އެމެރިކާގެ މަޝްހޫރު ލަވަކިޔުންތެރިޔާ ޑީފޯވްޑީ (ޑޭވިޑް އެންތަނީ ބާކް)، ޒުވާން އަންހެން ކުއްޖަކު މަރާލުމަށްފަހު އޭނާގެ ހަށިގަނޑު ނައްތާލުމަށް ބޭނުންވާ ތަކެތި އޮންލައިންކޮށް ގަނެފައިވާ ކަމަށް ޕްރޮސެކިއުޓަރުން ކޯޓުގައި ބުނެފި އެވެ.

ބުދަ ދުވަހު ކޯޓަށް ހުށަހެޅި ލިޔެކިޔުންތަކުގައިވާ ގޮތުން، ޕްރޮސެކިއުޓަރުން ތުހުމަތު ކުރަނީ ޑީފޯވްޑީ އޭނާގެ ގޭގައި އެ އަންހެން ކުއްޖާއަށް ވަޅިން ހަމަލާދީ މަރާލާފައިވާ ކަމަށެވެ. އަދި މަރަށްފަހު، ވަގު ނަމެއް ބޭނުންކޮށްގެން ދެ ކަރުގަނޑާއި، ފޮރުވާފައި ބަހައްޓާ ކޮތަޅަކާއި، ފުޅާ މޮގާއި، އަދި ހެކި ނައްތާލުމަށްޓަކައި އެއްޗެހި އަންދާލާނެ ދަގަނޑު ކޭޖެއް އޮންލައިންކޮށް އޯޑަރުކޮށްފައިވާ ކަމަށް ތަހުގީގަށް ވަނީ އެނގިފަ އެވެ.

މި މައްސަލައިގެ ތަފްސީލުތައް ހާމަކުރަމުން ޕްރޮސެކިއުޓަރުން ބުނީ، 22 އެޕްރީލް 2025 ގައި ޑީފޯވްޑީ އާއި މަރުވި ރިވާސް ހެނާންޑޭޒްއާ ދެމެދު އެހެން އަންހެނުންނާ އޮންނަ ގުޅުމާ ބެހޭގޮތުން ބޮޑު ދެބަސްވުމެއް ހިނގާފައިވާ ކަމަށެވެ. އަދި އޭގެ އަނެއް ދުވަހު އަންހެން ކުއްޖާ މަރާލާފައިވާ ކަމަށް ބެލެވޭ އިރު، އޭނާ މަރާލުމަށްފަހު ހަށިގަނޑު ކަނޑާ ބައިބައިކޮށްފައިވަނީ ހޮލީވުޑް ހިލްސްގައި ހުންނަ ޑީފޯވްޑީގެ ގޭގެ ގަރާޖުގަ އެވެ.

ކޯޓު ލިޔެކިޔުންތަކުގައިވާ ގޮތުން، އަންހެން ކުއްޖާ މަރާލި ދުވަހު ޑީފޯވްޑީ ވަނީ އޭނާގެ ގެއަށް އައުމަށް ރިވާސްއަށް އޫބާއެއް ބުކްކޮށްދީފައެވެ. އަދި އޭނާ އެގެއަށް ދިޔަ ފަހުންވެސް، ކަންކަން ފޮރުވުމުގެ ގޮތުން އޭނާ ކޮބައިތޯ އަހައި ޑީފޯވްޑީ މެސެޖުތަކެއް ފޮނުވާފައިވާ ކަމަށް ޕްރޮސެކިއުޓަރުން ތުހުމަތުކުރެއެވެ. ސެޕްޓެމްބަރު 2025 ގައި އެ އަންހެން ކުއްޖާގެ ހަށިގަނޑު ފެނިފައިވަނީ ޑީފޯވްޑީގެ ޓެސްލާ ކާރުގެ ތެރެއިންނެވެ.

ބުދަ ދުވަހު އޮތް ކޯޓު އަޑުއެހުމުގައި ޑީފޯވްޑީގެ ވަކީލުން ވަނީ މި ލިޔެކިޔުންތައް އާންމުކުރުން ހުއްޓުވުމަށް މަސައްކަތް ކޮށްފަ އެވެ. ނަމަވެސް ފަނޑިޔާރު ޗާލީން އޮލްމެޑޯ ވަނީ ބައެއް ހެކިތައް ފިޔަވައި އެހެން މައުލޫމާތުތައް އާންމުކުރުމުގެ ހުއްދަ ދެއްވާފަ އެވެ. ކޯޓުގައި ޑީފޯވްޑީ މާ ގިނަ ވާހަކައެއް ނުދައްކަ އެވެ.

ޓިކްޓޮކްގެ މަޝްހޫރު ލަވަތަކުން މަގުބޫލުކަން ހޯދި ޑީފޯވްޑީގެ މައްޗަށް މީގެ އިތުރުން ކުޑަކުދިންނަށް ޖިންސީ ގޯނާކުރުމާއި، ބޭއަދަބީ ފޮޓޯ ގެންގުޅުމުގެ ދައުވާ ވެސް ވަނީ އުފުލާފަ އެވެ. އޭނާ މިހާރު ހުރީ ލޮސް އެންޖެލިސް ފުލުހުންގެ ބަންދުގަ އެވެ. މި މައްސަލައިގެ އިތުރު އަޑުއެހުމެއް އަންނަ މަހު އޮންނާނެ އެވެ.