މާތް ﷲގެ ރަހުމަތާއެކު، ދިވެހިރާއްޖޭގެ ޖުމްހޫރީ ހަޔާތުގައި ވެރިކަމުގެ ދެވަނަ ދައުރެއް ފުރިހަމަކުރައްވާނެ ފުރަތަމަ ރައީސަކަށް ވެވަޑައިގަންނަވާނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲ ވިދާޅުވެއްޖެ އެވެ.
އަބްދުއްރަހީމް މިހެން ވިދާޅުވީ، ނިމިދިޔަ ކައުންސިލް އިންތިހާބުގައި އއ. ހިމަންދޫ އިން ޕީއެންސީގެ ކެންޑިޑޭޓުން ހޯދި ބޮޑު ކާމިޔާބީ ފާހަގަކުރުމަށް މިރޭ ޕީއެންސީ ހަރުގޭގައި ބޭއްވި ހާއްސަ ޖަލްސާގައި ވާހަކަފުޅު ދައްކަވަމުންނެވެ.
ޖަލްސާގައި ވާހަކަފުޅު ދައްކަވަމުން އަބްދުއްރަހީމް ވިދާޅުވީ، ސިޔާސީ މައިދާނުގައި އޮންނަ ވާދަވެރިކަމަކީ ޒާތީ ހަސަދަވެރިކަމަށް ނެހެއްދެވުމަށް އިލްތިމާސްކުރައްވާ ކަމަށެވެ. އަދި އިދިކޮޅު ފަރާތްތަކުން މިހާރު މަސައްކަތް ކުރަމުންދަނީ ޕީއެންސީގެ ބަދަހި ލަޝްކަރު ބައިބައިކޮށްލުމަށް ކަމަށާއި، އެކަމަށް ސަޕޯޓަރުން ހޭލުންތެރިވާން ޖެހޭ ކަމަށް އޭނާ ފާހަގަކުރެއްވި އެވެ.
"އަޅުގަނޑުމެންގެ ޓީމު ޖަދަލުކުރަން ނިކުތީމާ ދެން އެޓީމު ބަލިކުރެވޭނެ ޓީމެއް މި ރާއްޖޭގެ ސިޔާސީ މައިދާނަކު ނެތް،" އަބްދުއްރަހީމް ވިދާޅުވި އެވެ. ނަމަވެސް، ރައީސް ޑރ. މުއިއްޒު އަންގަވާފައިވަނީ އެއްވެސް ބޭފުޅަކާ ޒާތީ ޖަދަލުވުމަކަށް ނުދިއުމަށް ކަމަށާއި، އެހެންކަމުން އެފަދަ ކަންކަމުގެ ތެރެއަށް ޕީއެންސީން ނުވަންނާނެ ކަމުގެ ޔަގީންކަން އޭނާ ދެއްވި އެވެ.
އަބްދުއްރަހީމް އިތުރަށް ވިދާޅުވީ، ރައީސް މުއިއްޒަކީ ރައްޔިތުންނާ ގާތުން މަސައްކަތްކުރައްވާ ވެރިއެއް ކަމަށެވެ. ވެރިކަމުގެ ކުޑަ ދުވަސްކޮޅެއްގެ ތެރޭގައި ރައީސް ބައްދަލުނުކުރައްވާ ކައުންސިލެއް ނުވަތަ ވަޑައިނުގަންނަވާ ރަށެއް މަދުވާނެ ކަމަށާއި، ރައީސް ރަށްރަށަށް ވަޑައިގަންނަވަނީ ހަމައެކަނި ޖަލްސާ ބާއްވާފައި ފުރައިވަޑައިގަންނަވާކަށް ނޫން ކަމަށް އޭނާ ވިދާޅުވި އެވެ.
ރައީސް ރަށްރަށަށް ކުރައްވާ ދަތުރުފުޅުތަކުގައި ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާ ބައްދަލުކުރައްވައި، ރައްޔިތުންގެ ކަންބޮޑުވުންތައް އަމިއްލަފުޅަށް ނޯޓުކުރައްވައި، އެކަންކަމަށް ތަސައްލީއެއް ހޯއްދަވައިދެއްވާކަން އަބްދުއްރަހީމް ފާހަގަކުރެއްވި އެވެ.
އަބްދުއްރަހީމް ވިދާޅުވީ، އިއްޔެގެ ވެރިކަން ކުރި ގޮތާއި އޭގެ ނަތީޖާ ރައްޔިތުންނަށް ފެނިފައިވާ ކަމަށެވެ. އަދި ރާއްޖޭގެ ސިޔާސީ ނިޒާމުގައި މިފަދަ ގާތްކަމާއެކު ރައްޔިތުންގެ އަޑުއައްސަވައިގެން ކަންކަން ކުރެއްވި އެހެން ވެރިއަކު ނެތް ކަމަށް ވިދާޅުވެ، ރައީސް މުއިއްޒުގެ ވެރިކަމަށް ރައްޔިތުންގެ އޮތް އިތުބާރު ބޮޑުކަން އޭނާ ހާމަކުރެއްވި އެވެ.
