އަބުރު ކަތިލުމުގެ މަގްސަދުގައި ދޮގު ވާހަކަތައް ހިމަނައިގެން ކިތަންމެ ގިނަ ޑޮކިއުމަންޓްރީތަކެއް އުފެއްދި ނަމަވެސް އެކަމުގެ އެއްވެސް މައްސަލައެއް ނެތް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ ޕީއެންސީގެ ހަރުގެ ޖަލްސާގައި މިރޭ ވާހަކަފުޅު ދައްކަވަމުންނެވެ. ރައީސް ވިދާޅުވީ، އެމަނިކުފާނާ ބެހޭގޮތުން މިހާ ގިނަ ދޮގު ވާހަކަތައް ދައްކައި އަބުރު ކަތިލަމުންދާއިރު، އެހާ ހަމަޖެހިގެން މަޑުމަޑުން ހުންނަވަނީ ކިހިނެއްތޯ ބައެއް ޒުވާނުން ސުވާލުކުރި ކަމަށެވެ.
މި ސުވާލަށް ޖަވާބު ދެއްވަމުން ރައީސް ވިދާޅުވީ، އެމަނިކުފާނުގެ ހަމަޖެހުމުގެ ސިއްރަކީ ދެ ކަމެއް ކަމަށެވެ. އެއީ އަމިއްލަ ނަފްސަށް އޮތް އިތުބާރާއި، ނަމާދުކޮށް ދުއާކުރުމާއި އަޅުކަމުގައި ދެމިހުރުން ކަމަށް ރައީސް ފާހަގަކުރެއްވިއެވެ.
Advertisement
"އަޅުގަނޑު ކުރާ ކަންކަމާއި އުޅޭ ގޮތް އަޅުގަނޑަށް އެނގޭ. އެކަންކަމާ މެދު އަމިއްލަފުޅަށް އުފާކުރަން،" ރައީސް ވިދާޅުވިއެވެ.
ދީނީ ގޮތުން ބެލި ނަމަވެސް، މީހަކާ ބެހޭގޮތުން ދޮގު ވާހަކަ ފެތުރުމުން އެކަމަށް ކެތްތެރިވުމަކީ ބޮޑު ސަވާބެއް ލިބޭނެ ކަމެއްކަން ރައީސް ފާހަގަކުރެއްވިއެވެ. އެހެންކަމުން، އެމަނިކުފާނުގެ އަބުރު ކަތިލުމުގައި އިދިކޮޅު ފަރާތްތަކުން ދެމިތިބުމަށް ރައީސް ވަނީ ގޮވާލައްވާފައެވެ.
ރައީސް މުޢިއްޒު އިތުރަށް ވިދާޅުވީ، ތެދު ހަދައިގެން އެމަނިކުފާނުގެ އަބުރު ކަތިލެވޭ ފަދަ އެއްވެސް ޑޮކިއުމަންޓްރީއެއް ނުހެދޭނެ ކަމުގެ ފުރިހަމަ ޔަގީންކަން އެބައޮތް ކަމަށެވެ. އަދި ދޮގު ހަދައިގެން ނެރޭ ޑޮކިއުމަންޓްރީތަކުގެ ސަބަބުން އެމަނިކުފާނަށް ލިބޭނީ ހުސް ފައިދާ ކަމަށާއި، ދުނިޔެއާއި އާޚިރަތުގައި އެމަނިކުފާނަށް ސަވާބު ދެއްވަން ބޭނުންފުޅުވާނަމަ އިދިކޮޅުން ގިނަގިނައިން އެފަދަ ވީޑިއޯތައް ހެދުމަށް ރައީސް ވިދާޅުވިއެވެ.
