މީގެ ފަސް އަހަރު ކުރިން ނިމުމަކަށް އައި ދުނިޔޭގެ މަޝްހޫރު ސްޕެނިޝް ސީރީޒް "މަނީ ހައިސްޓް"ގެ ދުނިޔެ އިތުރަށް ފުޅާކޮށް، އާ މަސައްކަތްތަކެއް ފެށުމަށް ތައްޔާރުވަމުންދާކަން ނެޓްފްލިކްސް އިން ރަސްމީކޮށް އިއުލާންކޮށްފި އެވެ.
ނެޓްފްލިކްސް އިން މިކަން އިއުލާންކޮށްފައިވަނީ "ދަ ވޯލްޑް އޮފް މަނީ ހައިސްޓް ކޮންޓިނިއުސް" ގެ ނަމުގައި އާންމުކުރި ފޯރިގަދަ ޓީޒާއަކާ އެކުގަ އެވެ. މި ޓީޒާގައި ކުރީގެ ސީޒަންތަކުގައި ފެނިގެންދިޔަ ހިތްގައިމު ވައްކަންތަކުގެ މަންޒަރުތައް ހިމަނާފައިވާއިރު، ކުރިއަށް އޮތީ މިއަށްވުރެ މާ ބޮޑެތި އަދި ފޯރިގަދަ ކަންތައްތަކެއްކަމުގެ އިޝާރާތެއް ވަނީ ދީފަ އެވެ.
މި އިއުލާނާ ގުޅިގެން ނެޓްފްލިކްސް އިން ވަނީ ސްޕެއިންގެ ސެވިލްގައި ތަފާތު އަދި ފާހަގަކޮށްލެވޭ އިޝްތިހާރު ކުރުމުގެ ހަރަކާތެއް ވެސް ކުރިއަށް ގެންގޮސްފަ އެވެ. އެގޮތުން އެ ސިޓީގެ ގުއަޑަލްކިވިރު ކޯރުގައި، ސީރީޒްގެ ރަމްޒެއް ކަމަށްވާ ރަތް ކުލައިގެ ޖަމްޕްސޫޓާއި "ޑާލީ" މާސްކް އަޅައިގެން ތިބި ބަޔަކު ބޯޓެއްގައި ދަތުރުކުރަނިކޮށް ފެނިފައިވެ އެވެ. އަދި އެ ސަރަހައްދުގައި ސީރީޒްގެ މަޝްހޫރު ލަވަ "ބެއްލާ ޗާއޯ" ޖަހައި، ފޭނުންގެ ސަމާލުކަން ވަނީ ހޯދާފަ އެވެ.
Advertisement
މި އިއުލާނާއެކު މީސް މީޑިއާގައި ފޭނުން އަންނަނީ ބޮޑު އުފާފާޅުކުރުމެއް ފާޅުކުރަމުންނެވެ. ނަމަވެސް، ގިނަ ބައެއްގެ ހިތުގައި އުފެދިފައިވާ އެންމެ ބޮޑު ސުވާލަކީ، މިއީ "މަނީ ހައިސްޓް" ގެ ހަވަނަ ސީޒަންތޯ ނުވަތަ އިތުރު ސްޕިން-އޮފް ސީރީޒްއެއްތޯ އެވެ. މިކަމާ ގުޅޭގޮތުން ނެޓްފްލިކްސް އިން އަދި ސާފު ބަހެއް ބުނެފައެއް ނުވެ އެވެ.
މީގެ އިތުރުން، "މަނީ ހައިސްޓް" ގެ މަޝްހޫރު ކެރެކްޓާ ބާލިންއަށް ހާއްސަކޮށްގެން ތައްޔާރުކުރި ސްޕިން-އޮފް ސީރީޒް "ބާލިން" ގެ ދެވަނަ ސީޒަން ވެސް މި މަހުގެ 15 ވަނަ ދުވަހު ސްޓްރީމް ކުރަން ފެށުމަށް ވަނީ ހަމަޖެހިފަ އެވެ.
