ދުނިޔޭގެ ތިމާވެށީގެ ދުވަހުގެ މުނާސަބަތުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވި ހިތާބުގައި، ރާއްޖޭގެ ތިމާވެށި ރައްކާތެރިކޮށް ދެމެހެއްޓުމަށްޓަކައި މޯލްޑިވްސް ގްރީން ފަންޑުން ކޮންމެ އަހަރަކު 7 މިލިއަން ރުފިޔާ ހާއްސަ ކުރުމަށް ނިންމަވައިފިއެވެ.

މި ދުވަހުގެ މުނާސަބަތުގައި ރައީސުލްޖުމްހޫރިއްޔާ ވަނީ ދިވެހި އެންމެހައި ރައްޔިތުންނަށް ދުވަހުގެ ހެޔޮއެދުމާއި ތަހުނިޔާ ފޮނުއްވާފައެވެ. އެމަނިކުފާނު ވިދާޅުވީ، މިއަދަކީ ތިމާވެށީގެ ކަންކަމަށް ސަމާލުކަންދީ، އަންނަން އޮތް ޖީލުތަކަށްޓަކައި ތިމާވެށި ހިމާޔަތްކުރުމުގެ އަޒުމް އާކުރަންޖެހޭ ދުވަހެއް ކަމަށެވެ.

ރައީސުލްޖުމްހޫރިއްޔާގެ ހިތާބުގައި ފާހަގަކުރެއްވި ގޮތުގައި، މޫސުމީ ބަދަލުތަކަށް ހައްލު ހޯދުމުގައި ކުރިމަތިވާ އެންމެ ބޮޑު ގޮންޖެހުމަކީ އެކަށީގެންވާ މާލީ ވަސީލަތްތައް ނެތުމެވެ. އެހެންކަމުން، ގްރީން ފަންޑުން ކަނޑައެޅި މި 7 މިލިއަން ރުފިޔާއަކީ ތިމާވެށީގެ ދާއިރާއަށް މިހާރުވެސް ދައުލަތުގެ ބަޖެޓުން ކުރާ ހޭދައިގެ އިތުރުން ދެވޭނެ އެހީއެއް ކަމަށާއި، މިއީ ތިމާވެށި ހިމާޔަތްކުރުމަށް ސަރުކާރުން ދޭ އިސްކަން ހާމަކޮށްދޭ ކަމެއް ކަމަށް އެމަނިކުފާނު ވިދާޅުވިއެވެ.

މި ފައިސާ ބޭނުންކުރުމަށް ހަމަޖެހިފައިވަނީ ހިމާޔަތްކޮށްފައިވާ ސަރަޙައްދުތަކާއި ދިރުންތައް ބެލެހެއްޓުމަށާއި، ތިމާވެށި ރައްކާތެރިކުރުމުގެ މަޝްރޫޢުތަކަށާއި، ދިރާސާތައް ކުރުމަށެވެ. މީގެ އިތުރުން، އާންމުން ހޭލުންތެރިކުރުވުމުގެ ޕްރޮގްރާމްތަކާއި، ފަންނީ ގާބިލުކަން އިތުރުކުރުމުގެ އިތުރުން، މަދަނީ ޖަމިއްޔާތަކާއި ސްކޫލްތަކުން ހިންގާ ތިމާވެށީގެ މަޝްރޫއުތަކަށްވެސް މި ފަންޑުން އެހީތެރިކަން ފޯރުކޮށްދެވޭނެއެވެ.

ރައީސް އިތުރަށް ވިދާޅުވީ، މިއަހަރުގެ ތިމާވެށީގެ ދުވަހުގެ ޝިއާރު ކަމަށްވާ "މޫސުމީ ހަރަކާތްތަކަށް ބައިނަލްއަގުވާމީ ގޮވައިލުން" މިއީ ރާއްޖެ ފަދަ ކުދި ޖަޒީރާ ގައުމުތަކަށް ކުރިމަތިވެފައިވާ ގޮންޖެހުންތަކާ ވަރަށް ބޮޑަށް ގުޅޭ ޝިއާރެއް ކަމަށެވެ. މި ފޯރުކޮށްދެވޭ މާލީ އެހީތެރިކަމުގެ ސަބަބުން ދިގު މުއްދަތުގެ ތިމާވެށީގެ މަޝްރޫއުތައް ރާވައި ހިންގުމަށް މަގުފަހިވެގެންދާނެ ކަމުގެ ޔަގީންކަން އެމަނިކުފާނު ދެއްވިއެވެ.