ކުރިއަށް އޮތް ދެ މަހެއްހާ ދުވަހުގެ ތެރޭގައި ރާއްޖޭގައި ބޭހުގެ މައްސަލައަށް ވަރަށް ބޮޑު އަދި ހެޔޮ ބަދަލެއް އަންނާނެކަމުގެ ޔަގީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވައިފި އެވެ.
ރައްޔިތުންނާ ގާތުން މުއާމަލާތް ކުރެއްވުމަށް ކުރިއަށްގެންދާ "ނޭޝަން ޗެޓް" ޕްރޮގްރާމްގައި ވާހަކަފުޅުދައްކަވަމުން ރައީސް ވިދާޅުވީ، ބޭހުގެ މައްސަލަ ހައްލުކުރުމަށް ސަރުކާރުން ގިނަ މަސައްކަތްތަކެއް އެއްފަހަރާ ކުރަމުންދާ ކަމަށެވެ. ހާއްސަކޮށް، ދިގުމުއްދަތަކަށް ބޭސް ބޭނުންކުރާ ފަރާތްތަކަށް އެއްވެސް ދަތިކަމެއް ނެތި، ދެމެހެއްޓެނިވި ގޮތެއްގައި ބޭސް ލިބޭނެ އިންތިޒާމު ހަމަޖެއްސުމަށް އިސްކަންދެއްވާ ކަމަށް އެމަނިކުފާނު ފާހަގަކުރެއްވި އެވެ.
"ވަރަށް ބޮޑު ބަދަލެއް އަންނާނެ އިނގޭތޯ. އެކަމަށްޓަކައި އުފެއްދި ސްޓޭޓް ފާމާ ކުންފުނިން މިހާރުވެސް ވަރަށް ގިނަ މަސައްކަތްކޮށްފި. ޖޫން ޖުލައިއާ ހަމައަށް ދާއިރު ވަރަށް ބޮޑުތަނުން ރަނގަޅުވާނެ،" ރައީސް ވިދާޅުވި އެވެ.
Advertisement
ބޭހާއި، މެޑިކަލް ކޮންޒިއުމަބަލްސް އަދި މެޑިކަލް އިކުއިޕްމަންޓްތައް ބޭރުން ގަނޑުކޮށް ގަނެގެން ރާއްޖެ އެތެރެކުރުމުގެ މަސައްކަތް ހަރުދަނާކުރުމަށްޓަކައި، "ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން ލިމިޓެޑް" ގެ ނަމުގައި ސަރުކާރުން ވަނީ މިދިޔަ ސެޕްޓެމްބަރު މަހު ހާއްސަ ކުންފުންޏެއް އުފައްދާފައެވެ. ރައްޔިތުން ބޭސް ހޯދުމުގައި އުފުލަމުންދާ ތަކުލީފުތަކަށް ނިމުމެއް ގެނައުމަށް އުފެއްދި މި ކުންފުނިން ދަނީ ގިނަ މަސައްކަތްތަކެއް ކުރަމުންނެވެ.
އެގޮތުން، އަންނަ ޖުލައި މަހުން ފެށިގެން އެސްޓީއޯގެ ދަށުން ހިންގަމުންދާ ހުރިހާ ބޭސް ފިހާރައެއް ސްޓޭޓް ފާމާގެ ދަށަށް ބަދަލުކުރުމަށް ވަނީ ނިންމާފަ އެވެ. އަދި ރާއްޖޭގެ ހުރިހާ ފާމަސީތަކެއްގައި ހުރި ބޭހުގެ ސްޓޮކް ވަގުތުން ވަގުތަށް ބެލޭނެ ޒަމާނީ ނިޒާމެއް ގާއިމުކުރުމުގެ މަސައްކަތްވެސް ދަނީ ބާރުސްޕީޑުގައި ކުރިއަށެވެ.
މިހާރުވެސް އެ ކުންފުނީގެ ފުރަތަމަ ފާމަސީ އައިޖީއެމްއެޗްގައި ޤާއިމުކޮށް، ހޮސްޕިޓަލަށް ބޭނުންވާ ބޭސް މެދުނުކެނޑި ލިބޭނެ ގޮތް ވަނީ ހަމަޖައްސާފަ އެވެ. މީގެ އިތުރުން، ބޭސް ފިހާރަތަކުން ލިބެން ނުހުންނަ ބޭސްތައް ރާއްޖެއިން ބޭރުން ގެނެވޭނެ ނިޒާމެއް ގާއިމުކޮށް، އެކަމަށްޓަކައި '1505' ނަންބަރުގެ ހާއްސަ ހޮޓްލައިނެއް މެދުވެރިކޮށް މިހާރު ދަނީ ހިދުމަތް ދެމުންނެވެ.
