ރާއްޖޭގައި ސައްޙަ ވޯކްޕާމިޓެއްގައި މަސައްކަތް ކުރަމުންދާ ބިދޭސީންގެ ތެރެއިން 98 އިންސައްތަ މީހުންގެ ބަޔޯމެޓްރިކް ތަފްސީލުތައް ނަގައި، އެ މީހުންނަކީ ކާކުކަން ދެނެގަނެވޭނެ ނިޒާމުގެ ތެރެއަށް ވައްދާ ނިމިފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހާމަކޮށްފިއެވެ.
ރައީސުލްޖުމްހޫރިއްޔާ އެކްސްގައި ކުރެއްވި ޕޯސްޓެއްގައި ވިދާޅުވީ، މިހާތަނަށް ކުރެވުނު މަސައްކަތުން ރާއްޖޭގައި އެކްޓިވް ވޯކްޕާމިޓެއްގައި ތިބި ބިދޭސީންގެ ތެރެއިން ގާތްގަނޑަކަށް ހުރިހާ މަސައްކަތްތެރިންގެ 10 އިނގިލީގެ ނިޝާނާއި ސާފު ފޮޓޯ ވަނީ ނަގާ ނިމިފައެވެ. މިއީ ރާއްޖޭގައި އުޅޭ ބިދޭސީންގެ މައުލޫމާތު ބެލެހެއްޓުމުގައި ހޯދުނު ބޮޑު ކުރިއެރުމެކެވެ.
Advertisement
މި ތަފާސްހިސާބުތަކަށް ބަލާއިރު، މި ސަރުކާރު ހަވާލުވިއިރު 17 ނޮވެމްބަރު 2023 ގައި ބަޔޯމެޓްރިކް ފުރިހަމަކުރެވިފައިވަނީ އެންމެ 13 އިންސައްތަ ބިދޭސީންގެއެވެ. ނަމަވެސް، ވޭތުވެދިޔަ ކުރު މުއްދަތެއްގެ ތެރޭގައި ކުރެވުނު ހަރުދަނާ މަސައްކަތުން މި އަދަދު މިވަނީ 98 އިންސައްތައަށް އުފުލިފައެވެ.
ސަރުކާރުން މިހާރު އަމާޒު ހިފާފައިވަނީ ގަވާއިދާ ޚިލާފަށް ރާއްޖޭގައި އުޅެމުންދާ ބިދޭސީންގެ މައްސަލައަށް ދާއިމީ ހައްލެއް ހޯދުމަށެވެ. އެގޮތުން، ވޭތުވެދިޔަ ތަނުގައި ޚާއްސަ އޮޕަރޭޝަންތަކެއް ވަނީ ކުރިއަށް ގެންގޮސްފައެވެ. މި މަސައްކަތުގެ ދަށުން، ބަޔޯމެޓްރިކް ރަޖިސްޓްރީ ފުރިހަމަނުކޮށް ބާކީ ތިބި މީހުން ހޯދައި، ގަވާއިދާ ޚިލާފަށް އުޅޭ ބިދޭސީން ރާއްޖެއިން ޑިޕޯޓުކުރުމުގެ މަސައްކަތް ބާރުދުވެލީގައި ކުރިއަށްދާނެއެވެ.
މި ފިޔަވަޅަކީ ރާއްޖޭގެ އަމަންއަމާންކަން ގާއިމުކުރުމަށާއި، ބިދޭސީންގެ މައްސަލަ ހައްލުކުރުމަށް ރައީސް ޑރ. މުޢިއްޒުގެ ސަރުކާރުން ގެންގުޅުއްވާ ހަރުދަނާ ސިޔާސަތުގެ ދަށުން ކުރެވޭ މުހިންމު މަސައްކަތެކެވެ. ސަރުކާރުގެ މަގްސަދަކީ ރާއްޖޭގައި މަސައްކަތްކުރާ ހުރިހާ ބިދޭސީންނަކީ ދެނެގަނެވޭ، އަދި ގާނޫނީ އިމުގެ ތެރެއިން އުޅޭ ބައެއްކަން ކަށަވަރުކުރުމެވެ.
