ދިވެހިރާއްޖޭގެ މޫސުމާ ބެހޭ ގައުމީ އިދާރާ (މެޓް އޮފީސް) އިން ހާމަކުރައްވާފައިވާ ގޮތުގައި، މިއަހަރުގެ ހުޅަނގު މޫސުމުގެ އަސަރުތައް ރާއްޖެއަށް ކުރަން ފަށައިފި އެވެ. ރާއްޖޭގެ މޫސުން ބެހިގެންވާ މައިގަނޑު ދެ މޫސުމަށް ބަލާއިރު، އިރުވައި މޫސުމަކީ އާންމުގޮތެއްގައި ޖަނަވަރީ މަހުން ފެށިގެން މާޗު މަހުގެ ނިޔަލަށެވެ. އަދި ހުޅަނގު މޫސުމަކީ މޭ މަހުން ފެށިގެން ނޮވެންބަރު މަހުގެ ނިޔަލަށް ދެމިގެންދާ މޫސުމެކެވެ.

މެޓް އޮފީހުގެ ތަފާސްހިސާބުތަކުން ދައްކާގޮތުގައި، މި އަހަރުގެ ހުޅަނގު މޫސުން ރާއްޖޭގެ ދެކުނުގެ އަތޮޅުތަކަށް ފެށިފައިވަނީ މޭ މަހުގެ 8 ވަނަ ދުވަހު އެވެ. އާންމު ގޮތެއްގައި ހުޅަނގު މޫސުމުގެ އަސަރުތައް ފުރަތަމަ ފެންނަން ފަށަނީ މޭ މަހުގެ ފުރަތަމަ ނުވަތަ ދެވަނަ ހަފުތާގެ ތެރޭގައި ދެކުނުގެ އަތޮޅުތަކަށެވެ. އޭގެ ފަހުން މެދުރާއްޖެތެރެއަށް މި މޫސުމުގެ އަސަރު ފޯރައި، މޭ މަސް ނިމުމުގެ ކުރިން މުޅި ރާއްޖެއަށް ހުޅަނގު މޫސުން ފެށިގެންދެ އެވެ.

ހުޅަނގު މޫސުން ފެށުނުކަމަށް ބަލާ މިންގަނޑުތަކެއް މެޓް އޮފީހުން ވަނީ ކަނޑައަޅާފަ އެވެ. އެގޮތުން ވާރޭވެހުމުގެ މިންގަނޑަށް ބަލާއިރު، މޭ މަހުގެ 1 ވަނަ ދުވަހުގެ ފަހުން ދެކުނުގެ އަތޮޅުތަކުގެ މަދުވެގެން 60 އިންސައްތަ ސްޓޭޝަނަށް، ދުވާލެއްގެ މައްޗަށް 25 މިލިމީޓަރަށްވުރެ ގިނައިން ވާރޭ ވެހޭނެ އެވެ. ވައިގެ ބާރުމިނަށް ބަލާއިރު، ދެކުނުގެ އަތޮޅުތަކުގެ 60 އިންސައްތަ ސްޓޭޝަނުގައި ވައިގެ މިސްރާބު ހުޅަނގު ދެކުނާއި ހުޅަނގާ ދެމެދު ހުރެފައި، ގަޑިއަކު 10 ނޯޓިކަލް މޭލަށްވުރެ ބާރުމިނުގައި ވައި ޖެހެންޖެހޭނެ އެވެ.

މީގެ އިތުރުން، ހުޅަނގު މޫސުން ފެށުނުކަމަށް ބަލަނީ ވާރޭވެހުމާއި ވައިގެ މި މިންގަނޑުތައް ވިދިވިދިގެން ދެ ދުވަހު ނުވަތަ އެއަށްވުރެ ގިނަ ދުވަހު ދެމިގެންދިއުމުންނެވެ. ހުޅަނގު މޫސުމަކީ ވިއްސާރަވެ، ކަނޑުގަދަ ދުވަސްތަކެއްގެ ގޮތުގައި ފާހަގަކުރެވޭ މޫސުމަކަށް ވާތީ، މި ދުވަސްވަރު މޫސުމަށް ސަމާލުވުމަށް ކަމާބެހޭ އިދާރާތަކުން އިރުޝާދު ދެއްވަ އެވެ.