ޔޫއެފާ ޗެމްޕިއަންސް ލީގުގެ ސެމީ ފައިނަލްގެ ދެވަނަ ލެގުގައި އެތުލެޓިކޯ މެޑްރިޑްގެ މައްޗަށް 1-0 އިން ކުރިހޯދައި، 20 އަހަރުގެ ދިގު އިންތިޒާރަކަށްފަހު އާސެނަލް މުބާރާތުގެ ފައިނަލުން ޖާގަ ހޯދައިފިއެވެ.

އާސެނަލްގެ އެމިރޭޓްސް ސްޓޭޑިއަމްގައި އަންގާރަ ދުވަހުގެ ރޭ ކުޅުނު މި މެޗުން އެޓީމު މޮޅުވީ 2-1 ގެ އެގްރިގޭޓް ނަތީޖާއަކުންނެވެ. މިއީ 2006 ވަނަ އަހަރު ބާސެލޯނާއާ ދެކޮޅަށް ކުޅުނު ފައިނަލަށްފަހު، އާސެނަލް މި މުބާރާތުގެ ފައިނަލަށް ދަތުރުކުރި ފުރަތަމަ ފަހަރެވެ.

މެޑްރިޑްގައި ކުޅުނު ފުރަތަމަ ލެގު 1-1 އިން އެއްވަރުވެފައި އޮތުމުން، ރޭގެ މެޗަކީ ދެ ޓީމަށްވެސް މުހިންމު މެޗެކެވެ. މެޗުގެ ހަމައެކަނި ލަނޑު ފެނިގެންދިޔައީ ފުރަތަމަ ހާފުގެ އެންމެ ފަހު މިނެޓުގަ އެވެ. ވިކްޓާ ގްޔޮކެރޭސް ތަނަވަސްކޮށްދިން ފުރުސަތެއްގައި ލިއަންޑްރޯ ޓްރޮސާޑް ފޮނުވާލި ހަމަލާ އެތުލެޓިކޯގެ ކީޕަރު ޖޭން އޮބްލަކް ދިފާއުކުރި ނަމަވެސް، ރީބައުންޑް ބޯޅަ ގޯލުގެ ތެރެއަށް ފޮނުވާލައިގެން އާސެނަލަށް ލީޑު ނަގައިދިނީ ކެޕްޓަން ބުކާޔޯ ސަކާއެވެ.

މެޗުގެ ދެވަނަ ހާފުގައި އެތުލެޓިކޯ މެޑްރިޑުން ނަތީޖާ އެއްވަރުކުރުމަށް ގިނަ މަސައްކަތްތަކެއް ކުރި ނަމަވެސް، ވިލިއަމް ސަލީބާ އާއި ގަބްރިއަލް މަގަލަޔޭސް އިސްވެ ތިބެ އާސެނަލްގެ ފަހަތް ބެލެހެއްޓީ ވަރަށް ވަރުގަދަކޮށެވެ. މީގެ އިތުރުން މެދުތެރޭގައި ޑެކްލަން ރައިސް އާއި މައިލްސް ލޫވިސް-ސްކެލީ ދެއްކި ހިތްވަރާއެކު، އާސެނަލުން ވަނީ މެޗުގެ ނަތީޖާ ދަމަހައްޓާފައެވެ.

މެޗު ނިމުނުކަމުގެ ފަހު ފުމަޔާއެކު އެމިރޭޓްސް ސްޓޭޑިއަމް އުފާވެރިކަމުން ގުގުމާލި އެވެ. މީގެ 20 އަހަރުދުވަހު ތެރޭ ސަޕޯޓަރުން އުފާފާޅުނުކުރާ ވަރަށް އުފާފާޅުކުރިއިރު، މިއީ މައިކަލް އާޓެޓާގެ އިރުޝާދުގެ ދަށުން އެކުލަވާލި ޓީމުން ހޯދި އެންމެ ބޮޑު ކާމިޔާބީއެވެ.

ބުޑަޕެސްޓްގައި ކުޅޭ ފައިނަލް މެޗުގައި އާސެނަލް ބައްދަލުކުރަން ޖެހޭނީ ބަޔާން މިއުނިކް ނުވަތަ ޕީ.އެސް.ޖީ އާއެވެ. މީގެ 20 އަހަރު ކުރިން ގެއްލުނު ތަށި ހޯދުމުގެ އަޒުމުގައި އާސެނަލް މިހާރު އޮތީ ތައްޔާރަށެވެ.