-ދިވެހިރާއްޖޭގެ މަސްވެރިކަމުގެ އުފެއްދުންތައް ބޭރުގެ ބާޒާރުތަކަށް ފުޅާކުރުމުގެ ގޮތުން، މިފްކޯގެ އުފެއްދުންތައް ސްރީލަންކާގައި ރަސްމީކޮށް މިއަދު ލޯންޗުކޮށްފި އެވެ.
ސްރީލަންކާގެ ކޮލަމްބޯގައި ބޭއްވި މި ހާއްސަ ރަސްމިއްޔާތު ޝަރަފުވެރިކޮށްދެއްވީ، މިހާރު ލަންކާއަށް ކުރައްވަމުން ގެންދަވާ ފުރަމާނަ ދަތުރުފުޅުގެ ތެރެއިން، ރައީސުލްޖުމްހޫރިއްޔާ ޑރ. މުހައްމަދު މުއިއްޒުއެވެ. މި ރަސްމިއްޔާތުގައި މިފްކޯގެ އުފެއްދުންތައް ދައްކާލުމުގެ އިތުރުން، އެ އުފެއްދުންތައް ބޭނުންކޮށްގެން ތައްޔާރުކޮށްފައިވާ ދިވެހި ސަގާފީ 'މާލަފަތެއް' ވެސް ވަނީ ދައްކާލާފަ އެވެ. މިއީ މިފްކޯގެ މަހުގެ އުފެއްދުންތަކަށް އިތުރު ފުރިހަމަކަމެއް ގެނެސް، ބައިނަލްއަގުވާމީ ބާޒާރުގައި އެ ކުންފުނީގެ އުފެއްދުންތައް ފުޅާކުރުމަށް އެޅުނު މުހިންމު ފިޔަވަޅެކެވެ.
މި ރަސްމިއްޔާތުގައި ސްރީލަންކާގެ މިނިސްޓަރ އޮފް ޓްރޭޑް، ކޮމާސް، ފުޑް ސެކިއުރިޓީ އެންޑް ކޯޕަރޭޓިވް ޑިވެލޮޕްމަންޓް، އޮނަރަބަލް ވަސަންތަ ސަމަރަސިންހަ ބައިވެރިވެވަޑައިގެން ވާހަކަފުޅު ދެއްކެވި އެވެ. އެމަނިކުފާނުގެ ވާހަކަފުޅުގައި، ދެ ޤައުމުގެ ދެމެދުގައި އޮތް އިސްތިރާތީޖީ ވިޔަފާރީގެ ގުޅުން ބަދަހިކުރުމުގައި މިފަދަ މަޝްރޫޢުތަކުގެ މުހިންމުކަމުގެ މައްޗަށް އަލިއަޅުއްވާލެއްވި އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ މި ރަސްމިއްޔާތުގެ ތެރެއިން ތައްޔާރުކޮށްފައިވާ ކަލިނަރީ ޝޯކޭސް ސަރަހައްދަށް ޒިޔާރަތްކުރައްވައި، ބްރޭންޑްގެ ދަށުން ބާޒާރަށް ނެރެފައިވާ އުފެއްދުންތައް ބައްލަވާލައްވާފަ އެވެ.
މި ހަރަކާތަކީ ރައީސުލްޖުމްހޫރިއްޔާ ސްރީލަންކާއަށް މިހާރު ކުރައްވަމުން ގެންދަވާ ފުރަމާނަ ދަތުރުފުޅުގެ ހަވާސާގައި ބޭއްވުނު މުހިންމު ހަރަކާތެކެވެ.
