ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ޕާލިމަންޓްރީ ގްރޫޕުގެ މެންބަރުންނަށް ފައިސާ ބަހާފައިވާ ކަމަށް ބުނެ ފަތުރަމުންދާ ހަބަރުތަކަކީ ދޮގު ޚަބަރުތަކެއް ކަމަށް ބާރަށު ދާއިރާގެ މެންބަރު އިބްރާހިމް ޝުޖާއު ވިދާޅުވެއްޖެ އެވެ.

ޝުޖާއު މިހެން ވިދާޅުވީ "އަދަދު" ނޫހުގައި ޝާއިއުކުރި ހަބަރަކާ ގުޅިގެން، މިއަދު އެކްސްގައި ކުރެއްވި ޕޯސްޓެއްގައެވެ. "އަދަދު" ނޫހުގެ ހަބަރުގައި ބުނެފައިވަނީ ދެ މަހުގެ މެދުކެނޑުމަކަށް ފަހު، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ފަރާތްޕުޅުން މަޖިލީހުގެ ޕީއެންސީ މެންބަރުންނަށް ދޭ 50،000 ރުފިޔާ މި މަހު ދީފައިވާ ކަމަށެވެ.

މިކަމާ ގުޅިގެން ޝުޖާއު ވިދާޅުވީ ޕީއެންސީ ޕާލިމަންޓްރީ ގްރޫޕުގެ މެންބަރުންނަށް ލިބެނީ އެމްޑީޕީ އާއި އެހެނިހެން މެންބަރުންނަށް ވެސް ލިބޭ ގޮތަށް، ރައްޔިތުންގެ މަޖިލީހުން ކަނޑައަޅާފައިވާ މުސާރަ އެކަނި ކަމަށެވެ. އަދި ޕީއެންސީގެ މެންބަރުންނާ ގުޅޭގޮތުން ފަތުރަމުންދާ މިފަދަ ދޮގު ޚަބަރުތައް އެންމެ ހަރުކަށި އިބާރާތުން ކުށްވެރިކުރައްވާ ކަމަށްވެސް އޭނާ ވިދާޅުވި އެވެ.

ޝުޖާއު އިތުރަށް ވިދާޅުވީ، ދޮގު ހަބަރު ފަތުރައިގެންނާއި ފިތުނަ އުފައްދައިގެން ޕީއެންސީގެ ޕާލިމަންޓްރީ ގްރޫޕް ރޫޅާލެވޭނެ ކަމަށް ދެކުމަކީ މޮޔަކަމެއް ކަމަށެވެ. ޕީއެންސީގެ ސުޕަ މެޖޯރިޓީ އޮތް 20 ވަނަ މަޖިލީހުން އަބަދުވެސް މަސައްކަތް ކުރާނީ ޤައުމާއި ރައްޔިތުންގެ ލާބަޔާއި މަންފާއަށް ކުރަންޖެހޭ މުހިއްމު މަސައްކަތްތައް ކުރުމުގައި ކަމަށްވެސް އޭނާ ފާހަގަކުރެއްވި އެވެ.

މީގެ ކުރިން ވެސް އެ ނޫހުން ވަނީ ޕީއެންސީ މެންބަރުންނަށް ފައިސާ ބަހާ ކަމުގެ ތުހުމަތުތަކެއް ކޮށްފަ އެވެ. ނަމަވެސް، ސަރުކާރަށް ނިސްބަތްވާ މެންބަރުން ގެންދަވަނީ މިއީ ސަރުކާރު ބަދުނާމުކޮށް މަޖިލިސް މެންބަރުންގެ އަގު ވައްޓާލުމަށް ކުރާ ކަމެއް ކަމަށް ބުނެ އެ ތުހުމަތުތައް ތަކުރާރުކޮށް ދޮގުކުރަމުންނެވެ.