އިސްރާއީލުން ޣައްޒާގައި ހިންގަމުންދާ ލާއިންސާނީ ގަތުލުއާންމުގެ ތެރޭގައި، މިއަހަރުގެ އަޟްހާ އީދާ ޣައްޒާގެ ރައްޔިތުން ކުރިމަތިލަނީ ނުހަނު ހިތްދަތި ހާލަތެއްގަ އެވެ. އުޟުހިޔާ ކަތިލާނެ ޖަނަވާރެއް ނެތް އިރު، ގިނަ ބަޔަކަށް ވަނީ ހައްޖުގެ މަތިވެރި އަޅުކަމުން މަހްރޫމްވާން ޖެހިފަ އެވެ.

އިސްރާއީލުން ޣައްޒާގެ ބޯޑަރުތައް ބަންދުކޮށް، ދަތުރުފަތުރު ހިފަހައްޓާފައިވުމުގެ ސަބަބުން، ޣައްޒާގެ އެއްވެސް މީހަކަށް ހައްޖަށް ދިއުމުގެ ފުރުސަތެއް މިއަހަރަކު ނުލިބެ އެވެ.

ޣައްޒާގެ ބާޒާރުތަކުން އުޟުހިޔާ ކަތިލާނެ ކަންބަޅި ބަކަރި ނުވަތަ ގެރި ފެންނާކަށް ނެތެވެ. އުތުރު ޣައްޒާގެ ބައިތު ލާހިޔާއިން ރެފިއުޖީ ކެމްޕަކަށް ބަދަލުވި އުމުރުން 43 އަހަރުގެ އިމާދު ސުހްވައިލް ބުނި ގޮތުގައި، ޖަނަވާރުތައް ނެތުމުގެ ސަބަބުން އީދުގެ އުފާވެރިކަން ވަނީ ގެއްލިފަ އެވެ. ކުރިން 400 އާއި 600 ޑޮލަރާ ދެމެދުގެ އަގަކަށް ލިބުނު ކަންބަޅިއެއްގެ އަގު މިހާރު ވަނީ 6,000 ޑޮލަރަށް އުފުލިފަ އެވެ. މިއީ އާންމު އާއިލާތަކަށް އަތްފޯރާ ފަށުގެ އަގުތަކެއް ނޫނެވެ.

ޣައްޒާގެ ޗޭމްބަރ އޮފް ކޮމާސް އެންޑް އިންޑަސްޓްރީން ހާމަކޮށްފައިވާ ގޮތުގައި، އިސްރާއީލުގެ ހަމަލާތަކުގެ ސަބަބުން ޣައްޒާގެ ޕެސްޓޯރަލް ސެކްޓަރުގެ 90 އިންސައްތަ ވަނީ ސުންނާފަތިވެފަ އެވެ. ގިނަ ފާމްތައް ހަލާކުވެ، ދިރިހުރި ޖަނަވާރު އެތެރެކުރުން އިސްރާއީލުން ވަނީ މަނާކޮށްފަ އެވެ.

މިފަދަ ހިތްދަތި ހާލަތެއްގައި ވެސް ޣައްޒާގެ ރައްޔިތުން ތިބީ ކެތްތެރިކަމާއެކުގަ އެވެ. "އަހަރެމެން މިތިބީ ހިސާރުކޮށްފައި. ހައްޖަކަށް ނުދެވޭ، ފަރުވާއެއް ނުލިބޭ، އުޟުހިޔާއެއް ނުކަތިލެވޭ. އެކަމަކުވެސް އަހަރެމެން އުންމީދު ކަނޑައެއް ނުލަން،" 63 އަހަރުގެ ފައުޒީ ހަމްދާން ބުންޏެވެ.

ކާބޯތަކެއްޗާއި ބޭހާއި ތެލުން މަހްރޫމްވެފައިވާ ޣައްޒާގެ ރައްޔިތުން ދަނީ މި ބޮޑު އީދުގައި ވެސް ހަނގުރާމަ ހުއްޓި، އަމާންކަމާއެކު އަލުން ދިރިއުޅުން އާރާސްތުކުރެވޭނެ ދުވަހަކަށް އުންމީދު ކުރަމުންނެވެ.