ގާޒާއަށް ބޭނުންވާ އިންސާނީ އެހީ ހިފައިގެން ދަތުރުކުރަނިކޮށް އިސްރާއީލުގެ ސިފައިން ހިފެހެއްޓި "ގްލޯބަލް ސުމޫދު ފްލޮޓިލާ" ގެ އެކްޓިވިސްޓުން އެނބުރި ގައުމަށް ދިޔުމުން، ސްޕެއިންގެ ބިލްބާއޯ އެއާޕޯޓުގައި ފުލުހުން އެމީހުންނަށް އަނިޔާކޮށް ހައްޔަރުކޮށްފިއެވެ.

މި ހާދިސާ ހިނގާފައިވަނީ އިސްރާއީލުގެ ބަންދުން ސަލާމަތްވެގެން އެނބުރި އައި އެކްޓިވިސްޓުންނާއި އެމީހުންނަށް ތާއީދުކުރާ ފަރާތްތަކުން އެއާޕޯޓުގައި އެއްވެ ތިއްބައެވެ. މަންޒަރު ދުށް ފަރާތްތަކުން ބުނާ ގޮތުގައި، އެއާޕޯޓަށް އެއްވެ ތިބި މީހުންނާއި ފުލުހުންނާ ދެމެދު ވަނީ ވަރުގަދަ ކުރިމަތިލުންތަކެއް ހިނގާފައެވެ.

މި ހާދިސާގެ ވީޑިއޯތަކުން ފެންނަ ގޮތުގައި، ސްޕެއިންގެ ފުލުހުން ވަނީ އިހުތިޖާޖު ކުރަމުންދިޔަ މީހުންގެ ގައިގައި ތަޅައި، ބިމުގައި ދަމާފައި ގެންގޮސްފައެވެ. މި ހަމަނުޖެހުންތަކާ ގުޅިގެން ފުލުހުންގެ އަމުރަށް ނުކިޔަމަންތެރިވި ކަމުގެ ތުހުމަތުގައި ހަތަރު މީހަކު ހައްޔަރުކޮށްފައިވާ ކަމަށް ރިޕޯޓުތައް ބުނެއެވެ.

މި އެކްޓިވިސްޓުންނަކީ ގާޒާގެ ރައްޔިތުންނަށް އިންސާނީ އެހީ ފޯރުކޮށްދިނުމަށް ދަތުރުކުރި ފްލޮޓިލާގެ ބައިވެރިންނެވެ. މި ފްލޮޓިލާގައި ހިމެނޭ އެހީގެ އެންމެ ފަހު ބޯޓުތައް އިސްރާއީލު ސިފައިން ހިފަހައްޓާފައިވަނީ މި ހިނގާ ހަފުތާގެ ކުރީކޮޅުގައެވެ.

ގާޒާގެ މުސްލިމުންނަށް އެހީތެރިވުމަށް މަސައްކަތްކުރާ ފަރާތްތަކަށް، ހުޅަނގުގެ ގައުމެއްގެ އެއާޕޯޓެއްގެ ތެރެއިން މިފަދަ އަނިޔާވެރި އަމަލުތަކެއް ކުރިމަތިވުމުން، ގިނަ ބަޔަކު ދަނީ އެކަން ކުށްވެރިކުރަމުންނެވެ. މި ހާދިސާއަކީ ފަލަސްތީނުގެ ހައްގުގައި ވަކާލާތުކުރާ ފަރާތްތަކަށް ކުރިމަތިވަމުންދާ ގޮންޖެހުންތައް ހާމަކޮށްދޭ ކަމެކެވެ.