ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) ގެ މެނޭޖިންގ ޑިރެކްޓަރުގެ މަޤާމަށް، ހަކަތައިގެ ދާއިރާގެ ތަޖުރިބާކާރު ބޭފުޅެއް ކަމުގައިވާ ސ. ފޭދޫ / ނެސްޕްރޯވިލާ، ޑރ. އަލީ އަޒްވަރު އައްޔަނުކުރައްވައިފި އެވެ.

ޑރ. އަލީ އަޒްވަރަކީ ހަކަތައިގެ ދާއިރާގައި 20 އަހަރަށްވުރެ ގިނަ ދުވަހު ހިދުމަތް ކުރައްވާފައިވާ، އަދި އެ ދާއިރާގެ ސިޔާސަތުތައް އެކުލަވައިލުމުގެ ބޮޑު ތަޖުރިބާއެއް ލިބިވަޑައިގެންފައިވާ ބޭފުޅެކެވެ. މި މަގާމަށް އައްޔަނުކުރެވުނުއިރު އޭނާ ހުންނެވީ ސްޓެލްކޯގެ ޑެޕިއުޓީ މެނޭޖިންގ ޑައިރެކްޓަރުގެ މަގާމުގަ އެވެ. އޭނާ ވަނީ ސްޓެރެޓެޖިކް ލީޑަރޝިޕް، އޮޕަރޭޝަންސް، ފައިނޭންސް، އަދި ބިޒްނަސް ޑިވެލޮޕްމަންޓްގެ ދާއިރާއިން ކުންފުނި ހިންގުމުގައި މުހިންމު ދައުރެއް އަދާކުރައްވާފަ އެވެ.

1997 ވަނަ އަހަރު ޓްރޭނީއެއްގެ ގޮތުގައި ސްޓެލްކޯއާ ގުޅިވަޑައިގަތް ޑރ. އަޒްވަރު ވަނީ އެ ކުންފުނީގެ ފަންނީ އަދި އިދާރީ ގިނަ މަގާމުތަކެއް ފުރުއްވާފަ އެވެ. މީގެ ތެރޭގައި ސޭލްސް އެންޑް މާކެޓިން، ބިލިންގ ސާވިސަސް، އަދި ބިޒްނަސް ޑިވެލޮޕްމަންޓް ފަދަ ދާއިރާތަކުގެ އިސް މަގާމުތަކާއި، ޗީފް އޮޕަރޭޓިން އޮފިސަރުގެ (ސީ.އޯ.އޯ) މަގާމު ހިމެނެ އެވެ. މީގެ އިތުރުން ސްޓެލްކޯގެ ބޯޑު މެންބަރުކަމާއި، ފިއުލް ސަޕްލައި މޯލްޑިވްސް (އެފް.އެސް.އެމް) ގެ ނޮން-އެގްޒެކެޓިވް ޑައިރެކްޓަރުގެ މަޤާމުވެސް އޭނާ ވަނީ ފުރުއްވާފަ އެވެ.

ތައުލީމީ ގޮތުން ޑރ. އަޒްވަރު ވަނީ ނިއުޒީލެންޑުގެ ވިކްޓޯރިއާ ޔުނިވަރސިޓީ އޮފް ވެލިންޓަނުން ޕީއެޗްޑީ ހާސިލުކުރައްވާފައެވެ. އޭނާގެ ދިރާސާ ބިނާކުރެއްވީ ކުދި ޖަޒީރާ ޤައުމުތަކުގައި އިއާދަކުރަނިވި ހަކަތަ ފެތުރުމާ ގުޅޭގޮތުންނެވެ. މީގެ އިތުރުން ނޭޝަނަލް ޔުނިވަސިޓީ އޮފް ސިންގަޕޫރުން މާސްޓާސް އިން ޕަބްލިކް ޕޮލިސީ އަދި އިނގިރޭސިވިލާތުގެ ޔުނިވަސިޓީ އޮފް ޝެފީލްޑުން ބިޒްނަސް ސްޓަޑީޒްގެ ދާއިރާއިން ފުރަތަމަ ޑިގްރީ ހާސިލުކުރައްވާފައިވެ އެވެ.

ބައިނަލްއަގްވާމީ ގިނަ ސެމިނާތަކެއްގައި ރާއްޖެ ތަމްސީލުކުރައްވާފައިވާ ޑރ. އަޒްވަރު ވަނީ ކޯޕަރޭޓް ގަވަނަންސްގެ ދާއިރާއިންވެސް ގިނަ ތަމްރީނުތަކެއް ފުރިހަމަކުރައްވާފަ އެވެ. ސްޓެލްކޯގެ އައު މެނޭޖިން ޑިރެކްޓަރުގެ ގޮތުގައި އޭނާ އައްޔަނުކުރެވުމާއެކު، ރާއްޖޭގެ ހަކަތައިގެ ދާއިރާ އިތުރަށް ހަރުދަނާވެ، ދެމެހެއްޓެނިވި ސިޔާސަތުތަކެއް ތަންފީޒުވެގެންދާނެ ކަމަށް ބެލެވެ އެވެ.