ސަރުކާރުން ކުރިއަށްގެންދާ ބޯހިޔާވަހިކަމުގެ މަޝްރޫއުތަކުގެ ތެރެއިން ސިފައިންނަށް ޚާއްސަކޮށްގެން ކަނޑައެޅިފައިވާ ކޯޓާ ނުވަތަ މިންވަރު އިތުރުކޮށްދެއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ ދިވެހިރާއްޖޭގެ ގައުމީ ދިފާއީ ބާރު (އެމްއެންޑީއެފް) ގެ 134 ވަނަ އަހަރީ ދުވަސް ފާހަގަކުރުމަށް މިރޭ ބޭއްވި ޚާއްސަ ޖަލްސާގައި ވާހަކަފުޅު ދައްކަވަމުންނެވެ.
މި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، ސަރުކާރުގެ ބޯހިޔާވަހިކަމުގެ ސިޔާސަތުގެ ތެރޭގައި މިހާރު ހުޅުވާލެވިފައިވާ ޕްރޮގްރާމްތަކުގައި ސިފައިންނަށް ވަކި އަދަދެއް ކަނޑައެޅިފައިވީ ނަމަވެސް، އެއީ އެންމެ އެދެވޭ މިންވަރު ނޫން ކަމަށް ގަބޫލުފުޅު ކުރައްވާ ކަމަށެވެ. އަދި އިރާދަކުރެއްވިއްޔާ ކުރިއަށް އޮތް ތަނުގައި އެ އަދަދު އިތުރުކޮށް، އަސާސީ ބޯހިޔާވަހިކަން ލިބިގެންދާ ސިފައިންގެ އަދަދު ސަރުކާރުގެ ހައުސިން ސްކީމްތަކުގެ ތެރެއިން އިތުރުކޮށްދެއްވާނެ ކަމުގެ ޔަގީންކަން ރައީސް ދެއްވިއެވެ.
ބޯހިޔާވަހިކަމުގެ މުހިންމުކަމުގެ މައްޗަށް އަލިއަޅުވާލައްވަމުން ރައީސް ވިދާޅުވީ، ބޯހިޔާވަހިކަމަކީ ކޮންމެ ރައްޔިތެއްގެވެސް އަސާސީ ހައްގެއް ކަމަށެވެ. އެހެންކަމުން، މި ސަރުކާރުގެ ތަރައްގީގެ އަދި އިޖުތިމާއީ އެންމެ މުހިންމު ސިޔާސަތެއްގެ ގޮތުގައި ކަނޑައަޅާފައިވަނީ ބޯހިޔާވަހިކަން ކަމަށް އެމަނިކުފާނު ފާހަގަކުރެއްވިއެވެ.
މީގެއިތުރުން ރައީސް ވިދާޅުވީ، ގައުމު ދިފާއުކުރުމާއި މިނިވަންކަން ހިމާޔަތްކުރުމަށްފަހު، އެންމެ މުހިންމު އަސާސީ ހައްގަކީ ބޯހިޔާވަހިކަން ކަމަށެވެ. އެހެންކަމުން، ގައުމުގެ ދިފާއުގައި ރެޔާއި ދުވާލު މަސައްކަތްކުރާ ސިފައިންނަށް މި ހައްގު ކަށަވަރުކޮށްދިނުމަކީ ސަރުކާރުން އިސްކަންދޭނެ ކަމެއް ކަމަށް ރައީސް މުއިއްޒު ވިދާޅުވިއެވެ.
މި ޖަލްސާގައި ރައީސުލްޖުމްހޫރިއްޔާގެ އަނބިކަނބަލުން ސާޖިދާ އިބްރާހިމާއި ސިފައިންގެ އިސްވެރިންނާއި ދައުލަތުގެ އިސް ބޭފުޅުން ބައިވެރިވެވަޑައިގެންފައިވެއެވެ.
