ދުނިޔޭގެ މަގުބޫލު ލަވަކިޔުންތެރިޔާ ޑުއާ ލީޕާގެ ފޮޓޯއެއް، އޭނާގެ އެއްވެސް ހުއްދައެއް ނެތި އުފެއްދުންތަކެއްގެ ފޮށިގަނޑުގައި ބޭނުންކުރި މައްސަލައެއްގައި ސެމްސަންގް ކުންފުންޏާ ދެކޮޅަށް 15 މިލިއަން ޑޮލަރުގެ ބޮޑު ދައުވާއެއް އޭނާ ހުށަހަޅައިފި އެވެ.
މި މައްސަލަ އެމެރިކާގެ ކެލިފޯނިއާގެ ސެންޓްރަލް ޑިސްޓްރިކްޓް ކޯޓަށް ހުށަހެޅީ މިދިޔަ ހުކުރު ދުވަހު އެވެ. ލީޕާގެ ފަރާތުން ކޯޓަށް ހުށަހެޅި މައްސަލައިގައި ބުނެފައިވަނީ، އެމެރިކާގެ އެކި ކަންކޮޅުތަކުގައި ވިއްކަމުންދާ ސެމްސަންގް ޓީވީތަކުގެ ފޮށިތަކުގައި އޭނާގެ މޫނު ފެންނަ ފޮޓޯއެއް ބޭނުންކޮށްފައިވަނީ އޭނާގެ އެއްވެސް ރުހުމެއް ނުވަތަ ހުއްދައެއް ހޯދުމެއް ނެތި ކަމަށެވެ.
ލީޕާގެ ގާނޫނީ ވަކީލުން ބަޔާންކުރާ ގޮތުގައި، ސެމްސަންގުން މި ފޮޓޯ ބޭނުންކޮށްފައިވަނީ ލީޕާ ހޯދާފައިވާ ބޮޑު މަގުބޫލުކަމުގެ ނަހަމަ ފައިދާ ނަގައި، އެ ކުންފުނީގެ ވިޔަފާރި ކުރިއެރުވުމަށެވެ. މީގެ ސަބަބުން ކޮޕީރައިޓާއި ޓްރޭޑްމާކް ގާނޫނާ ސެމްސަންގުން ހިލާފުވެފައިވާ ކަމަށާއި، އޭނާގެ ސިފަ ނަހަމަ ގޮތުގައި ބޭނުންކޮށްފައިވާ ކަމަށް ދައުވާގައި ތުހުމަތުކޮށްފައިވެ އެވެ.
ދައުވާގައި ބުނާ ގޮތުން، މި މައްސަލައިގައި ހިމެނޭ ފޮޓޯއަކީ 2024 ވަނަ އަހަރު ބޭއްވި "އޮސްޓިން ސިޓީ ލިމިޓްސް ފެސްޓިވަލް" ގައި ލީޕާ ޕާފޯމްކުރި ވަގުތު ނަގާފައިވާ ފޮޓޯއެކެވެ. މި ފޮޓޯގެ ފުރިހަމަ ކޮޕީރައިޓް މިލްކުވެގެންވަނީ ވެސް ލީޕާއަށެވެ. އޭނާގެ ފޮޓޯ ޓީވީ ފޮށިތަކުގައި ބޭނުންކުރާކަން އޭނާއަށް އެނގުނީ 2025 ވަނަ އަހަރުގެ ޖޫން މަހު، ސޯޝަލް މީޑިއާގައި ގިނަ ބަޔަކު އެ ޓީވީ ފޮށިތަކަށް "ޑުއާ ލީޕާ ޓީވީ ފޮށި" ކިޔަން ފެށުމުންނެވެ.
މި މައްސަލައިގެ ހެއްކެއްގެ ގޮތުގައި މީސް މީޑިއާގައި މީހުން ކޮށްފައިވާ ބައެއް ކޮމެންޓްތައް ވެސް ވަނީ ހުށަހަޅާފަ އެވެ. އޭގެ ތެރޭގައި ލީޕާގެ ފޮޓޯ ފޮށިގަނޑުގައި ހުރުމުން ޓީވީ ގަންނަން ބޭނުންވާ ކަމަށް ބުނެފައިވާ މީހުންގެ ޝުއޫރުތައް ހިމެނެ އެވެ. މިއީ ސެމްސަންގުން ލީޕާގެ ބޭނުން ވިޔަފާރި އިޝްތިހާރު ކުރުމަށް ހިފާފައިވާ ކަމުގެ ހެއްކެއް ކަމަށް ވަކީލުން ބުނެ އެވެ.
ލީޕާގެ ވަކީލުން އިތުރަށް ބުނެފައިވަނީ، އެ ފޮޓޯ ބޭނުންކުރުން ހުއްޓާލުމަށް ސެމްސަންގަށް ތަކުރާރުކޮށް އެންގުމުންވެސް އެކަމަށް އެ ކުންފުނިން އިޖާބަދީފައި ނުވާ ކަމަށެވެ. ލީޕާއަކީ މިހާރުވެސް ޕޫމާ، ވާސާޗޭ ފަދަ ބޮޑެތި ބްރޭންޑްތަކުގެ ރަސްމީ މޫނެވެ. މީގެ ކުރިން އޭނާ ވަނީ އެޕަލް އަދި ޕޯޝޭ ފަދަ ނުފޫޒުގަދަ ކުންފުނިތަކާއެކު ވެސް ކާމިޔާބު މަސައްކަތްތަކެއް ކޮށްފަ އެވެ.
