ރާއްޖޭގެ މާލީ އިދާރާ، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ރާއްޖޭގެ ރަސްމީ ފައިނޭންޝަލް ލިޓްރަސީ ބްރޭންޑް އައިޑެންޓިޓީއާއި މެސްކޮޓް ޑިޒައިންކުރުމުގެ މުބާރާތެއް މިއަދު އިއުލާންކޮށްފި އެވެ. މި މުބާރާތުން އެއްވަނައަށް ހޮވޭ ފަރާތަކަށް 100,000 (އެއްލައްކަ) ރުފިޔާގެ ބޮޑު ފައިސާގެ އިނާމެއް ދިނުމަށް ވަނީ ހަމަޖެހިފައެވެ.

މި އިނީޝިއޭޓިވްގެ މައިގަނޑު ބޭނުމަކީ މުޅި ރާއްޖޭގައި މާލީ ހޭލުންތެރިކަން އިތުރުކުރުމަށް ކުރެވޭ މަސައްކަތްތަކަށް އެހީތެރިވެދޭނެ، ވަރުގަދަ އަދި ފަސޭހައިން ވަކިކުރަން އެނގޭނެ ގައުމީ އައިޑެންޓިޓީއެއް ބިނާކުރުމެވެ. އެމްއެމްއޭ އިން ބޭނުންވަނީ ޒިންމާދާރު މާލީ އާދަތައް ކުރިއަރުވައި، މާލީ ނިންމުންތައް ނިންމުމުގެ ބާރު ހުރިހާ އުމުރުފުރައެއްގެ މީހުންނަށް، ހާއްސަކޮށް ޒުވާނުންނަށް ފޯރުކޮށްދޭނެ ފުރިހަމަ ބްރޭންޑިން ނިޒާމެއް އެކުލަވައިލުމަށެވެ.

މި މުބާރާތުގެ ދަށުން ފަރުމާކުރަން ޖެހެނީ މެސްކޮޓަކާއި، ފައިނޭންޝަލް ލިޓްރަސީގެ ބްރޭންޑް ލޯގޯ އަދި ޓައިޕޯގްރަފީ އެވެ. އެމްއެމްއޭގެ އުންމީދަކީ މި ބްރޭންޑާއި މެސްކޮޓް މެދުވެރިކޮށް ފައިސާ ރައްކާކުރުމާއި، ބަޖެޓުކުރުމާއި، ޑިޖިޓަލް ފައިނޭންސްގެ އިތުރުން މާލީ ދުޅަހެޔޮކަމުގެ މެސެޖުތައް ރައްޔިތުންނާ ގާތް، ބުއްދިވެރި ގޮތެއްގައި ފޯރުކޮށްދިނުމެވެ.

މި ބްރޭންޑިން ބޭނުންކުރުމަށް ހަމަޖެހިފައިވަނީ ސްކޫލުތަކާއި، ކޮމިއުނިޓީ ޕްރޮގްރާމްތަކާއި، މީޑިއާ ކެމްޕެއިންތަކުގެ އިތުރުން ޑިޖިޓަލް ޕްލެޓްފޯމްތަކުގަ އެވެ. މީގެ މަގުސަދަކީ ޝައުގުވެރި ވިޝުއަލް ނިޒާމެއްގެ ތެރެއިން މާލީ ހޭލުންތެރިކަމުގެ މެސެޖުތައް މިހާރަށްވުރެ ބޮޑަށް އާންމުންނަށް ފެންނާނެ ގޮތް ހެދުމެވެ.

ދިވެހި ފަރުދުންނަށާއި، ގްރޫޕްތަކަށާއި، ކުންފުނިތަކަށް ހުޅުވާލައިގެން ބާއްވާ މި މުބާރާތުގައި ބާރުއަޅަނީ ދިވެހިވަންތަކަން ރަމްޒުކޮށްދޭ، ޒަމާނީ އަދި އުފެއްދުންތެރި ފަރުމާތަކަށެވެ. މުބާރާތުން ހޮވޭ އެންމެ ފުރިހަމަ ފަރުމާ ވެގެންދާނީ ރާއްޖޭގެ މާލީ ހޭލުންތެރިކަމުގެ ރަސްމީ ބްރޭންޑަށެވެ.

މި މުބާރާތުގައި ބައިވެރިވުމަށް ޝައުގުވެރިވާ ފަރާތްތަކުން 14 ޖޫން 2026 ވާ އާދިއްތަ ދުވަހުގެ 15:00 ގެ ކުރިން އެމްއެމްއޭއަށް އީމެއިލް މެދުވެރިކޮށް ހުށަހެޅުންތައް ހުށަހަޅަންޖެހެ އެވެ. މުބާރާތުގެ އިތުރު ތަފްސީލާއި އުސޫލުތައް އެމްއެމްއޭގެ ރަސްމީ ވެބްސައިޓުން މިހާރު ލިބެން ހުންނާނެއެވެ.