ދިވެހިރާއްޖޭގެ ގައުމީ ދިފާއީ ބާރު (އެމްއެންޑީއެފް) ގެ 134 ވަނަ އަހަރީ ދުވަސް ފާހަގަކުރުމަށް މިރޭ ބޭއްވި ޚާއްސަ ޖަލްސާގައި ވާހަކަފުޅު ދައްކަވަމުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ސިފައިންގެ ޚިދުމަތަށް މުހިންމު ބަދަލުތަކެއް ގެންނަވާނެކަން އިޢުލާނު ކުރައްވާފައެވެ.
މި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، ސިފައިންނަކީ އާއިލާއާ ގާތުން ވަޒީފާ އަދާކުރެވޭނެ ބައެއްގެ ގޮތުގައި ހެއްދެވުމަށް އުސޫލެއް ހަމަޖައްސަވަން ގަސްދުކުރައްވާ ކަމަށެވެ. އެގޮތުން، ސިފައިންގެ އާއިލާތައް ގާއިމްވެފައިވާ ރަށް ނުވަތަ އަތޮޅަށް ރިއާޔަތްކޮށް، އެ ސަރަހައްދަކާ އެންމެ ކައިރީގައި ހުރި ކޮމާންޑު ސެންޓަރެއްގައި މަސައްކަތް ކުރެވޭނެ ދާއިމީ ފުރުސަތު ހޯދައިދެއްވާނެ ކަމަށް އެމަނިކުފާނު ވިދާޅުވިއެވެ.
ރައީސް މުޢިއްޒު އިތުރަށް ވިދާޅުވީ، މި ބަދަލާ އެކީ ސިފައިންގޭގެ ފައުޖު ފުޅާކޮށް، އިތުރަށް ވަރުގަދަކުރަން ޖެހޭނެ ކަމަށެވެ. އަދި ސިފައިންގެ ސަފުތަކަށް ޒުވާނުން އިތުރުކުރުމަށްޓަކައި މިއަހަރުގެ ބަޖެޓުގެ ތެރެއިން ޚާއްސަ އިސްކަމެއް ދީގެން ބަޖެޓު އިތުރުކޮށްދެއްވާފައިވާނެ ކަމަށްވެސް އެމަނިކުފާނު ފާހަގަކުރެއްވިއެވެ. މީގެ މައިގަނޑު މަގުސަދަކީ މާލެ އޭރިއާ ކޮމާންޑުގެ އިތުރުން ރާއްޖޭގެ ހުރިހާ ސަރަހައްދެއްގައިވެސް ދާއިމީ ގޮތެއްގައި ސިފައިން ޑިއުޓީ އަދާކުރާ ގޮތަށް ނިޒާމު ބަދަލުކުރުން ކަމަށް ރައީސް ވިދާޅުވިއެވެ.
Advertisement
މި ނިންމެވުމުގެ ސަބަބުން ނުކުންނާނެ ނަތީޖާއާ މެދު ވާހަކަފުޅު ދައްކަވަމުން ރައީސް ވިދާޅުވީ، އާއިލާއާ ވީހާވެސް ގިނައިން ބައްދަލުވެ، ގާތުގައި ތިބެގެން ޚިދުމަތް ކުރެވޭނެ މަގު ފަހިވުމަކީ ސިފައިންގެ ނަފްސަށާއި ގައުމަށް އޭގެ ފުރިހަމަ ނަފާ ލިބިގެންދާނެ ކަމެއް ކަމަށް ގަބޫލުފުޅު ކުރައްވާ ކަމަށެވެ.
