ކުރީގެ ސަރުކާރުތަކުން ގެންގުޅުނު ދީނީ ސިޔާސަތުތަކަށް ވަރަށް ބޮޑަށް ފާޑުވިދާޅުވަމުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ އެމްޑީޕީގެ ސަރުކާރުތަކަކީ އިސްލާމްދީނުގެ މައިގަނޑު އަސާސްތަކާއި ކީރިތި ގުރުއާނުގެ ބަދަލުގައި "އަލްޓަނޭޓިވް ނެރޭޓިވް" ނުވަތަ އެހެން ގޮތްތަކެއް ހޯދަން މަސައްކަތްކުރި ބައެއް ކަމަށެވެ.
ރޭ ބޭއްވި ޖަލްސާއެއްގައި ވާހަކަފުޅު ދައްކަވަމުން ރައީސް ވިދާޅުވީ، އެމްޑީޕީގެ ކުރީގެ ސަރުކާރުތަކުގެ ދީނީ ސިޔާސަތު އޮތް ގޮތް ހަނދާން ނެތޭހާ ދުވަސް އަދި ނުވާ ކަމަށެވެ. މިގޮތުން، އިސްލާމްދީނުގެ އަސާސީ ކަންކަމަށް ހަޖޫޖަހައި ނެރުނު އެމްޑީއެން ރިޕޯޓަކީ މީގެ ސާފު ހެއްކެއް ކަމުގައި އެމަނިކުފާނު ފާހަގަކުރެއްވިއެވެ. އެ ރިޕޯޓު ޝާއިރުކުރިއިރު، އެކަމުގައި ބައިވެރިވި ފަރާތްތައް ތިބީ އޭރުގެ ދައުލަތުގެ އިސް މަގާމުތަކުގައި ރައްޔިތުންގެ ފައިސާއިން މުސާރަ ނަގައިގެން ކަމަށް ރައީސް ވިދާޅުވިއެވެ.
ރައީސް މުޢިއްޒު އިތުރަށް ވިދާޅުވީ، ރައީސް ނަޝީދުގެ ސަރުކާރަކީ ވެސް މާޒީގެ ތެރެއަށް ފެތި ގެއްލިފައިވާ ދުވަސްތަކެއް ނޫން ކަމަށެވެ. އެ ސަރުކާރުގައި އައްޑޫ ސިޓީގައި ބުދު ބެހެއްޓުމާއި، ދީނާ ބީރައްޓެހި ކަންކަން ފާޅުކަން ބޮޑު ގޮތެއްގައި ހިންގާފައިވާކަން އެމަނިކުފާނު ހަނދާންކޮށްދެއްވިއެވެ.
"2023 ވަނަ އަހަރު އިސްލާމީ ދިފާއުގައި ދިވެހިން ނިކުންނަން ޖެހުނީ ކީއްވެގެންތޯ؟" ސުވާލު ކުރައްވަމުން ރައީސް ވިދާޅުވީ، އެއީ ރާއްޖޭގެ ތާރީޚުގައި ވެސް ދިވެހިން އެއް އަޑަކުން ދީނުގެ ހިމާޔަތުގައި ނިކުތް އެންމެ ވަރުގަދަ އެއްވުން ކަމަށެވެ. އަދި އެމްޑީޕީގެ ދެ ސަރުކާރަކީ ވެސް ދީނާ ދުރު ސިޔާސަތުތަކެއް ގެންގުޅުނު ދެ ސަރުކާރުކަން ރައްޔިތުން ގަބޫލުކުރާ ކަމަށް ވިދާޅުވިއެވެ.
މީގެ އިތުރުން ރައީސް ވިދާޅުވީ، އެމްޑީޕީގެ ފުރަތަމަ ސަރުކާރުން އިސްލާމްދީނުގެ މައިގަނޑު އަސާސްތަކާއި ގުރުއާނުގެ ބަދަލުގައި އެހެން ގޮތްތަކެއް ނުވަތަ 'އަލްޓަނޭޓިވް ނެރޭޓިވް' އެއް ހޯދަން މަސައްކަތް ކުރި ނަމަވެސް، މި ސަރުކާރުން ކަންކަން ކުރާނީ އިސްލާމްދީނުގެ ހުދޫދުގެ ތެރެއިން، ދީނަށް ފުރިހަމަ ބާރުދީގެން ކަމަށެވެ.
ނިންމަވާލައްވަމުން ރައީސް ވަނީ، އަގީދާ ކިލަނބުކޮށްލަން މަސައްކަތްކުރި އެމްޑީއެން ރިޕޯޓުގެ ބައިވެރިން ތިބި ސަރުކާރެއް އަނބުރާ ގެންނަން ރައްޔިތުން ބޭނުންވާނެތޯ ސުވާލު ކުރައްވައި، އެފަދަ ދުވަސްތަކެއް ދިވެހިން ދެން ބޭނުންނުވާނެ ކަމަށް ވިދާޅުވެފައެވެ.
