ޖޯޑަންގެ މިނިވަން ދުވަހުގެ އުފާވެރި މުނާސަބަތުގައި، އެ ޤައުމުގެ ރަސްގެފާނަށާއި ބޮޑުވަޒީރަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަހުނިޔާ ފޮނުއްވައިފިއެވެ.
ރައީސުލްޖުމްހޫރިއްޔާ މިއަދު އެކްސްގައި ކުރެއްވި ޕޯސްޓެއްގައި ވަނީ، ޖޯޑަންގެ މިނިވަން ދުވަހުގެ މުނާސަބަތުގައި އެ ޤައުމުގެ ރަސްގެފާނު ޢަބްދުﷲ ދެވަނައަށާއި، ބޮޑުވަޒީރު ޖައުފަރު ޙަސަނަށާއި، ޖޯޑަންގެ ސަރުކާރަށް އަދި އަޚުވަންތަ ރައްޔިތުންނަށް ވަރަށް އިޚްލާޞްތެރިކަމާއެކު ތަހުނިޔާ އާއި ހެޔޮއެދުންތައް ފޮނުއްވާފައެވެ.
ރައީސްގެ މެސެޖުގައި، މި އުފާވެރި މުނާސަބަތުގެ ސަބަބުން ޖޯޑަންގެ ރައްޔިތުންގެ މެދުގައި އޮތް އެއްބައިވަންތަކަން އިތުރަށް ވަރުގަދަވެ، އެ ޤައުމަށް ދާއިމީ ހަމަޖެހުމާއި ބޮޑެތި ކާމިޔާބީތައް ލިބުމަށް އެދިވަޑައިގެންފައިވެއެވެ.
މީގެއިތުރުން، ދިވެހިރާއްޖެއާއި ޖޯޑަންއަކީ އިސްލާމީ ދީނުގެ މަތިވެރި އަޞްލުތަކާއި، އެއްގޮތް އުޞޫލުތަކެއްގެ މައްޗަށް ބިނާވެފައިވާ ގާތް ދެ ޤައުމުކަން ރައީސް ފާހަގަކުރެއްވިއެވެ. އަދި ދެ ޤައުމުގެ ދެމެދުގައި އޮތް ގާތް ރަޙުމަތްތެރި ގުޅުމުގެ ސަބަބުން، ކުރިއަށް އޮތް ތަނުގައިވެސް އެއްބަޔަކު އަނެއްބަޔަކަށް އެހީތެރިކަން ފޯރުކޮށްދީ، މަޝްވަރާގެ މަގުން ދެ ޤައުމަށް ފައިދާހުރި ކަންކަމުގައި ގުޅިގެން މަސައްކަތް ކުރައްވާނެ ކަމަށް އުންމީދު ކުރައްވާ ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
ދިވެހިރާއްޖެއާއި ޖޯޑަންއާ ދެމެދު އަބަދުވެސް އޮންނަނީ އިސްލާމީ އުޚުއްވަތްތެރިކަމުގެ މަތިވެރި ގުޅުމެކެވެ.
