެހޭކަން މި މެޗުން ވަނީ ފެނިގެން ގޮސްފައެވެ.