ސަރުކާރުގެ ސީނިއާ ޕޮލިޓިކަލް ޑިރެކްޓަރުގެ މަގާމުން ވަކިކުރުމާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ކިބައިން ބަދަލުހިފާނެ ކަމަށާއި އެމަނިކުފާނުގެ އަބުރު ކަތިލާނެ ކަމަށް ބުނެ އީޝާ އަޝްރަފް ދައްކާފައިވާ ވާހަކަތަކެއްގެ އޯޑިއޯއެއް ސޯޝަލް މީޑިއާގައި ލީކުވެއްޖެއެވެ.
"ރާކަނި" ނަމަކަށް ކިޔާ ސޯޝަލް މީޑިއާ ޕްލެޓްފޯމްތަކުން އާންމުކޮށްފައިވާ މި އޯޑިއޯއަކީ އީޝާ އާއި އޭނާގެ ބައްޕައާ ދެމެދު ދެކެވުނު ފޯނު ކޯލެއްގެ ރެކޯޑިންގް އެކެވެ. މި އޯޑިއޯގައި އީޝާ ވަނީ އޭނާ މަގާމުން ވަކިކުރިކަން ރައީސް އޮފީހުން އަންގާފައިވާ ކަމަށާއި، އެކަމުގެ ބަދަލު ވަރަށް ހިތިކޮށް ހިފާނެ ކަމަށް ބުނެ ރައީސަށް އިންޒާރު ދީފައެވެ.
Advertisement
ލީކުވި އޯޑިއޯގައި އީޝާ ބުނެފައިވަނީ، ރައީސް އޮފީހުން އޭނާއަށް ގުޅައި ސީނިއާ ޕޮލިޓިކަލް ޑިރެކްޓަރުގެ މަގާމުން ވަކިކުރިކަން އަންގާފައިވާ ކަމަށެވެ. އަދި ވަކިކުރި ކަމުގެ ލިޔުންތައް ފޮނުވާނެ ކަމަށް ބުނުމުން "އޯކޭ" ކަމަށް ބުނި ނަމަވެސް، އެކަމުގެ ބަދަލު ކޮންމެވެސް ދުވަހަކުން ހިފާނެ ކަމަށް އޭނާ ބުނެއެވެ.
"މިހާ ދެރަވަރުކޮށް ނުހެދޭނެ. މުޢިއްޒު ހީނުކުރާތި މަ ހަމަ ސީދާ ބަދަލު ހިފާނީ. ހިތިކޮށް ހަމަ ނިންމާނަން،" ލީކުވި އޯޑިއޯގައި އީޝާ ބުނެފައިވެއެވެ.
މި އޯޑިއޯ އާންމުކުރި "ރާކަނި" ޕޭޖުން ބުނެފައިވަނީ، މިއީ އީޝާ ރައީސް މުޢިއްޒުގެ އަބުރު ކަތިލުމަށް މަސައްކަތް ކުރަނީ ވަޒީފާއިން ވަކިކުރުމުން އެކަމުގެ ބަދަލުހިފުމުގެ ގޮތުންކަން ސާބިތުވާ ހެއްކެއް ކަމަށެވެ.
