ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މާލީބަޔާން ޢާންމު ކުރައްވައިފިއެވެ. އެއްވެސް ވެރިޔަކަށް މިހާތަނަށް މާލީ ބަޔާން ޢާންމުކުރައްވަން ކެރިވަޑައިނުގެންނެވިއިރު. ރައީސް މުޢިއްޒުގެ މާލީބަޔާނަށް ބަލައިލުމުން އެމަނިކުފާނުގެ ދަރަނީގައި ބާކީ ދައްކަން ޖެހިވަޑައިގަންނަވާ 1.3 މިލިއަން ރުފިޔާ ހުރިކަން އެނގެން އެބައޮތެވެ. އެއީ މޯލްޑިވްސް ފައިނޭންސް އެންޑް ލީޒިންގ ކޮމްޕެނީއަށެވެ.

ރައީސުލްޖުމްހޫރިއްޔާގެ މާލީ ބަޔާނުގައިވާގޮތުން، ފާއިތުވި ހަމަސްދުވަހުގެ ތެރޭގައި މުސާރައިގެ ގޮތުގައި އެމަނިކުފާނަށް 285،024 ރުފިޔާ ލިބިވަޑައިގެންފައިވެއެވެ. އަދި ހުޅުމާލެ ރޯހައުސް ކުލީގެ ގޮތުގައި 240،000 ރުފިޔާ ލިބިވަޑައިގެންފައިވާއިރު ހިބައިން ލިބިފައިވާ މ.ފިގް ގެ އާއިލާގެ ފަރާތުން 180،000 ރުފިޔާ ހަދިޔާކޮށްފައިވެއެވެ.

ރައީސްގެ މާލީ ބަޔާނުން އެންމެ ފާހަގަކުރެވޭ ކަމަކީ އެމަނިކުފާނު ގެންގުޅުއްވަނީ ވަނީ އެންމެ ވެހިކަލެއް ކަމެވެ. އެއީ 260،000 ރުފިޔާގެ ކާރެކެވެ.

ރައީސް މުޢިއްޒު އަށް އާމްދަނީ ލިބޭ ވިޔަފާރި މަސްލަހަތު ހިމެނޭ ތަންތަނަކީ ވާރުތަ މުދަލުން ލިބިފައިވާ މ. ދިމްޔާތާއި، ހިބައިން ލިބިފައިވާ މ. ފިގް އާއި، ހުޅުމާލޭގައިވާ އެމްބަރ ޓެރަސް 2 ރޯހައުސް އާއި އުފަން ރަށް ވަށަފަރުގައިވާ ދިމްޔާތު ބިމާއި، އިސްވެ ދެންނެވި ކާރު އެކަންޏެވެ.

ބޭންކް އޮފް މޯލްޑިވްސް ގައި އެމަނނިކުފާނުގެ ދެ އެކައުންޓެއް ވެއެވެ. އޭގެތެއިން ކަރަންޓް އެކައުންޓުގައި ވަނީ 184,845.52 ރުފިޔާއެވެ. ސޭވިންގ އެކައުންޓުގައި ވަނީ 1,701,470.44 ރުފިޔާއެވެ. އިސްލާމިކް ބޭންކުގައިވާ އެކައުންޓުގައި ހުރީ 1000 ރުފިޔާއެވެ.