ސްޕެއިންގެ ގަދަބާރު ރެއާލް މެޑްރިޑުގެ ކޯޗުގެ މަގާމާ ހަވާލުވުމަށް، މަޝްހޫރު ކޯޗު ހޯސޭ މޮރީނިއޯއާއެކު ފަހުގެ މަޝްވަރާތައް ފަށައިފިއެވެ. މިއީ މީގެ 13 އަހަރު ކުރިން އެ ކްލަބަށް ކޯޗުކޮށްދިން މޮރީނިއޯ އަލުން ބާސެލޯނާގެ ވާދަވެރި ރެއާލްއާ ގުޅޭ ފަހަރެވެ.
އުމުރުން 63 އަހަރުގެ މޮރީނިއޯ އަކީ މިވަގުތު ރެއާލްއިން މި މަގާމަށް ވާހަކަދައްކަމުންދާ ހަމައެކަނި ކޯޗެވެ. އޭނާ މި މަގާމަށް އަންނަނީ، މިދިޔަ ޖެނުއަރީ މަހު ޒަބީ އެލޮންސޯ ވަކިވުމުން ޓީމާ ހަވާލުވި އަލްވާރޯ އާބެލޯއާގެ ބަދަލުގައެވެ. ރެއާލްގެ ރައީސް ފްލޮރެންޓީނޯ ޕެރޭޒް، މޮރީނިއޯ އަލުން ގެނައުމުގެ ވިސްނުން ގެންގުޅުއްވަން ފެއްޓެވީ އެލޮންސޯ ކްލަބް ދޫކޮށް ދިޔަތާ ދެ ދުވަސް ފަހުންނެވެ.
މިވަގުތު ޕޯޗުގަލްގެ ބެންފީކާގެ ކޯޗަކަށް ހުރި މޮރީނިއޯ ބުނެފައިވަނީ، އޭނާގެ ކުރިމަގާ ބެހޭގޮތުން ވާހަކަދައްކާނީ އާދިއްތަ ދުވަހު ކުޅޭ ސީޒަނުގެ ފަހު މެޗަށްފަހު ކަމަށެވެ. މޮރީނިއޯގެ ކޮންޓްރެކްޓްގައިވާ ގޮތުން 3 މިލިއަން ޔޫރޯގެ ފީއެއް ދެއްކުމަށްފަހު އޭނާއަށް ބެންފީކާ ދޫކޮށްލުމުގެ ފުރުސަތު އޮންނާނެއެވެ.
މޮރީނިއޯ ވަނީ 2010 އިން 2013 އަށް ރެއާލް މެޑްރިޑަށް ކޯޗުކޮށްދީ، ލަ ލީގާ އާއި ކޮޕާ ޑެލް ރޭގެ އިތުރުން ސްޕެނިޝް ސުޕަ ކަޕް ކާމިޔާބުކޮށްދީފައެވެ. އޭގެ ފަހުން އޭނާ ވަނީ ޗެލްސީ، މެންޗެސްޓާ ޔުނައިޓެޑް، ޓޮޓެންހަމް، ރޯމާ އަދި ފެނަބާޗޭ ފަދަ ކްލަބްތަކަށް އިރުޝާދުދީ ގިނަ ކާމިޔާބީތަކެއް ހޯދައިދީފައެވެ.
މި ސީޒަނަކީ ރެއާލް މެޑްރިޑަށް ވަރަށް ނާކާމިޔާބު ސީޒަނެކެވެ. އެއްވެސް ތައްޓެއް ނުލިބި ސީޒަން ނިންމާލަން ޖެހިފައިވާއިރު، ލަ ލީގާ ކާމިޔާބުކުރީ ވާދަވެރި ބާސެލޯނާއެވެ. އަދި ޗެމްޕިއަންސް ލީގުން ކަޓާފައިވަނީ ކުއާޓާ ފައިނަލުގައި ބަޔާން މިއުނިކް އަތުން ބަލިވެގެންނެވެ.
ދަނޑުމަތީގެ ނަތީޖާތަކުގެ އިތުރުން، ރެއާލްގެ ޑްރެސިން ރޫމްގައިވެސް ވަނީ ބޮޑެތި މައްސަލަތަކެއް ޖެހިފައެވެ. އެގޮތުން ޗޫއަމެނީ އާއި ވަލްވާޑޭގެ މެދުގައި ހިނގި ހަމަނުޖެހުމަކާ ގުޅިގެން ކްލަބުން ވަނީ އެ ދެ ކުޅުންތެރިން ޖުމްލަ 1 މިލިއަން ޔޫރޯއިން ޖޫރިމަނާކޮށްފައެވެ. މީގެ އިތުރުން ކީލިއަން އެމްބާޕޭގެ އަމަލުތަކާ ގުޅިގެން ސަޕޯޓަރުންގެ ނުރުހުންވެސް ވަނީ އަމާޒުވެފައެވެ.
ރެއާލް މެޑްރިޑުން މޮރީނިއޯ ގެންނަން ބޭނުންވާ މައިގަނޑު ސަބަބަކީ، ބައިބައިވެފައިވާ ސްކޮޑެއްގެ ކޮންޓްރޯލް ހޯދައި، ކްލަބްގެ ހައިބަތާއި ވަރުގަދަކަން އަލުން އިއާދަކުރުމަށެވެ. މޮރީނިއޯ އަކީ މިފަދަ ހާލަތްތަކުގައި ޓީމުތައް ކޮޅަށް ޖެހުމަށް ކުޅަދާނަ، ތަޖުރިބާކާރު ލީޑަރެކެވެ.
