ސްރީލަންކަން އެއާލައިންސްގެ ފްލައިޓެއްގައި ރައީސުލްޖުމްހޫރިއްޔާ ޑރ. މުއިއްޒު ދަތުރުފުޅު ކުރެއްވުމަކީ އެ އެއާލައިނަށް ލިބުނު ވަރަށް ބޮޑު ޝަރަފެއް ކަމަށް އެ އެއާލައިނުން ބުނެފި އެވެ.
ސްރީލަންކަން އެއާލައިންސްގެ ރަސްމީ ސޯޝަލް މީޑިއާ އެކައުންޓުން ކުރި ޕޯސްޓެއްގައި ބުނެފައިވަނީ، މާލެއިން ކޮލަމްބޯއަށް ދަތުރުކުރި ޔޫ.އެލް 116 ފްލައިޓުން ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް މަރުހަބާ ދެންނެވުމަކީ އެ ކުންފުންޏަށް ލިބުނު ފަހުރެއް ކަމަށެވެ. އަދި ދަތުރުފުޅަށް އެ އެއާލައިން އިހުތިޔާރު ކުރެއްވި ކަމަށްޓަކައި ޝުކުރު އަދާކުރަމުން އެއާލައިނުން ބުނީ، އެ ސަރަހައްދުގެ ގައުމުތައް ގުޅުވައިދިނުމުގައި ސްރީލަންކާގެ ހިތްހެޔޮކަމާއި މެހެމާންދާރީ ފޯރުކޮށްދިނުމުގައި އެ ކުންފުނިން އަބަދުވެސް ދެމިއޮންނާނެ ކަމަށެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި އެމަނިކުފާނުގެ އަނބިކަނބަލުން ސާޖިދާ މުހައްމަދު ސްރީލަންކާއަށް ކުރެއްވި މި ރަސްމީ ދަތުރުފުޅު ފެއްޓެވީ މި މަހުގެ 3 ވަނަ ދުވަހު އެވެ. މި ދަތުރުފުޅު ނިންމަވާލެއްވުމަށްފަހު ރައީސްގެ ދެކަނބަލުން އެނބުރި ރާއްޖެ ވަޑައިގަތީ އިއްޔެގެ ވަގުތެއްގަ އެވެ.
މި ދަތުރުފުޅުގެ މައިގަނޑު ބޭނުމަކީ ދިވެހިރާއްޖެއާއި ސްރީލަންކާއާ ދެމެދު އޮތް ގުޅުން އެކި ދާއިރާތަކުން އިތުރަށް ބަދަހިކުރުމެވެ. އެގޮތުން، މި ދަތުރުފުޅުގެ ތެރެއިން ދެ ގައުމުގެ ދެމެދުގައި އެކި ދާއިރާތަކުން ގުޅުން ބަދަހިކުރުމަށްޓަކައި ޖުމްލަ 7 އެއްބަސްވުމެއްގައި ވަނީ ސޮއިކޮށްފަ އެވެ.
މި ދަތުރުފުޅަކީ ދެ ގައުމުގެ ދެމެދުގައި އޮތް ޒަމާންވީ ރަހުމަތްތެރިކަމުގެ ގުޅުން އާ ހަރުފަތަކަށް ގެންދިއުމަށް މަގުފަހިވެގެންދިޔަ މުހިންމު ދަތުރުފުޅެއްކަން ފާހަގަކުރެވެ އެވެ.
