ދިވެހިރާއްޖޭގައި ގަވާއިދާ ހިލާފަށް އުޅޭ ބިދޭސީ މަސައްކަތްތެރިންގެ މައްސަލަ ހައްލުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފެއްޓެވި ގައުމީ މަސައްކަތަށް ބޮޑެތި ކުރިއެރުންތަކެއް ލިބެމުންދާކަން ހޯމް މިނިސްޓަރު ޢަލީ އިޙްސާން ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި އިޙްސާން ވިދާޅުވީ، މި ސަރުކާރުގެ ފުރަތަމަ ދުވަހުން ފެށިގެން ރައީސް މުޢިއްޒު ވަނީ ބިދޭސީންގެ މައްސަލަ ހައްލުކުރުމަކީ ގައުމީ މުހިންމު މިޝަނެއްގެ ގޮތުގައި ކަނޑައަޅުއްވައި، އެ މަސައްކަތް ހޯމް މިނިސްޓްރީއާ އިތުބާރާއެކު ހަވާލުކުރައްވާފައި ކަމަށެވެ. މި މަގްސަދު ހާސިލްކުރުމަށްޓަކައި ވޭތުވެދިޔަ ދެ އަހަރު ދުވަހުގެ ތެރޭގައި ހޯމް ޓީމާއި ސަރުކާރުގެ ކަމާބެހޭ ހުރިހާ މުއައްސަސާތަކުން ވަރުބަލިކަމެއް ނެތި، ސާބިތުކަމާއެކު ގިނަ މަސައްކަތްތަކެއް ކޮށްފައިވާކަން ވަޒީރު ފާހަގަކުރެއްވިއެވެ.

ބިދޭސީންގެ މައްސަލަ ހައްލުކުރުމަށް ހާއްސަކޮށްގެން ކުރިއަށްގެންދާ "އޮޕަރޭޝަން ކުރަނގި" އަށް އަލިއަޅުއްވާލައްވަމުން ވަޒީރު ވިދާޅުވީ، މި އޮޕަރޭޝަނުގެ ދަށުން މިހާތަނަށް ހޯދިފައިވާ ކުރިއެރުންތަކަކީ މީގެ ކުރީގެ ސަރުކާރުތަކަށް ހައްލުނުކުރެވި އޮތް ދިގުލީ ގައުމީ މައްސަލައަކަށް ލިބުނު ބޮޑު ކާމިޔާބީއެއް ކަމަށެވެ. އަދި މި މަސައްކަތުގައި އަމަލީގޮތުން ބައިވެރިވާ ހުރިހާ ފަރާތްތަކަށާއި މުއައްސަސާތަކަށް ވަޒީރު ވަނީ އިޚްލާޞްތެރިކަމާއެކު ޝުކުރު އަދާކުރައްވާފައެވެ.

މީގެ އިތުރުން، މިދިޔަ ދެ އަހަރު ދުވަހުގެ ތެރޭގައި މި މައްސަލައަށް ދާއިމީ ހައްލެއް ހޯދުމަށް ރައީސް މުޢިއްޒު ދެއްވާ އިރުޝާދާއި، މި މަސައްކަތުން ހާސިލްކުރެވުނު މުހިންމު ލަނޑުދަނޑިތަކަށްޓަކައި މިނިސްޓަރު ވަނީ ރައީސުލްޖުމްހޫރިއްޔާއަށް މަރުހަބާ ދަންނަވާފައެވެ.

އެކްސްގައި ކުރެއްވި ޕޯސްޓެއްގައި މިއަދު ރައީސް ވިދާޅުވީ، ރާއްޖޭގައި ސައްޙަ ވޯކްޕަރމިޓެއްގައި ތިބި ބިދޭސީ މަސައްކަތްތެރިންގެ ތެރެއިން 98 އިންސައްތަ މީހުންގެ ބަޔޯމެޓްރިކް މައުލޫމާތު (10 އިނގިލީގެ ނިޝާނާއި ފޮޓޯ) މިހާރު ވަނީ ނަގާ ނިންމާފައި ކަމަށެވެ. މި ސަރުކާރު ހަވާލުވިއިރު، 17 ނޮވެމްބަރު 2023 ގައި މި އަދަދު ހުރީ އެންމެ 13 އިންސައްތައިގައި ކަމަށާއި، މިއީ ބިދޭސީންގެ ކާކުކަން ދެނެގަތުމަށް އެޅުނު ވަރަށް ވަރުގަދަ ފިޔަވަޅެއް ކަމަށް ރައީސް ވިދާޅުވި އެވެ.

ސަރުކާރުގެ އަމާޒަކީ ރާއްޖޭގައި އުޅޭ ހުރިހާ ބިދޭސީންނަކީ ގާނޫނީ އިމުގެ ތެރެއިން އުޅޭ ބައެއްކަން ކަށަވަރުކޮށް، ގައުމުގެ ސަލާމަތާއި ރައްކާތެރިކަން ދެމެހެއްޓުމެވެ. މި މަސައްކަތުގެ ދަށުން ރާއްޖޭގެ ހުރިހާ ރަށެއްގައި އުޅޭ ބިދޭސީންގެ މައުލޫމާތު އެއްކުރުމާއި، ގަވާއިދާ ހިލާފަށް އުޅޭ ފަރާތްތައް ގާނޫނީ އިމުގެ ތެރެއަށް ފެއްތުމަށް ބޮޑެތި މަސައްކަތްތަކެއް ދަނީ ކުރެވެމުންނެވެ.