ސްކޮޓްލޭންޑްގައި ހުންނަ އިނގިރޭސި ޝާހީ އާއިލާގެ ރަސްމީ ގަނޑުވަރު، ހޮލީރޫޑްހައުސް އާންމުންނަށް ހުޅުވާލުމާ އެކު، އަވަހާރަވެފައިވާ ރަނިކަމަނާ އެލިޒަބަތު ll އާއި އެކަމަނާގެ ފިރިކަލުން ޕްރިންސް ފިލިޕްގެ އަމިއްލަފުޅު ދިރިއުޅުމާ ގުޅޭ މުހިންމު މައުލޫމާތުތަކެއް ފުރަތަމަ ފަހަރަށް އާންމުންނަށް ވަނީ އެނގިފަ އެވެ.

މިދިޔަ ބުރާސްފަތި ދުވަހު އާންމުންނަށް ހުޅުވާލި ކޮޓަރިތަކުގެ ތެރޭގައި، ރަނިކަމަނާ ނާސްތާ ކުރެއްވުމަށް ބޭނުންކުރެއްވި ކޮޓަރި ހިމެނެ އެވެ. އެ ގަނޑުވަރުގެ އިސް ކިއުރޭޓަރެއް ކަމަށްވާ ރިޗަޑް ވިލިއަމްސް ހާމަކުރި ގޮތުގައި، ރަނިކަމަނާ ނާސްތާ ކުރައްވަނީ ކޮންމެ ދުވަހަކު ހެނދުނު 9:00 އާއި 9:15 އާ ދެމެދުގަ އެވެ. އެ ވަގުތުގައި ގަނޑުވަރުގެ ބަގީޗާގައި ފައިފް ކުޅުންތެރިއަކު މިއުޒިކް ކުޅެމުންދާނެ އެވެ.

ޕްރިންސް ފިލިޕް ދުނިޔޭގައި ހުންނެވި އިރު، ދެބޭފުޅުން އެކުގައި ނާސްތާ ކުރައްވަމުން ގެންދެވިއިރު، 'ދަ ސްކޮޓްސްމަން'، 'ރޭޑިއޯ ޓައިމްސް' އަދި 'ރޭސިން ޕޯސްޓް' ފަދަ ނޫސްތައް ބައްލަވަ އެވެ. ރިޗަޑް ބުނި ގޮތުގައި ރަނިކަމަނާއަކީ ގައުމުގައި ހިނގާ ކަންކަން ވަރަށް ގާތުން ބައްލަވާ ބޭފުޅެކެވެ.

ނަމަވެސް، 2021 ވަނަ އަހަރު ޕްރިންސް ފިލިޕް އަވަހާރަވުމަށްފަހު، ރަނިކަމަނާގެ ނާސްތާގެ ވަގުތަށް ބަދަލުތަކެއް އައެވެ. އެކަމަނާގެ މުޅި ދުވަހުގެ ކެއުންތަކުގެ ތެރެއިން އެކަނި އިނދެ ފަރިއްކުޅުއްވާ ހަމައެކަނި ވަގުތަކީ ނާސްތާގެ ވަގުތެވެ. އެ ވަގުތުގައި އެކަމަނާ އިށީނދެވަޑައިގަންނަވަނީ ދޮރާ ކުރިމަތިވާ ގޮތަށް، މުވައްޒަފުންގެ ހަރަކާތްތައް ފެންނާނެ ފަދަ ގޮތަކަށެވެ. ދުވަހުގެ އެހެން ކެއުންތައް އެކަމަނާ އާންމުކޮށް ފަރިއްކުޅުއްވަނީ ޝާހީ އާއިލާގެ މެންބަރުންނާ އެކުގަ އެވެ.

މީގެ އިތުރުން، ރަނިކަމަނާގެ އަމިއްލަފުޅު ބައެއް ތަކެއްޗާ ގުޅޭ ތަފްސީލުތައް ވެސް ވަނީ ހާމަވެފަ އެވެ. އޭގެ ތެރޭގައި އެކަމަނާއަށް ހަދިޔާއަކަށް ލިބިވަޑައިގެންނެވި "ހެޑިންގްޓަން" ނަމަކަށް ކިޔާ ޓެޑީ ބެއާއެއް ހިމެނެ އެވެ. އެކަމަނާ ހޮލީރޫޑްހައުސްއަށް ވަޑައިގަންނަވާއިރު، އެ ޓެޑީ ބެއާ ސޯފާގެ ވަކި ތަނެއްގައި ބޭއްވުމަށް އެދިވަޑައިގަންނަވާ ކަމަށް ގަނޑުވަރުގެ ކިއުރޭޓަރު އެމާ ސްޓެޑް ކިޔައިދިނެވެ. އަދި 1986 ވަނަ އަހަރުގެ ކޮމަންވެލްތު ގޭމްސްއާ ގުޅޭ ހަނދާނީ ފޮތިގަނޑެއް (ޕިން ކުޝަން) ވެސް އެކަމަނާ ގެންގުޅުއްވި ގޮތުގެ ތަފްސީލު ވަނީ ހާމަވެފަ އެވެ.

އެޑިންބަރާގެ މަޝްހޫރު ރޯޔަލް މައިލްގެ ކޮޅުގައި ހުންނަ ހޮލީރޫޑްހައުސްއަކީ އިނގިރޭސި ރަސްކަލުން ސްކޮޓްލޭންޑަށް ކުރައްވާ ދަތުރުފުޅުތަކުގައި މަޑުކުރައްވާ ރަސްމީ ގަނޑުވަރެވެ. މި ގަނޑުވަރަކީ ދައުލަތުގެ ރަސްމީ އެކިއެކި ރަސްމިއްޔާތުތައް ވެސް ބާއްވާ ތަނެކެވެ.