ކޮލެޖް ދިރިއުޅުމުގެ މައްޗަށް ބިނާކޮށް އުފައްދާފައިވާ "ސޯޕީ" ރޮމޭންސް ސީރީޒް "އޮފް ކެމްޕަސް" އަށް ބެލުންތެރިންގެ ފަރާތުން ލިބެމުންދާ ބޮޑު ތަރުހީބާއެކު، މި ސީރީޒްގެ ދެވަނަ ސީޒަނެއް އުފެއްދުމުގެ މަސައްކަތް މިހާރު ވަނީ ފަށާފަ އެވެ.

އެލް ކެނެޑީގެ މަޝްހޫރު ފޮތް ސީރީޒްގެ މައްޗަށް ބިނާކޮށް ޕްރައިމް ވީޑިއޯއިން ގެނެސްދޭ މި ސީރީޒަކީ އެ ޕްލެޓްފޯމުގައި މިހާތަނަށް އެންމެ ގިނަ ބަޔަކު ބެލި ތިންވަނަ ސީރީޒެވެ. ފުރަތަމަ ދެ ހަފުތާގެ ތެރޭގައި އެކަނިވެސް 36 މިލިއަން މީހުން މި ސީރީޒް ބަލާފައިވާއިރު، މިއީ ގިނަ ބަޔަކު އުންމީދުކުރި ވަރަށްވުރެ ބޮޑު ކާމިޔާބީއެކެވެ.

މި ސީރީޒަށް މިހާ ބޮޑު މަގުބޫލުކަމެއް ލިބެނީ މީގައި ފެންނަ ހިތްގައިމު މާހައުލާއި، ކުޅިވަރު ކުޅުންތެރިންގެ ދިރިއުޅުމާއި، ލޯބީގެ ގުޅުންތަކުގެ ސަބަބުންނެވެ. ބިރުވެރި ނުވަތަ ނުރައްކާތެރި ކަންތައްތަކެއް ނުފެނުނު ކަމުގައިވިޔަސް، ކޮންމެ ކެރެކްޓަރަކަށް ދިމާވާ ހުރަސްތަކުން އަރައިގަނެ، އެންމެ ފަހުން ހުރިހާ ކަމެއް ރަނގަޅުވާނެކަމުގެ ޔަގީންކަން ބެލުންތެރިންނަށް އޮތުމަކީ މި ސީރީޒްގެ ހާއްސަ ސިފައެކެވެ.

އެމެޒޯންއިން މި ސީރީޒްގެ ކާމިޔާބީ ކުރިންވެސް އަންދާޒާކޮށްފައިވާތީ، ފުރަތަމަ ސީޒަން ރިލީޒްކުރުމުގެ އެތައް މަހެއް ކުރިން، މިދިޔަ ފެބްރުއަރީ މަހު ވަނީ ދެވަނަ ސީޒަނަކަށް ސޮއިކޮށްފަ އެވެ.

ފުރަތަމަ ސީޒަނުން ގަރެޓް ގްރަހަމް (ބެލްމަންޓް ކެމެލީ) އާއި ހަނާ ވެލްސް (އެލާ ބްރައިޓް) ގެ ވާހަކަ ފެނިގެންދިޔަ ނަމަވެސް، ދެވަނަ ސީޒަންގައި މައިގަނޑު ގޮތެއްގައި އަލިއަޅުވާލާނީ ތަފާތު ދެ ލޯބިވެރިންގެ ވާހަކައަށެވެ. އެމެޒޯންއިން ހާމަކޮށްފައިވާ ގޮތުގައި، ދެވަނަ ސީޒަންގެ މައިގަނޑު ޖޯޑަކީ ހަނާގެ އެންމެ ގާތް އެކުވެރިޔާ އެލީ (މިކާ އަބްދުﷲ) އާއި ގަރެޓްގެ ރަހުމަތްތެރިޔާ ޑީން (ސްޓީވަން ކަލީން) އެވެ.

ސީރީޒްގެ ލިޔުންތެރިޔާ ލުއީސާ ލެވީ ބުނި ގޮތުގައި، އެލީ އާއި ޑީންގެ ވާހަކަ މައިގަނޑު ވާހަކައަށް ވީނަމަވެސް، ހަނާ އާއި ގަރެޓްވެސް މުހިންމު ބައެއްގެ ގޮތުގައި ސީރީޒުން ފެންނާނެ އެވެ. މީގެ އިތުރުން ލޯގަން (އެންޓޯނިއޯ ސިޕްރިއާނޯ) އާއި ޓަކާ (ޖޭލަން ތޯމަސް ބްރޫކްސް) ވެސް ދެވަނަ ސީޒަނުން ފެންނާނެ އެވެ.

އާ ކާސްޓުންގެ ގޮތުގައި އިންޑިއާ ފައުލާ (ގްރޭސް އައިވަރސްގެ ރޯލުން) އަދި ފިލިޕާ ސޫ މި ސީރީޒާ ގުޅޭނެ އެވެ. ނަމަވެސް، ފުރަތަމަ ސީޒަންގައި ޖަސްޓިންގެ ރޯލުން ފެނުނު ޖޯޝް ހިއުސްޓަން ދެވަނަ ސީޒަނަކުން ނުފެންނާނެ އެވެ.

"އޮފް ކެމްޕަސް" ގެ ދެވަނަ ސީޒަން ރިލީޒްކުރާނެ ރަސްމީ ތާރީހެއް އަދި އިއުލާނުކޮށްފައެއް އަދި ނުވެއެވެ. ނަމަވެސް، މި ޖޫން މަހުގެ 1 ވަނަ ދުވަހު ސީރީޒްގެ ޝޫޓިންގ ވަނީ ފަށާފަ އެވެ. ކުރީގެ ތަޖުރިބާއަށް ބަލާއިރު، ބޮޑަށް ބެލެވެނީ 2027 ވަނަ އަހަރުގެ މޭ މަހު ނުވަތަ އޭގެ ކުރިންވެސް މި ސީރީޒް ބެލުންތެރިންނާ ހަމައަށް އަންނާނެ ކަމަށެވެ.